Hildur Björnsdóttir borgarstjóri tekur fram að þrátt fyrir að til standi að skera niður víða í rekstri borgarinnar standi það alls ekki til að skerða lögbundna grunnþjónustu við íbúa borgarinnar. Þvert á móti eigi að bæta hana. Hún nefnir meðal annars málaflokk sem hefur staðið henni nærri, leikskóla­málin. Þau séu flóknari en margir geri sér grein fyrir en um landlægan vanda sé að ræða þar sem undirmönnun er algeng, skortur er á fagmenntuðum starfsmönnum og þjónustan dýrari en víðast hvar annars staðar á Norðurlöndunum. „Það munu þurfa að eiga sér stað einhverjar breytingar ef við raunverulega ætlum að koma með lausnir sem þjóna fjölskyldum á næstu árum,“ segir Hildur. Til lengri tíma sé markmiðið að efla leikskólastigið og fjölga þeim sem útskrifast úr leikskólakennarafræðum en í millitíðinni þurfi fjölbreyttari lausnir. Má þar meðal annars nefna sjálfstæða leikskóla eða vinnustaðaleikskóla auk þess sem vilji er til að búa til nýtt daggæslustig fyrir yngstu börnin. Einnig mætti skoða bætur eða heim­greiðslur vegna barna sem eru föst á biðlistum. „Við viljum ekkert öll það sama. Fjölskyldur hafa ólíkar þarfir og vilja ólíkar ­lausnir, og það er okkar hlutverk að bjóða upp á valkostina svo að fólk geti hannað sinn hversdag út frá sínum eigin þörfum,“ segir Hildur. Velferðarmálin eru þá stór málaflokkur sem skiptir gríðarlegu máli. Að sögn Hildar er þjónustustigið í mörgum tilfellum hærra en í öðrum sveitarfélögum. Hún segir æskilegt að greina hvað þetta aukna þjónustustig kosti Reykjavík, svo að hægt sé að leggja mat á það í framhaldinu. Eðlilegt væri ef sveitarfélögin samræmdu þjónustustig í velferðarmálum. Kerfið í Reykjavík sé þá að vissu leyti sérstakt. Megináhersla hafi verið lögð á að byggja óhagnaðardrifið húsnæði og bjóða bestu þjónustuna fyrir lægstu tekjuhópana. Lítið hafi verið hugað að þeirri verðmætasköpun sem þurfi svo að standa megi undir allri velferðinni. „Öll viljum við búa vel að þeim sem standa höllum fæti í samfélaginu. En einhvern veginn þarf að fjármagna alla velferðina. Við þurfum líka að laða að okkur fyrirtækin, þau sem skapa verðmætin og hæstu tekjuhópana sem greiða mestu skattana. Borgarsjóður þarf auðvitað á þessum hópum að halda svo að standa megi undir allri velferðinni. En hingað til hefur verið takmörkuð áhersla á að halda þessum hópum í borginni,“ segir Hildur. Einnig þurfi að fara yfir rekstur Félagsbústaða. Sjálfstæðisflokkurinn hafi meðal annars gagnrýnt matsaðferð félagsins í samstæðureikningi borgarinnar og fyrirkomulag þar sem uppbyggingar­aðilum sé gert að selja hluta íbúða sinna á kostnaðarverði til Félagsbústaða. „Það er margt sem þarf að skoða. Við viljum ná sjálfbærni í rekstri Félagsbústaða, ekki fara í einhverjar plástra­lausnir eins og fyrri meiri­hlutar hafa gert. Það þarf að fara ofan í saumana á þessum rekstri, tryggja að við séum þar að þjónusta fólkið sem er í sárustu neyðinni en styðja líka fólk til að komast út úr kerfinu ­aftur,“ segir Hildur. Nánar er fjallað um málið í Viðskiptablaðinu . Áskrifendur geta lesið fréttina í heild hér .