Hagnaður Símans nam 269 milljónum króna á öðrum árs­fjórðungi ársins saman­borið við 537 milljónir á sama tíma­bili í fyrra og dróst því saman um 49,9%. Heildar­tekjur sam­stæðunnar námu 7.356 milljónum króna og jukust um 2,2% milli ára. EBITDA nam 1.599 milljónum og lækkaði um 16,9%, en EBITDA-hlut­fallið fór úr 26,7% í 21,7%. Rekstrar­hagnaður nam 620 milljónum saman­borið við 931 milljón í fyrra og dróst saman um þriðjung. María Björk Einars­dóttir for­stjóri Símans segir niður­stöðuna ásættan­lega en að stjórn­endur hefðu viljað sjá sterkari af­komu. „Af­koma annars árs­fjórðungs er ásættan­leg, þótt við hefðum viljað sjá hana sterkari,“ segir María. Aug­lýsingar vaxtar­broddurinn Tekjur af fjar­skipta- og sjón­varpsþjónustu stóðu saman­lagt í stað milli ára. Farsíma­tekjur jukust þó um 2,8% í 1.792 milljónir króna og tekjur af gagna­flutningi stóðu í stað í 2.085 milljónum. Sjón­varps­tekjur lækkuðu um 2,5% í 1.776 milljónir króna. Félagið bendir á að saman­burðar­fjórðungurinn í fyrra hafi að hluta inni­haldið enska boltann, en segir fjölda­tölur í sjón­varpi hafa náð jafn­vægi á þessu ári. Aug­lýsinga­miðlun var hins vegar helsti vaxtar­broddurinn. Tekjur þar jukust um 16,7%, úr 604 milljónum í 705 milljónir króna. Sveitar­stjórnar­kosningarnar í maí höfðu jákvæð áhrif á söluna. Vöru­sala jókst enn meira, um 20,2%, og nam 453 milljónum króna. María segir sölu í tengslum við sveitar­stjórnar­kosningarnar hafa gengið „vonum framar“, bæði í Sjón­varpi Símans og á um­hverfis­miðla­netinu Bill­board. Kostnaður jókst hraðar en tekjur Á móti hóf­legum tekju­vexti jókst kostnaður veru­lega. Kostnaðar­verð sölu hækkaði um 6% á fjórðungnum og rekstrar­kostnaður um 11,1%. Fram­legð dróst því saman um 3,2%, þrátt fyrir auknar tekjur. Að teknu til­liti til af­skrifta vegna kaupa á félögum jókst kostnaður um 7,4%, en kostnaður án af­skrifta um 9,2%. Félagið rekur hækkunina meðal annars til samnings­bundinna launa­hækkana, skipu­lags­breytinga, árangurs­tengdra greiðslna í aug­lýsinga­miðlun og vísitölu­tengds kostnaðar frá inn­viða­birgjum. „Eins og hjá öðrum fyrir­tækjum og heimilum í landinu hafa viðvarandi verðbólguþrýstingur og kostnaðar­hækkanir á breiðum grunni sett mark sitt á af­komuna,“ segir María. Hún segir gripið hafa verið til mark­vissra hag­ræðingarað­gerða í grunn­rekstri Símans á fjórðungnum sem eigi að byrja að skila sparnaði á síðari hluta ársins. Hagnaður jókst á fyrri árs­helmingi Myndin er önnur þegar horft er á fyrri árs­helminginn í heild. Heildar­tekjur fyrstu sex mánuði ársins námu 14.605 milljónum króna og jukust um 1,6%. Hagnaður nam 440 milljónum saman­borið við 349 milljónir í fyrra og jókst því um 26,1%. EBITDA fyrri árs­helmings nam hins vegar 2.961 milljón króna og lækkaði um 7,4%. Aðlöguð EBITDA nam 3.038 milljónum og dróst saman um 16,9%, en aðlagaður rekstrar­hagnaður lækkaði um 27,6% í 1.183 milljónir. Saman­burðurinn við fyrra ár litast meðal annars af sektar- og skaða­bóta­greiðslum á fyrri árs­helmingi 2025. Hand­bært fé frá rekstri nam 2.391 milljón króna á fyrri árs­helmingi, saman­borið við 2.291 milljón í fyrra. Hand­bært fé í lok júní nam rúmum tveimur milljörðum króna. Hækka af­komu­spána Síminn hækkar af­komu­spá sína fyrir árið vegna inn­komu Greiðslumiðlunar Ís­lands, sem varð hluti af sam­stæðunni 1. júlí. Nú er gert ráð fyrir EBITDA á bilinu 7,0 til 7,4 milljörðum króna, saman­borið við 6,8 til 7,2 milljarða áður. Spá um EBIT hækkar úr 3,2–3,6 milljörðum í 3,3–3,7 milljarða. Á sama tíma er fjár­festingar­spáin lækkuð og er nú gert ráð fyrir fjár­festingum upp á 3,2 til 3,4 milljarða króna í stað 3,4 til 3,7 milljarða áður. María segir minni fjár­festingarþörf meðal annars mega rekja til aukinnar nýtingar gervi­greindar í hug­búnaðarþróun og hagstæðari samninga um kaup á sjón­varps­efni. Hún segir fleiri tækifæri til að nýta gervi­greind í rekstrinum og að það verði ein af lykiláherslum félagsins á komandi misserum.