Samtök fyrirtækja í sjávarútvegi, SFS, líta svo á að aðild Íslands að Evrópusambandinu gæti orðið til að skerða aflaheimildir landsins og færa störf úr landi. Samtökin segja jafnframt að aðild geti opnað fyrir erlendar fjárfestingar og eignarhald í íslenskum sjávarútvegsfyrirtækjum. Þannig myndi samkeppnisstaða íslenskra fyrirtækja breytast gagnvart niðurgreiddum sjávarútvegi innan Evrópusambandsins. Þetta er meðal þess sem fram kemur í nýrri greiningu SFS um mikilvægi innlendrar virðiskeðju sjávarútvegs. Forræði yfir stjórn fiskveiða gæti færst til ESB, þar á meðal vald til að ákveða heildarafla og skiptingu aflaheimilda. Þar segir einnig að minni aflahlutdeild Íslands og erlent eignarhald gætu lagst saman og aukið hættuna á að vinnsla, störf og verðmæti færðust úr landi. Ljóst þurfi að vera hvernig tryggja megi innlend yfirráð Samtökin segja að komi til inngöngu í Evrópusambandið þurfi að liggja fyrir hvernig tryggja eigi innlend yfirráð, áframhaldandi vinnslu og þann efnahagslega og samfélagslega ávinning sem verður til í allri virðiskeðjunni. SFS segja verðmætasköpunina í sjávarútvegi hérlendis ekki eingöngu byggja á því sem veitt sé heldur haldi fullvinnsla, markaðsstarfsemi, tæknivæðing og nýting hliðarafurða störfum, þekkingu og verðmætum innanlands. Í greiningunni segir einnig að hlutfall sjávarafurða í vöruútflutningi frá Íslandi sé mun hærra en í ríkjum Evrópu, 40 af hundraði samanborið við 6% í Noregi þar sem hlutfallið sé næsthæst. Íslendingar fullvinni mun stærri hluta aflans heima fyrir en Norðmenn auk þess sem sjávarútvegur standi undir allt að fimmtungi atvinnutekna á landsbyggðinni og jafnvel meira sums staðar. Um 1,6% vinnuaflans starfi við fiskveiðar hérlendis samanborið við hálft prósent í Króatíu, sem næst komi á eftir. SFS segir jafnframt að sjávarútvegur hafi styrkt áfallaþol Íslands í kórónuveirufaraldrinum með því að samþætt virðiskeðja fyrirtækjanna hafi brugðist hratt við og tryggt hátt hlutfall útflutningstekna. Ísland sé eina Evrópuríkið þar sem sértæk gjöld á sjávarútveg eru umfram opinberan kostnað vegna greinarinnar. Í öðrum Evrópuríkjum er sjávarútvegur niðurgreiddur, meðal annars með stuðningi við veiðar, vinnslu og nýsköpun.