Bestu strandveiðivertíð frá upphafi strandveiðikerfisins lauk í síðustu viku. Kjartan Páll Sveinsson, formaður Landssambands smábátaeigenda, segist hafa átt gott sumar í veiðinni þótt hann sjálfur hafi ekki róið stíft. „Ég var búinn að segja það í vor að það góða við þessa formannsstöðu væri að ég hefði þá afsökun til að sleppa bræludögunum. Og ég stóð við það,“ segir Kjartan. Úr fimm eða sex milljörðum í níu milljarða Umtalsverð hækkun á fisk verði ásamt mun meiri kvóta og fleiri veiðidögum leiðir til mikillar verðmætaaukningar. „Það á nú bara eftir að reikna það út en við getum alveg reiknað með einhverjum níu milljörðum alls í aflaverðmæti. Þetta hefur yfirleitt verið fimm til sex milljarðar,“ segir Kjartan og bendir á að útflutningsverðmætið hafi aldrei verið svona mikið. Krókaveiðifiskur 15 til 20 prósent verðmeirti úti „Þannig að við erum að leggja ansi vel til þjóðarbúsins þetta árið,“ segir Kjartan og undirstrikar að krókaveiðifiskur sé úrvalsfiskur eins og rannsóknir hafi staðfest. „Hann er að seljast á um það bil 15 til 20 prósentum hærra verði út úr búð í Bretlandi en trollveiddur þorskur.“ Strandveiðimenn hafi haft á réttu að standa Kjartan segir reynsluna nú sýna að smábátasjómenn hafi á réttu að standa er þeir segi að sextán þúsund tonna kvóti dugi fyrir 48 strandveiðidaga. „Fimmtán þúsund tonn hefðu skilað okkur 48 dögum í ár. Ef við hefðum ekki haft þessar brælur í júlí hefðum við verið að horfa á sextán þúsund tonn,“ segir Kjartan. Talsmenn stórútgerðarinnar hafi sagt að 25 til 30 þúsund tonn þyrfti til 48 daga strandveiða. „Það sýnir sig núna að það er bara rakalaus hræðsluáróður.“ Framhaldið óskrifað blað Hvað varðar næsta sumar kveður Kjartan fátt í hendi enn þá. „En innviðaráðherra er búinn að gefa það út að hann ætlar að endurskoða bæði strandveiðikerfið sjálft og 5,3 prósenta kerfið,“ segir hann. Þessi mál verði rædd í september á sextán fundum svæðisfélaga landssambandsins um allt land. Óskað sé eftir því að innviðaráðuneytið lýsi því hvernig breyta eigi strandveiðikerfinu og hver markmiðin séu Erlendir miðlar áhugasamir Oddur Val SH 311 tekinn upm í Grundarfirði Eigandi Kjartan Sveinsson Mynd Sveinn Kjartansson Á sunnudaginn var Kjartan í Grundarfirði að taka bát sinn upp fyrir veturinn. Þar voru einnig fulltrúar frá þýska ríkissjónvarpinu, ARD, til að taka viðtal við hann sem formann Landssambands smábátasjómanna vegna komandi þjóðaratkvæðagreiðslu um aðildarviðræður við ESB. „Þau vilja vita hver afstaða smábátasjómanna er, bæði til þjóðaratkvæðagreiðslunnar núna í lok mánaðar og til mögulegrar inngöngu í Evrópusambandið,“ segir Kjartan, Áhugi erlendra fréttamiðla á málinu sé feiknar mikill. Áhuginn íslenskum smábátasjómönnum gríðarlegur í Evrópu „Ég er búinn að tala við franska ríkissjónvarpið, þýska ríkissjónvarpið, sænska ríkissjónvarpið, kanadíska ríkisútvarpið, Le Figaro í Frakklandi, dagblöð frá Sviss og Hollandi og Financial Times svo eitthvað sé upp talið,“ segir Kjartan. Áhuginn úti í Evrópu á íslenskum smábátasjómönnum sé gríðarlegur. Þjóðin þurfi að ákveða „Þetta er náttúrlega rosalega fallegt fyrirbæri, smábáta[1]sjómennska. Þannig að mér finnst svolítið skrítið að íslensk stjórnvöld í gegnum áratugina hafi ekki kveikt á því og nýtt sér okkur aðeins meira og betur. Það er rómantík í kringum þetta. Samtök fyrirtækja í sjávarútvegi segja að maður lifi ekki af rómantík en rómantík gefur bara ansi mikið af sér. Hún er stærsta útflutningsvara okkar í dag í gegnum ferðaþjónustuna,“ segir Kjartan. „Þjóðin sem þarf að ákveða þetta“ Um afstöðu landssambandsins til komandi þjóðaratkvæðagreiðslu segir Kjartan smábátasjómenn klofna eins og þjóðina alla. „Svona fljótt á litið sýnist mér þetta skiptast svona tiltölulega 50/50. Afstaða Landssambandsins hefur verið sú að við ætlum ekkert að skipta okkur af lýðræðinu og munum ekki beita okkur í þessari þjóðaratkvæðagreiðslu. Það er bara þjóðin sem þarf að ákveða þetta,“ segir Kjartan. Kjósi þjóðin að fara í aðildarviðræður segir Kjartan smábátasjómenn gera mjög stífa kröfu á að eiga sæti við samningaborðið. Fái sæti við samningaborðið „Ég held að það gæti styrkt samningsstöðu okkar að hafa litla manninn við samningaborðið. Það væri óðs manns æði að horfa fram hjá okkur. Sem formaður Landssambandsins gæti ég aldrei stutt samning sem veikir stöðu smábátasjómanna,“ segir Kjartan. Strandveiðisjómenn eru sem sagt á blússandi siglingu en Kjartan segist þó hafa áhyggjur af hækkandi verði á fiski. Hátt fiskverð áhyggjuefni „Það er náttúrlega rosalega gaman á meðan á þessu stendur en ef neytendur allt í einu segja að þetta sé komið út í tóma vitleysu og fara eitthvert annað er rosalega erfitt að ná þeim til baka. Við getum ekki gengið að því sem sjálfsögðum hlut að verðið haldist bara svona um alla ókomna framtíð,“ segir Kjartan. Að sögn hans þykir strandveiðimönnum miður að uppgangur þeirra hafi verið dálítið á kostnað annarra smábátasjómanna og þá sérstaklega línuveiða. Það sé alls ekki góð þróun. Áhyggjur af línuívilnunarbátum „Það þarf þá að finna einhverja aðra lausn en að taka af næstminnsta aðilanum til að láta þann minnsta fá. Línuívilnunin hefur verið skorin niður alveg niður að beini og ég hef mjög miklar áhyggjur af stöðunni. Við báðum um að þessi 200 tonn sem stóðu út af yrðu hreinlega sett í línuívilnun og bara nýtt núna,“ segir hann. Ráðherra hafi ekki enn svarað þessari tillögu sem hafi verið sett fram fyrir helgi. Í þessu samhengi gagnrýnir Kjartan einnig veiðiráðgjöf Hafrannsóknastofnunar. Kóngar í hásæti sem lesi upp úr sínu Excel-skjali „Þau sitja bara eins og kóngar í hásæti og lesa upp úr sínu Excel-skjali. Við erum mjög ósammála þeirra aðferðafræði í stofnmatinu,“ segir hann. Vel megi veiða meira. „Við erum náttúrlega ekki að gera neinar vísindalegar tilraunir en það sem Hafró er að segja rímar bara ekkert við það sem átta hundruð strandveiðimenn eru að segja. Það er meiri fiskur í sjónum en þeir halda fram, en þeir hafa sýnt að þeir eiga svolítið erfitt með að finna hann,“ segir Kjartan. Eyði hvata til að róa í tvísýnu Eftir banaslys í strandveiðinni í fyrra segir Kjartan menn upptekna af öryggismálunum. „Við þurfum að skoða í vetur hvort það sé einhvern veginn hægt að eyða þessum hvata sem er innbyggður í kerfinu að róa í tvísýnu,“ segir hann. Samgöngustofa eigi hrós skilið fyrir að hafa tekið á málum, bæði hvað varði fræðsluefni fyrir vertíð og varðandi björgunarbáta. Gott að vita af þeim „Ég hrósa líka Landhelgisgæslunni og Vaktstöð siglinga vegna þess að ég veit að þetta er þeirra mesti álagstími þegar allt að sjö hundruð bátar eru að kalla sig út á innan við tveimur tímum. Margir af þessum nýju björgunarbátum hafa sannað gildi sitt og það er mjög gott að vita af þeim,“ segir Kjartan Páll Sveinsson.