Verði aðildarviðræðum haldið áfram við Evrópusambandið telja Samtök fyrirtækja í sjávarútvegi, SFS, nauðsynlegt að Ísland standi utan sameiginlegrar sjávarútvegsstefnu ESB. Í nýrri greiningu samtakanna segir að þótt Ísland myndi formlega taka þátt í mótun ákvarðana í sjávarútvegsmálum innan ESB þá gæti það ekki eitt og sér tryggt að þær ákvarðanir tækju mið af mikilvægi sjávarútvegs fyrir íslenskt efnahagslíf. Pólitísk fyrirheit komi ekki í stað varanlegra yfirráða Því sé nauðsynlegt fyrir íslensk stjórnvöld að tryggja að ákvörðunarvald um heildarafla, úthlutun aflaheimilda, aðgang að fiskimiðum og verndarráðstafanir verði í höndum Íslands. SFS telur þar að auki nauðsynlegt að Ísland fari með samningsforræði vegna deilistofna sem og að „reglan um hlutfallslegan stöðugleika, hagstæða upphaflega úthlutun eða pólitísk fyrirheit komi ekki í stað varanlegra yfirráða yfir auðlindinni“. Samtökin telja það því mikilvægt að fyrir liggi hvað felist í framsali yfirráða yfir fiskveiðiauðlindinni áður en kosið verði um áframhaldandi aðildarviðræður. Utanríkisráðherra gerir kröfu um „fullveldisyfirráð“ yfir sjávarútvegi Þorgerður Katrín Gunnarsdóttir utanríkisráðherra sagði í viðtali við Financial Times sem birtist í gær að íslensk stjórnvöld gerðu kröfu um „fullveldisyfirráð yfir öllum sjávarútvegi“ ef til aðildarviðræðna kæmi. ESB þyrfti að taka það til greina að Ísland væri „stórveldi í Evrópu“ þegar kemur að fiskveiðum. Ef sambandið gerði það ekki þá yrði erfitt fyrir Íslendinga að eiga í viðræðum, sagði Þorgerður við Financial Times.