Davíð Freyr Jónsson, útgerðarstjóri hjá Royal Iceland, segir mikla möguleika fyrir íslenskt sjávarfang í Kína þar sem markaðir styrkist nú hratt. Bæst hafi verulega við listann yfir frystar sjávarafurðir sem flytja megi héðan til Kína. Risaskref sem opnar fyrir fyrstu grjótkrabbana „Listinn var mjög takmarkaður en í nóvember á síðasta ári kom viðauki sem leyfði í raun og veru innflutning á öllu villtu íslensku sjávarfangi sem er frosið inn til Kína. Það er risaskref sem opnar til dæmis tækifæri fyrir okkur til þess að fara að selja fyrstu grjótkrabbana til Kína,“ segir Davíð og upplýsir að Royal Iceland hafi einmitt verið að landa fyrsta samningnum um sölu af frosnum grjótkrabba í gámum inn á Kína. Listinn inn á Kína nú nánast ótæmandi fyrir frosnar vörur „Ég er búinn að bíða eftir þessu síðan 2012 þegar ég byrjaði að ýta við þessu þannig að það er alveg risaáfangi fjórtán árum síðar,“ segir Davíð. Að sögn Davíðs er það mikil framför að listinn inn á Kína sé nú nánast ótæmandi fyrir frosnar vörur. Frábært tækifæri „Nú er frábært tækifæri fyrir íslenskan sjávarútveg að reyna að spretta í auknum mæli inn á einn stærsta og mest vaxandi markað fyrir sjávarfang í heiminum. Næsta tækifæri í þessu er að það er að koma beint flug frá Kína til Íslands í haust. Það gefur þá möguleika fyrir lifandi og ferskan flutning inn á þennan markað í fyrsta skipti,“ segir Davíð, sem reyndar kveður þó eina hindrum eftir í veginum. Spenntir fyrir útflutningi á lifandi kröbbum „Við héldum að við gætum farið að flytja lifandi krabba beint inn á Kína í haust og vorum mjög spenntir en viðskiptafulltrúinn okkar úti í Kína segir að MAST eigi eftir að klára ferla til þess að við getum byrjað ferskan og lifandi innflutningi, sem var ákveðið högg,“ segir Davíð. Óvænt tíðindi Menn voru að sögn Davíðs orðnir mjög spenntir fyrir nýjum tækifærum með beinu flugi til Kína í haust. „En svo komumst við að því að það er þá annar listi. Það sem er frosið er alveg sérlisti og svo er sérlisti fyrir lifandi og ferskt,” útskýrir Davíð. Nú sé Matvælastofnun að fara yfir málin og skili síðan gögnum til Kína. Hann viti einnig til þess að Samtök fyrirtækja í sjávarútvegi séu að vinna í málinu. Aðild að ESB gæti sett strik í reikninginn Davíð segir íslenska utanríkisþjónustu eiga hrós skilið fyrir sinn þátt fram til þessa og kveðst vongóður um að úr rætist. Hann óttist hins vegar að eftir þjóðaratkvæðagreiðsluna um viðræður um aðild að Evrópusambandinu í lok ágúst geti komið babb í bátinn. Styrk Íslendinga segir Davíð meðal annars felast í fríverslunarsamningi okkar við Kína. Kanalar gætu lokast og aðrir opnast „Ef við færum inn í Evrópusambandið þá lokuðust þessir kanalar líklega alveg, því þá kæmi fullur tollur aftur á allar þessar krabbaafurðir. Og þá færi þetta forskot sem við þurfum á að halda til þess að geta náð einhverri fótfestu á markaðnum í Kína. Mikilvægt væri þá að skoða hvaða önnur tækifæri myndu opnast með Evrópusambandsaðild inn á markaði sem við höfum ekki aðgang í dag. Við vonumst til þess að stjórnvöld tryggi aðlögunartíma fyrir þessum hagsmunum, alveg sama hvað verður í utanríkismálum á komandi misserum,“ segir Davíð. Ísland eitt Vesturlanda með fríverslunarsamning við Kína Að sögn Davíðs yrði það eðlilega afar spennandi ef það kæmi flugvél hér reglulega, kannski vikulega, beina leið frá Kína. „Ég veit að sérstaklega Norðmenn hafa nýtt sér beina flugið frá Kína og það hefur aukið töluvert viðskipti af fersku sjávarfangi fyrir þá,“ segir Davíð. „Við erum þau einu meðal Vesturlanda sem höfum fríverslunarsamning við Kína sem er auðvitað ofboðslega verðmætur. Sjö til tólf prósent forskot á tollum er mjög mikill munur.“