Langtímavextir ríkisskulda í helstu hagkerfum heims náðu sínum hæstu gildum sem sést hafa í áratugi í dag. Áhyggjur af vaxandi verðbólgu, ríkisskuldum og aukinni skuldabréfaútgáfu vegna fjárfestinga í gervigreind hafa ýtt undir sölu á skuldabréfamörkuðum. Financial Times greindi frá því að ávöxtunarkrafa 30 ára bandarískra ríkisskuldabréfa hefði náð 5,34% í dag, sitt hæsta gildi síðan árið 2007, krafa skuldabréfanna var undir 5% í byrjun síðasta mánaðar. Ávöxtunarkrafa sambærilegra skuldabréfa í Þýskalandi nam 3,78%, þeirri hæstu frá evrukrísunni 2011, og 4,91% í Frakklandi, hæsta gildi síðan árið 2008. Í Bretlandi fór hún í 5,86% og í Japan í 4,16%, nærri sögulegu hámarki. Lántökukostnaður hefur hækkað frá upphafi átaka Bandaríkjanna og Írans fyrr á árinu. Hærra orkuverð hefur vakið ótta um langvarandi verðbólguskot á heimsvísu. Verð á Brent-hráolíu er um 91 dalur á tunnu og náði tveggja vikna hámarki í gær. Þung skuldastaða ríkja eykur einnig þrýstinginn. Skuldir Bandaríkjanna nálgast 40 billjónir dala og fjárfestar óttast að stjórnvöld þurfi að auka útgjöld til að verja fyrirtæki og heimili gegn háu orkuverði. Könnun Bank of America sýndi að fjárfestingar sjóðstjóra væru hlutfallslega minnst bundnar í skuldabréfum en fjárfestingar í hlutabréfum eru þær mestu síðan 2021. Salan á skuldabréfum og olíuverðshækkunin bitnuðu jafnframt á hlutabréfum. S&P 500-vísitalan lækkaði um 0,5% við opnun markaða og Nasdaq 100-vísitalan um 1,2%. Sérfræðingar Barclays segja þrjá meginþætti skýra þróunina: hallarekstur ríkissjóðs, skuldabréfaútgáfu tæknifyrirtækja vegna gervigreindar og breyttan kaupendahóp bandarískra ríkisskuldabréfa. Barclays spáir metútgáfu traustra fyrirtækjaskuldabréfa árið 2026, alls 1,9 billjónum dala, samanborið við 1,44 billjónir í fyrra. Munurinn á skammtíma- og langtímavöxtum hefur því aukist víða. Kína sker sig þó úr, enda hefur ávöxtunarkrafa þar lækkað vegna veiks hagvaxtar. Sjá einnig Gáfu út skulda­bréf með hæstu ávöxtunar­kröfu síðan 2001