Samtökin TaxPayers’ Alliance telja að skuldir breska ríkisins hafa farið yfir þrjár billjónir punda í fyrsta sinn. Matið byggist á þróun ríkisútgjalda, en ríkisstjórnin tók 2,7 milljörðum punda meira að láni en áætlað hafði verið á fyrstu þremur mánuðum fjárhagsársins. Þar vógu þyngst hærri vaxtagjöld og aukin velferðarútgjöld. Þetta kemur fram í frétt The Telegraph. Opinberar tölur sýna að skuldirnar námu 2,99 billjónum punda í lok júní. Júlítölur liggja ekki fyrir, en í sama mánuði í fyrra jukust nettóskuldir hins opinbera um rúma 20 milljarða punda. Það myndi nægja til að rjúfa þriggja billjóna múrinn. Breska fjárlagaráðið hafði áður spáð því að það gerðist í september. TaxPayers’ Alliance áætla að ríkið taki nú 4.270 pund að láni á hverri sekúndu, eða 369 milljónir punda á dag. John O’Connell, framkvæmdastjóri samtakanna, segir skuldasöfnunina stjórnlausa og hvetur John Healey fjármálaráðherra og Andy Burnham forsætisráðherra til að hemja útgjöld. Sjá einnig Telur yfir 50% líkur á skulda­kreppu í Bret­landi Það tók Bretland meira en 300 ár að safna fyrstu billjóninni, en skuldirnar fóru yfir þau mörk í febrúar 2010. Önnur billjón bættist við fyrir júní 2020, meðal annars vegna umfangsmikils stuðnings ríkisins við fyrirtæki og almenning í heimsfaraldrinum. Sú þriðja hefur síðan bæst við á aðeins sex árum, meðal annars vegna orkustyrkja og vaxandi velferðarútgjalda. Þriggja billjóna punda skuld jafngildir rúmlega 100.000 pundum á hvert heimili og um 95% af landsframleiðslu. Vaxtagjöld ríkisins verða samkvæmt spá rúmlega 130 milljarðar punda á þessu ári og yfir 160 milljarðar á ári undir lok áratugarins. Skuldirnar gætu nálgast 3,5 billjónir punda á árunum 2030-2031. Ríkisstjórnin segist munu fylgja reglum um ríkisfjármál sem feli í sér að skuldahlutfallið muni lækka. Stjórnarandstaðan sakar hins vegar bæði Verkamannaflokkinn og fyrri ríkisstjórnir Íhaldsflokksins um óábyrga skuldasöfnun.