Velta jókst í flestum útflutningsgreinum í maí og júní þrátt fyrir að framleiðsla hafi ekki aukist samhliða. Á sama tíma eru sífellt skýrari merki um kólnun í innlendri eftirspurn, meðal annars í bílasölu, byggingarstarfsemi og valkvæðri neyslu. Þetta kemur fram í nýrri greiningu Landsbankans á tölum úr virðisaukaskattsskýrslum. Velta atvinnugreina jókst alls um 0,9% að raunvirði á milli ára í maí og júní en var nær óbreytt á fyrstu sex mánuðum ársins. Landsbankinn bendir á að aukin velta í útflutningsgreinum endurspegli ekki endilega meiri framleiðslu. Í sjávarútvegi og málmframleiðslu dróst útflutt magn saman en hærra afurðaverð vó upp á móti minna magni. Í málmframleiðslu hefur bilun í álverinu á Grundartanga dregið úr framleiðslu frá því í október í fyrra. Þrátt fyrir minna útflutt magn jókst velta greinarinnar í maí og júní vegna hækkunar heimsmarkaðsverðs á áli. Velta í tækni- og hugverkageiranum hefur jafnframt aukist töluvert. Þar munar einkum um uppbyggingu gagnavera og auknar útflutningstekjur af gagnavinnslu og hýsingu. Ferðaþjónusta sker sig hins vegar úr meðal útflutningsgreina. Velta þar hefur dregist saman, aðallega vegna minni veltu í flugsamgöngum eftir að Play hætti starfsemi. Komum ferðamanna hefur þó ekki fækkað að sama skapi. Valkvæð neysla dregst saman Innanlands eru jafnframt nokkur merki um hægari umsvif. Bílasala hefur dregist saman og veltuaukning í byggingarstarfsemi og mannvirkjagerð hefur ekki haldið í við almennt verðlag. Þá hefur þróunin í smásölu verið misjöfn. Vöxtur hefur einkum verið í dagvöru og lyfjum en velta hefur dregist saman í byggingarvöruverslunum og verslunum með fatnað og skó. Landsbankinn telur að þróunin geti verið til marks um rólegri einkaneyslu, þótt einnig kunni að skipta máli að stærri hluti neyslu Íslendinga fari fram erlendis. Nýir þjóðhagsreikningar fyrir annan ársfjórðung verða birtir í næstu viku og munu varpa frekara ljósi á hversu mikið hefur hægt á hagkerfinu.