Nýjustu gögn um korta­veltu heimilanna sýna að draga tekur úr inn­lendri neyslu. Þetta er annar mánuðurinn í röð þar sem korta­velta innan­lands dregst saman að raun­virði, á meðan net­verslun við útlönd heldur áfram að sækja í sig veðrið. Í nýrri Hag­s­já Lands­bankans, sem birt var í dag, kemur fram að greiðslu­korta­velta heimilanna jókst einungis um 0,8% á milli ára í marsmánuði, þegar tekið hefur verið til­lit til verðlags og gengis. Þessi litla aukning skýrist að miklu leyti af veltu er­lendis, en velta innan­lands dróst saman um 2,8% að raun­virði. Net­verslun vegur upp á móti færri ferðum At­hygli vekur að korta­velta Ís­lendinga er­lendis jókst um 13,5% á milli ára á föstu gengi. Þetta gerist þrátt fyrir að Ís­lendingar hafi farið í tæp­lega 4% færri utan­lands­ferðir í mánuðinum miðað við árið áður. Sér­fræðingar bankans túlka þetta sem skýrt merki um vaxandi um­svif í net­verslun, en korta­velta er­lendis nær bæði yfir kaup á ferðalögum og við­skipti við er­lendar vef­verslanir. Bíla­kaup í ládeyðu Sam­dráttinn í einka­neyslu má meðal annars rekja til minni eftir­spurnar eftir nýjum bif­reiðum. Eftir mikinn kraft í bílasölu á síðasta ári hafa hærri vöru­gjöld við áramót sett strik í reikninginn. Gögn fyrir fyrsta árs­fjórðung 2026 sýna 14% sam­drátt í nýskráningum bíla til ein­stak­linga miðað við sama tíma­bil í fyrra. Lands­bankinn spáir því að einka­neysla muni einungis vaxa um 0,4% á öllu þessu ári. „Við teljum að hátt vaxta­stig muni draga úr vexti einka­neyslu á næstu árum,“ segir í Hag­s­jánni. Þó er búist við að kraftur færist í at­vinnulífið þegar líður á spátímann og vextir taka að lækka, með spá um 2,0% vöxt einka­neyslu árið 2028. Sjá einnig Breytingarnar ýti undir „druslu­bíla­væðingu“ Hóf­legri launa­hækkanir í kortunum Hag­deildin spáir því jafn­framt að dregið hafi úr þenslu á vinnu­markaði. Eftir­spurn eftir starfs­fólki fer minnkandi og at­vinnu­leysi hefur aukist lítil­lega. Búist er við að laun hækki að jafnaði um 5,2% á árinu og tæp 5% árin þar á eftir, sem eru tals­vert hóf­legri hækkanir en sést hafa undan­farin ár. Þó ríkir óvissa um kjara­samninga, þar sem verðbólgu­spár benda til þess að verðbólga gæti reynst hærri en for­senduákvæði samninga segja til um, sem gæti hleypt ólgu í vinnu­markaðinn á ný.