Framkvæmdastjórn Evrópusambandsins sektaði Google í dag um samtals 890 milljónir evra, jafnvirði um 130 milljarða króna, fyrir brot á reglum sambandsins um stafræna markaði (Digital Markets Act, DMA). Frá þessu er greint í Financial Times . Jafnframt gaf framkvæmdastjórnin fyrirtækinu 60 daga til að gera úrbætur, en að öðrum kosti gætu lagst á það dagsektir. Sektin Evrópusambandsins er tvíþætt. Google var annars vegar gert að greiða 460 milljónir evra fyrir að hafa veitt eigin þjónustum forskot í leitarniðurstöðum á kostnað samkeppnisaðila sinna, meðal annars á sviði verslunar, hótela, samgangna og íþrótta. Þá var fyrirtækið hins vegar sektað um 430 milljónir evra fyrir að takmarka möguleika appframleiðenda til að upplýsa notendur um tilboð eða beina þeim í aðrar dreifingarleiðir, svo sem appverslanir þriðju aðila. Framkvæmdastjórnin sagði Google þurfa að leggja fram tillögur að úrbótum innan 60 daga. Verði fyrirtækið ekki við kröfunum gætu reglubundnar dagsektir numið allt að 5% af meðalveltu þess á dag. Teresa Ribera, framkvæmdastjóri samkeppnismála hjá ESB, sagði ákvörðunina senda skýr skilaboð um að sambandið hygðist framfylgja reglum sínum af festu. Google hafnaði gagnrýninni og sagði túlkun framkvæmdastjórnarinnar á DMA-reglunum rýra gæði þjónustu fyrirtækisins og skaða bæði evrópsk fyrirtæki og neytendur. Þetta er ekki í fyrsta sinn sem Google sætir háum sektum í Evrópu. Á árunum 2017 til 2019 lagði framkvæmdastjórn ESB sektir á fyrirtækið sem samtals námu rúmlega átta milljörðum evra, vegna brota á samkeppnisreglum.