Danir keyptu fleiri raf­bíla en nokkru sinni fyrr á síðasta ári en á sama tíma markaðs­hlut­deild Tesla nærri helmingaðist. Sala félagsins í Dan­mörku dróst saman um 1,5 milljarða danskra króna milli ára. Tekjur Tesla Motors Den­mark námu 3,8 milljörðum danskra króna í fyrra, saman­borið við 5,3 milljarða árið áður. Sam­drátturinn nam 28% og heldur þar með áfram viðsnúningi frá met­árinu 2023, þegar tekjur félagsins í Dan­mörku voru 8,1 milljarður danskra króna. Í árs­reikningi félagsins segir að af­hendingar hafi verið undir væntingum þrátt fyrir mikinn vöxt á danska raf­bíla­markaðnum. Það er at­hyglis­vert í ljósi þess að markaðsaðstæður ættu að hafa verið hag­felldar Tesla. Nýskráningar fólks­bíla í Dan­mörku jukust um tæp 7% í fyrra og raf­bílar voru 68,5% allra nýskráninga. Tesla seldi 9.456 bíla í Dan­mörku á árinu og var markaðs­hlut­deildin 5,6%. Árið áður var hlut­deildin 9,3%. Hagnaður eftir skatta nam 43,8 milljónum danskra króna en var 61,5 milljónir árið áður. Félagið vísar meðal annars til fram­leiðslu­vanda og seinkunar á upp­færðri út­gáfu Model Y, sem hefur verið mikilvægasta gerð Tesla á danska markaðnum. Model Y var þriðji mest seldi bíllinn í Dan­mörku í fyrra, með 7.672 selda bíla, en hlut­deild bílsins af heildar­markaðnum lækkaði úr 6,1% í 4,2%. Sam­keppnin hefur einnig harðnað veru­lega. Evrópskir bíla­fram­leiðendur, meðal annars Volkswa­gen-sam­stæðan og Stellantis, hafa sótt fram á raf­bíla­markaði og kín­verskir fram­leiðendur hafa bætt í fram­boð sitt. Tesla stendur þar höllum fæti að einu leyti: vörulínan er þröng. Félagið hefur ákveðið að hætta sölu á Model S og Model X í Dan­mörku og býður því í raun aðeins Model 3 og Model Y. Til saman­burðar er Volkswa­gen með sex raf­bíla­gerðir í boði. Þróunin er sér­stök í ljósi þess að Tesla átti stóran þátt í að koma raf­bíla­byltingunni af stað í Dan­mörku. Model S kom á danska markaðinn árið 2013 og síðar fylgdu Model 3 og Model Y, sem gerðu Tesla um tíma að ráðandi afli á markaðnum. Árið 2023 sló Tesla meira að segja 37 ára gamalt sölu­met Opel Kadett í Dan­mörku. Nú virðist for­skotið hins vegar hafa minnkað hratt. Danir eru áfram raf­bílaóðir, en þeir eru ekki lengur jafn bundnir Tesla og áður. Tesla gerir þó ráð fyrir við­spyrnu á þessu ári. Í árs­reikningnum segir að félagið búist við „veru­legum bata“ árið 2026. Mark­miðið er að af­henda 13 til 14 þúsund bíla í Dan­mörku, sem jafn­gildir 40 til 45% aukningu frá síðasta ári. Upp­færð út­gáfa Model Y virðist þegar hafa styrkt söluna. Á fyrstu sex mánuðum ársins seldi Tesla 1.750 bíla í Dan­mörku, meira en tvöfalt fleiri en á sama tíma­bili í fyrra, sam­kvæmt tölum Mobility Den­mark. Þrátt fyrir það er ljóst að staða Tesla í Dan­mörku hefur breyst. Raf­bíla­markaðurinn vex hratt, en vöxturinn dreifist nú á fleiri fram­leiðendur. Fyrir­tækið, sem eitt sinn var nánast sam­heiti við raf­bíla­væðingu í Dan­mörku, þarf nú að keppa á mun þétt­setnari markaði.