Sam­herji stendur að stofnun nýs átaks­sjóðs sem fengið hefur nafnið Sam­heldni. Sjóðnum er ætlað að styðja við inn­viða­fjár­festingar hjá aðilum sem sinna með­ferðarúrræðum fyrir fólk í fíkni­vanda hér á landi. Sam­herji mun leggja sjóðnum til 20 milljónir króna á ári næstu fimm árin, eða sam­tals 100 milljónir króna. Stefnt er að því að fá ís­lenskt at­vinnulíf til liðs við verk­efnið þannig að sjóðurinn geti út­hlutað yfir 300 milljónum króna til þriggja verk­efna sem þegar hafa verið valin. „Við vildum koma inn með myndar­legum hætti en því miður er þörfin svo gríðar­leg að fleiri þurfa að leggjast á árarnar,“ segir Bald­vin Þor­steins­son, for­stjóri Sam­herja. Bald­vin segir Sam­herja hafa í gegnum tíðina fundið fyrir því í eigin rekstri hversu djúp­stæð og eyði­leggjandi fíkni­vanda­mál geti verið. Fyrir­tækið hafi reynt að styðja starfs­fólk og fjöl­skyldur þess þegar slík mál hafi komið upp, en nú sé mark­miðið að gera það með form­legri og víðtækari hætti. „Í nálægðinni við starfs­fólkið finnum við hvað þessi mál eru átakan­leg og hversu harka­lega þau reyna á alla sem þeim tengjast,“ segir Bald­vin. Hann segist vonast til þess að öflug fyrir­tæki og fólk í ís­lensku at­vinnu- og þjóðlífi taki þátt í átakinu með fram­lögum næstu fimm árin. Þrenn mikilvæg verk­efni í forgang Sam­heldni hefur þegar valið þrjú verk­efni sem eiga að njóta stuðnings úr sjóðnum. Mark­miðið er að bæta aðstöðu og þjónustu við fólk í fíkni­vanda og fjöl­skyldur þeirra. Fyrsta verk­efnið snýr að SÁÁ og stuðningi við fjöl­skyldur og ung­menni. Þar á að bæta um­gjörð í kringum fjöl­skyldur þar sem börn eða ung­menni glíma við fíkni­vanda. Með skjótari og betri að­stoð sé hægt að hafa af­gerandi áhrif á framtíð ung­mennanna. Annað verk­efnið snýr að Hlað­gerðar­koti. Þar á að reisa smáhýsi í landi með­ferðar­stöðvarinnar fyrir ein­stak­linga sem hafa lokið með­ferð en þurfa áfram­haldandi stuðning áður en þeir fara að fullu út í sjálf­stætt líf. Heimilin hafa fengið heitið Brú út í lífið. Þriðja verk­efnið er ný álma við með­ferðar­heimilið í Krýsu­vík. Með henni fjölgar gistiplássum um 20. Í til­kynningu kemur fram að nú séu yfir 150 manns á biðlista eftir að komast í með­ferð í Krýsu­vík. Biskup verndari sjóðsins Guðrún Karls Helgu­dóttir, biskup Ís­lands, verður verndari Sam­heldni. Hún fagnar fram­takinu og segir kirkjuna þekkja vel af­leiðingar fíkni­sjúk­dóma og mikilvægi með­ferðarúrræða. „Ég mun því gera það sem ég get til þess að leggja þessu fram­taki lið,“ segir Guðrún. Stjórn Samheldni skipa: Anna María Kristinsdóttir, mannauðsstjóri Samherja. Einar Logi Vignisson, framkvæmdastjóri RÚV sölu. Jón Ólafur Halldórsson, formaður Samtaka atvinnulífsins. Sunneva Ósk Guðmundsdóttir, framleiðslustjóri ÚA. Valgeir Magnússon, stjórnarformaður Pipars/TBWA og stjórnarformaður Samheldni. Varamaður: Marta María Winkel Jónasdóttir. Þá hefur einnig verið opnaður vefurinn samheldni.is en þar er að finna helstu upplýsingar um átakið og þau verkefni sem áætlað er að styrkja.