Ekkert verður af tollasamkomulagi milli Bandaríkjanna og Kanada að loknum nokkurra daga samningaviðræðum. Forsætisráðherrann Mark Carney sagði ekki hafa tekist að tryggja hagsmuni Kanada nægilega vel, skömmu áður en sá þriggja daga frestur rann sitt skeið sem Donald Trump Bandaríkjaforseti gaf. Umsvifalaust tók gildi 50 prósenta tollur á fjölda kanadískra vara sem fluttar eru til Bandaríkjanna, sem upphaflega átti að gerast á miðvikudag. Jamieson Greer, viðskiptafulltrúi Bandaríkjanna, segir Kanadamenn hafa hafnað áður samþykktu tilboði um að draga úr tollum meðal annars á stál og ál, bíla og timbur. Trump sjálfur hafði sagst bjartsýnn á samning enda væru þeir Carney mestu mátar. Carney segir skilmála sem bandarísku samningamennirnir báru upp á elleftu stundu ósanngjarna og óhagstæða auk þess sem þeir veki spurningar um hversu vel megi treysta þeim. Sambærilegir tollar verði lagðir á bandarískar vörur, sagði Carney: „Dal fyrir dal, til að vernda kanadísk fyrirtæki og vinnandi stéttir.“ Hann hefur ítrekað sagt samband ríkjanna að eilífu breytt og að Kanadamenn þurfi að draga úr þörfinni fyrir bandarískar vörur.