Utanríkisráðuneytið hefur uppfært mat sitt á því hver kostnaðurinn við aðild að Evrópusambandinu gæti verið. Matið er birt á vefsíðu stjórnarráðsins . Ráðuneytið telur að nettóframlag Íslands til ESB gæti verið um 10–15 milljarðar króna árlega, kæmi til aðildar. Uppfærslan felst í því hver kostnaðurinn væri að frádregnum kostnaði við EES-samstarfið. Í framsetningu sinni 21. júní sagði ráðuneytið að eftir frádrátt EES-gjalda gætu aðildargjöld Íslands verið á bilinu tveir til sjö milljarðar á ári. Ráðuneytið segir nú að að frádregnum kostnaði við EES-samninginn væru þau átta til þrettán milljarðar. Kostnaður við EES tveir milljarðar, utan samstarfsáætlana Skýringin á þessu er að í fyrri útreikningum var allur kostnaður við EES-samninginn dreginn frá en ekki þykir rétt að telja greiðslur til sameiginlegra sjóða til kostnaðar. Beinn kostnaður við rekstur EES-samningsins er átta milljarðar á ári en þar af fara sex milljarðar til sameiginlegra sjóða ESB. Hafa ber í huga að stór hluti þeirrar upphæðar kemur til baka í formi styrkja til vísindarannsókna og atvinnulífsins, svo dæmi sé tekið. Kostnaður við EES-samstarfið, utan sex milljarða framlagsins til samstarfsáætlana ESB, er tveir milljarðar. Utanríkisráðuneytið telur enn að raunframlag Íslands til Evrópusambandsins, kæmi til aðildar, yrði á bilinu 10–15 milljarðar. Í mati þess segir þó nú að að frádregnum kostnaði við EES-samninginn gætu þau verið 8–13 milljarðar. Hvaða forsendur gefur ráðuneytið sér við matið? Utanríkisráðuneytið horfir til raunframlaga, eða nettóframlaga, Finnlands til ESB við matið. Finnland er auðugt en bæði strjál- og harðbýlt land eins og Ísland. Raunframlag Finnlands til ESB var að meðaltali 0,21% af þjóðartekjum árin 2015–2024 og 0,24% árin 2020–2024. Við matið er miðað við að nettóframlag Íslands væri á bilinu 0,2–0,3% af vergum þjóðartekjum. Þær voru um 5.000 milljarðar árið 2025. Þannig fæst talan 10-15 milljarðar. Á móti kemur kostnaður vegna EES-samstarfsins, um 2 milljarðar á ári. Þannig fæst talan 8–13 milljarðar.