Heildar­sam­stæða ríkisins var rekin með 182,1 milljarðs króna halla árið 2025, sam­kvæmt ríkis­reikningi sem birtur var í dag. Tap ríkisins var þar með rúm­lega þre­falt meira en árið áður, þegar af­koman var neikvæð um 55,9 milljarða króna. Í til­kynningu fjár­mála- og efna­hags­ráðu­neytisins er lögð áhersla á aukinn efna­hags­legan stöðug­leika, lægri verðbólgu, aukinn kaup­mátt og áfram­haldandi styrkingu ríkis­fjár­mála. Ríkis­reikningurinn sjálfur sýnir þó að hallinn jókst veru­lega milli ára og að eigin­fjár­staða ríkisins snerist úr því að vera jákvæð í að verða neikvæð. Tekjur heildar­sam­stæðu ríkisins námu 1.507 milljörðum króna árið 2025 en rekstrar­gjöld 1.646 milljörðum króna. Af­koma fyrir fjár­magns­liði, sölu­hagnað, sölutap og mats­breytingar eigna var neikvæð um 138,9 milljarða króna. Árið áður var sama stærð neikvæð um 3,6 milljarða króna. Hrein fjár­magns­gjöld námu 71,5 milljörðum króna og vógu áfram þungt í af­komu ársins. Fjár­muna­tekjur námu 234,2 milljörðum króna en fjár­magns­gjöld 305,7 milljörðum. Af­koma ársins nam því 182,1 milljarðs króna tapi. Eigið fé ríkisins versnaði einnig veru­lega á árinu. Í árs­lok 2024 var eigið fé heildar­sam­stæðu ríkisins jákvætt um 167,7 milljarða króna. Í árs­lok 2025 var það neikvætt um 155,3 milljarða króna. Breytingin nemur rúmum 323 milljörðum króna. Stærstu skýringar á breytingu eigin fjár eru meðal annars leiðrétting líf­eyris­skuld­bindinga, leiðrétting vegna eign­færðs virðis­auka­skatts í fjár­festingum og endur­mat sam­göngu­mann­virkja. Leiðrétting líf­eyris­skuld­bindinga hafði neikvæð áhrif um 146,7 milljarða króna og leiðrétting vegna virðis­auka­skatts í fjár­festingum neikvæð áhrif um 194,4 milljarða. Á móti hafði upp­taka endur­mat­sað­ferðar vegna sam­göngu­mann­virkja jákvæð áhrif um 91 milljarð. Ríkis­reikningurinn er nú settur fram sam­kvæmt alþjóð­legum reiknings­skilastöðlum fyrir opin­bera aðila, IPSAS, og nær heildar­sam­stæðan til A-, B- og C-hluta ríkisins. Það þýðir að saman­burður við fjár­lög er ekki beinn á þessum grunni. Í ríkis­reikningnum kemur þó fram að til að bera saman af­komu A1-hluta ríkis­sjóðs við fjár­lög og fjár­málaáætlun þurfi að laga niður­stöðuna að hagskýrslu­staðlinum GFS, sem fjár­lög byggja á. Á þeim grunni var í fjár­lögum ársins 2025 gert ráð fyrir að heildar­af­koma A1-hluta ríkis­sjóðs yrði neikvæð um 63 milljarða króna. Í síðustu áætlun ársins, frá desember, var hins vegar út­lit fyrir að hallinn yrði 35 milljarðar króna. Niður­staðan varð neikvæð um 66 milljarða króna. Af­koman varð því lítil­lega lakari en upp­haf­leg fjár­lög gerðu ráð fyrir en tæp­lega 31 milljarði verri en síðasta áætlun ársins. Í inn­gangs­orðum Daða Más Kristó­fers­sonar fjár­mála- og efna­hags­ráðherra segir að verri af­koma en gert var ráð fyrir í desember skýrist einkum af verri vaxta­jöfnuði. Þar kemur jafn­framt fram að frumjöfnuður hafi verið jákvæður um 50 milljarða króna, en í fjár­lögum hafi verið gert ráð fyrir 18 milljarða frumjöfnuði. Ráðherra segir í til­kynningu að árangur af ábyrgð og festu í hag­stjórn birtist í vaxandi mæli í efna­hags­legum stöðug­leika og betri hag al­mennings. „Endur­reisn fjár­hags­legs styrks ríkis­sjóðs er ekki að fullu lokið og enn er nokkuð í land til að ná lang­varandi verðstöðug­leika,“ segir Daði Már í til­kynningunni. Hann segir að aukin alþjóð­leg verðbólga og hækkun alþjóð­legra vaxta á fyrri helmingi árs 2026 valdi því að það muni taka lengri tíma að ná fullum árangri í lækkun verðbólgu en vonir stóðu til. Ráðu­neytið bendir jafn­framt á að sam­komu­lag um upp­gjör ÍL-sjóðs hafi náðst á árinu 2025 og að það dragi úr áhættu sem hafi byggst upp yfir langan tíma. Þrátt fyrir þann boð­skap sýna tölur ríkis­reikningsins að af­koma ríkisins versnaði veru­lega milli ára á rekstrar­grunni og að eigin­fjár­staðan er nú neikvæð. Tap heildar­sam­stæðu ríkisins jókst úr tæpum 56 milljörðum króna í rúma 182 milljarða króna á einu ári.