Andrea Róbertsdóttir, framkvæmdastjóri Félags kvenna í atvinnulífinu, var tilnefnd til Stjórnunarverðlauna Stjórnvísis 2026. Þau verðlaun eru veitt stjórnendum sem hafa skarað fram úr á sínu sviði og sýnt framúrskarandi hæfni í starfi. Hún er menntuð í mannauðsstjórnun, félags- og kynjafræði og jákvæðri sálfræði og hefur starfað sem framkvæmdastjóri og forstöðumaður en einnig sem mannauðsstjóri RÚV. Hún hefur annast fjölmiðlatengsl, almanna- og kynningarmál og býr yfir margþættri reynslu úr fjölmiðlum en hefur einnig reynslu af stjórnarsetu. Gunnar Hansson og Guðrún Gunnarsdóttir ræddu við Andreu í Mannlega þættinum á Rás 1 um líf hennar og störf, jafnréttisbaráttuna og lífsgleðina. „Bleiku gleðigenin hennar ömmu“ „Þetta eru bleiku gleðigenin hennar ömmu, hún var dásamleg kona,“ segir Andrea og brosir breitt þegar hún er spurð hvers vegna hún er svo bjartsýn og jákvæð. En aldurinn segir hún að vinni líka með sér. Svo er það að verða miðaldra lykillinn að lífinu. Að verða miðaldra, bera ábyrgð á eigin heilsu og reyna að leggja inn, hlúa að sér og njóta augnabliksins. Þessir frasar, það er ástæða þess að þetta eru frasar. Hún segir þakklæti afar mikilvægt og hvetur fólk hreinlega til að tileinka sér það. „Það er ofboðslega skemmtilegt að minnast á hvað það er margt að þakka fyrir.“ Leggur inn í heilsubankann eftir erfiða lífsreynslu Faðir Andreu lést um jólin. Sú erfiða reynsla breytti nálgun Andreu gagnvart lífinu, andlegu og líkamlegu hreysti. „Það að fylgja manneskju í gegnum erfið veikindi fékk mig heldur betur til að hugsa,“ segir hún. „Að sjá fólk veikjast og verða ósjálfbjarga er glatað ferli.“ Hún hafi þá farið að einblína á líkamsrækt og hugleiðslu. Hún segir mikilvægt að reyna að leggja inn í heilsubankann með því að setja líkamsrækt á dagskrá og að muna hugleiðslu og að staldra við. Hugarfarið er lykill Andrea þekkir til konu á níræðisaldri sem hugsar meðal annars um heilsuna með því að setjast aldrei niður þegar hún klæðir sig í sokka. „Ég ákvað að apa þetta upp eftir henni og setja inn í daglega lífið. Þetta er ágætis jafnvægisæfing,“ segir Andrea og brosir. Við erum ekkert nema orka og víbringur út og suður svo það þarf að beita sig hörðu við að vera á jákvæðu nótunum. Andrea er sem fyrr segir með diplómu í jákvæðri sálfræði. Hún segist hafa lært mikið af því. „Það er fag sem fjallar um seiglu, úthald, þakklæti og fleira,“ segir hún. Það er gaman að lesa ritrýndar greinar, rannsóknir sem sýna að eins og þakklæti vinnur gegn þunglyndi og hefur langvarandi jákvæð áhrif á geðið, það að þakka fyrir. Hugarfarið sé þar alger lykill. „Að vera ekki alltaf með glasið hálftómt, það er mjög hressandi.“ „Þú vilt ekki hitta mig svanga“ Þegar Andrea finnur að hún þarf eitthvað til að bæta geðið hlustar hún á tónlist eða fær sér að borða. Það síðarnefnda er henni sérlega mikilvægt. „Þú vilt ekki hitta mig svanga,“ segir hún og hlær. Eiginmaður hennar sér venjulega um eldamennskuna á heimilinu. Hann hefur unun af því að elda eitthvað nýtt og ferskt en Andrea er liðtækari þegar kemur að gamaldags íslenskum mat. „Ég er í slátri, kjötsúpu og svona þjóðbúningamat.“ Andrea gekk í Húsmæðraskólann á yngri árum og kann ýmislegt sem tengist þjóðlegum hefðum. „Mér er treystandi fyrir öllu fyrir 1950.“ Í Húsmæðraskólanum lærði hún að vefa, strauja og ganga um beina svo eitthvað sé nefnt. Og að þessu býr hún vel. Þú varst að prjóna og sauma og ganga frá vefnaði fram á nótt. Þetta er dásamlegt og svo mikil hugleiðsla að leggja huga við hönd hvort sem það er að mála eða sauma. Þetta skiptir máli, ég hef rosa trú á því. Ekki gott hlutfall í stjórnunarstöðum í einkageiranum Í starfi er Andrea ánægð og segir hún vinnuna bæði skemmtilega og krefjandi. Það eru margir sigrar sem hægt er að fagna þegar það kemur að jafnrétti kynjanna, en mikil slagsíða. Forgjöfin er ólík hjá kynjum þegar kemur að því að komast í framkvæmdastjórastöðu, eða hvað það er. Konur eru áberandi í mörgum af æðstu stöðum á Íslandi eins og í embætti forseta, forsætisráðherra, biskups og borgarstjóra. Andrea segir það þó ekki segja alla söguna. Það er þannig að það raðast ofsalega flottar konur í áberandi embætti á Íslandi í dag, sem er smá villandi því það vantar heldur betur upp á í heildina, í einkageiranum. Það þarf að setja jafnrétti á dagskrá Hún minnist á jafnvægisvogina sem er verkefni með þann tilgang að auka á jafnvægi kynja í efsta lagi stjórnunar fyrirtækja, stofnana, ríkisfyrirtækja og sveitarfélaga á Íslandi. Markmiðið er að kynjaskipting í framkvæmdastjórnum/efsta stjórnendalagi verði að minnsta kosti 40/60. „Þar hvetjum við fólk til að skrifa undir viljayfirlýsingu um að jafna hlut kynjanna í efsta stjórnendalagi,“ segir hún. Það er mjög ánægjulegt að aðstoða atvinnulífið við að gera þetta, hvort sem það er að setja sér markmið eða nota eitthvað eins og arftakaáætlun. Þá geturðu lagt línur fyrir komandi kynslóðir. Hún segir ýmsar breytur til staðar sem þurfi að taka tillit til. Þú mætir ekki og segir bara upp allri röðinni og ræður inn konu, þetta snýst ekki um það heldur blöndun. Það eru margar breytur sem þarf að snúa að þegar kemur að jafnréttinu. Það er uppruni og búseta og ólík hæfni, aldur og annað. Hún segir jafnrétti vera ákvörðun. „Það þarf að setja þetta á dagskrá og líta í eigin barm.“ Þakklæti fyrir það sem hefur breyst Henni þyki gaman að sjá viðhorf breytast hjá karlrembum sem eignist stelpur. Þá finna þeir á eigin skinni hve mikið lægri launin eru, verri æfingatímar, verri fótboltavellir. Þetta er alveg magnað og það er með ólíkindum hvernig hallar á konur í mörgu tilliti. Svo er það þriðja vaktin og guð má vita hvað. En þakklætið fyrir það sem hefur áunnist er henni ofarlega í huga. „Þakka þeim konum sem hafa tekið allan skítinn á kassann fyrir okkur hin. Það er með ólíkindum hvað margar hafa unnið stóra sigra með handafli og samstöðu sem er ekki sjálfsögð.“ Sá konu með farsíma í fyrsta sinn Andrea hefur starfað sem fyrirsæta erlendis. Hún segir það hafa verið góðan skóla að standa á eigin fótum í framandi umhverfi þar sem samkeppnin var hörð. „Ég var á Ítalíu til að byrja með og það er svo skemmtilegt að rifja þetta upp. Það var faxtæki og tíkallasími og guð má vita hvað.“ Hún minnist þess þegar hún sá GSM-síma í fyrsta sinn. Ég sá fyrirsætu að tala í síma úti á götu og ég var bara: Þú ert svo biluð. Hún segist vera haldin mikilli útþrá og að það sé þroskandi fyrir fólk að ferðast um. „Menningarlæsi er svo mikilvægt. Þegar ég hef ráðið fólk hef ég litið á ferðalög á ferilskránni sem ígildi einhverrar gráðu.“ Ævintýramennskan kemur beint frá föður hennar. „Pabbi var svona Marlboro-maðurinn, með sítt hár og kúrekahatt. Kom að sækja mig í skólann á snjósleða með kajak í garðinum og fór að veiða í kvöldmatinn. Þetta er ekki bara að fara út fyrir þægindahringinn heldur það sem er fyrir manni haft. Ég held ég hafi eitthvað frá honum í þessu.“ „Þá finna þeir á eigin skinni hve mikið lægri launin eru, verri æfingatímar, verri fótboltavellir,“ segir Andrea Róbertsdóttir framkvæmdastjóri Félags kvenna í atvinnulífinu.