Hlutfall lána Landsvirkjunar sem eru með ríkisábyrgð hefur lækkað jafnt og þétt síðustu ár. Landsvirkjun mun síðar í mánuðinum greiða upp síðasta lánið sem er með ríkisábyrgð og mun þá eitt bera ábyrgð á skuldum sínum. Í dag er Landsvirkjun með sterkan efnahagsreikning þar sem markvisst hefur verið unnið að því að greiða niður skuldir. Þá hafa vaxtakjörin batnað til muna. Í lok fyrsta ársfjórðungs 2026 námu nettó skuldir Landsvirkjunar 659 milljónum dala en skuldsetning var 1,7 sinnum rekstrarhagnaður fyrir afskriftir. Til samanburðar var skuldsetningin meira en tíföld EBITDA fyrir tveimur áratugum síðan. Bróðurparturinn af lánsfjármagni Landsvirkjunar kemur í dag frá Bandaríkjunum, enda gerir fyrirtækið upp í bandaríkjadal. Í maí síðastliðnum gaf fyrirtækið út græn skuldabréf á bandarískum skuldabréfamarkaði að fjárhæð 220 milljónir dala, sem samsvarar um 27 milljörðum íslenskra króna. Útboðið var stækkað úr 180 milljónum dala og var eftirspurn rúmlega fjórföld. Fjármagnið verður nýtt til virkjanaframkvæmda Landsvirkjunar, meðal annars við Vaðölduver, fyrsta vindorkuver landsins. „Af því að við erum með góða lánshæfismatseinkunn og við erum með endurnýjanlega orkuvinnslu, þá er mikil eftirspurn eftir því að lána í slík verkefni. Við sjáum fram á góð tækifæri þar í fjármögnun á komandi árum,“ segir Rafnar Lárusson, fjármálastjóri Landsvirkjunar. Ítrekað hefur verið bent á að aukin orkuvinnsla sé undirstaða hagsældar á komandi árum. Rafnar segir nauðsynlegt að fyrirtækið hafi burði til þess að ráðast í framkvæmdir og koma með orku inn á kerfið, þannig að nýir aðilar sem koma til landsins með störf og annað geti fundið fótfestu. „Sterkur efnahagsreikningur skiptir miklu máli og það eykur samkeppnishæfni Íslands að losna við ábyrgðirnar, hækka lánshæfismat, og bæta vaxtakjör,“ segir Rafnar. 183 milljarða fjárfestingar Nokkur stór verkefni eru framundan hjá Landsvirkjun. Framkvæmdir standa yfir við Vaðölduver, fyrsta vindorkuver landsins, og er gert ráð fyrir að þeim ljúki á næsta ári. Þá er unnið að stækkun Sigöldustöðvar, sem áætlað er að ljúki árið 2029, og undirbúningur hafinn fyrir byggingu Hvammsvirkjunar, sem gert er ráð fyrir að verði tekin í gagnið árið 2030. Tveir virkjunarkostir til viðbótar eru síðan á áætlun næstu fimm árin. Áætlaðar fjárfestingar Landsvirkjunar fyrir árin 2026-2030 nema samanlagt 183 milljörðum króna, þar af eru 157 milljarðar vegna nýrra virkjana. Þrátt fyrir umfangsmiklar fjárfestingar tekur Rafnar fram að Landsvirkjun hafi áfram svigrúm til að greiða út myndarlegan arð til eiganda síns, ríkisins. Nánar er fjallað um málið í Viðskiptablaðinu . Áskrifendur geta lesið fréttina í heild hér .