Tólf nafn­lausir reikningar á spá­markaðnum Polymar­ket græddu saman­lagt um 330 þúsund dali á veðmálum um að Bandaríkin myndu ráðast á Íran fyrir laugar­dag. Samsvarar það um 41 milljón króna á gengi dagsins. Þetta kemur fram í greiningu Financial Times, sem segir að veðmálin hafi verið óvenju stór og sett fram með sláandi tíma­setningu dagana fyrir loftárásirnar. Polymar­ket er vett­vangur þar sem fólk veðjar á úr­slit at­burða og fara við­skiptin fram með raf­myntum. FT segir að hægt sé að rekja við­skipti á slíkum vett­vangi með því að skoða raf­mynta­veski sem eru nafn­laus auð­kenni í bálka­keðjunni. Þau gefa ekki upp hver stendur á bak við en sýna þó hvenær veðmál eru sett, á hvaða mörkuðum og hvaða greiðslur verða. Lögðu 67 þúsund dali undir Sam­kvæmt greiningu FT lögðu þessir 12 reikningar saman­lagt 66.993 dali undir í veðmál um að árás yrði gerð fyrir laugar­dag. Um helmingur veðmálanna var lagður undir sex klukkutímum áður en árásin hófst. Í greininni er bent á að slík tíma­setning, ásamt stærð veðmálanna, veki spurningar um hvort ein­hverjir hafi haft betri upp­lýsingar en markaðurinn al­mennt. „Ef ný veskja setja mjög stór veðmál á eitt mál, þá veltir maður fyrir sér hvers vegna,“ er haft eftir Matt Saincome, fram­kvæmda­stjóra gagna­veitunnar Unusu­al Whales. Hann tekur þó fram að fólk geti líka gert stór veðmál og haft rangt fyrir sér en mynstrið geti gefið til­efni til grun­semda um inn­herja­upp­lýsingar. FT bendir á að nafn­lausir spá­markaðir sem notast við raf­myntir geti orðið vanda­samir ef aðilar með að­gang að viðkvæmum upp­lýsingum fara að græða á þeim. Hernaðarað­gerðir séu sér­stak­lega viðkvæmar þar sem óvæntur tími að­gerðar er oft hluti af árangri. Í greininni er líka sagt frá því að á netinu sé til staðar menning þar sem not­endur leiti mark­visst að „mögu­legum inn­herjum“ og reyni að herma eftir veðmálum þeirra. Í Bandaríkjunum falla spá­markaðir undir af­leiðu­við­skipti og eru undir eftir­liti Commodity Fu­tures Tra­ding Commission (CFTC). Hins vegar segir FT að ólög­legt sé að eiga við­skipti á trúnaðar­upp­lýsingum. Lög­maðurinn Peter Malys­hev hjá Sidl­ey segir í greininni að ef opin­ber starfs­maður veðjaði á grund­velli upp­lýsinga sem hann fékk í starfi sínu væri hann að eiga við­skipti á „mikilvægum óopin­berum upp­lýsingum“. CFTC gaf ný­lega út ábendingu þar sem stofnunin ítrekaði að hún hefði „fulla heimild“ til að grípa inn í vegna ólög­mætra við­skipta­hátta á spá­markaði, þar á meðal mis­notkunar trúnaðar­upp­lýsinga, svika og markaðsmis­notkunar.