Við­skipti fyrir meira en 217 þúsund dali fóru fram á spá­markaðnum Polymar­ket um úr­slit þjóðar­at­kvæða­greiðslunnar um áfram­haldandi aðildar­viðræður við Evrópu­sam­bandið. Það jafn­gildir rúm­lega 26 milljónum króna miðað við gengi dagsins. Polymar­ket er svo­kallaður spá­markaður þar sem not­endur kaupa og selja samninga sem tengdir eru niður­stöðu til­tekins at­burðar. Verð samninganna er jafnan túlkað sem líkindi á niður­stöðunni. Ef samningur um ákveðna niður­stöðu gengur kaupum og sölum á 50 sentum jafn­gildir það því að markaðurinn meti líkurnar á henni um 50%. Þegar niður­staða liggur fyrir greiðir samningur réttrar niður­stöðu einn dal en samningur rangrar niður­stöðu verður verð­laus. Markaðurinn var virkur alla kosninganóttina og á köflum voru við­skipti nokkuð ör. Hreyfingarnar gáfu þannig ágæta mynd af því hvernig væntingar um niður­stöðuna þróuðust eftir því sem fyrstu tölur bárust og fylgdu nokkuð greini­lega breytingum á stöðunni í talningunni. Líkurnar á sigri já-hliðarinnar höfðu lengst af verið í kringum 45–50% fyrr í vikunni, en fóru lækkandi þegar nær dró kjör­degi. Á laugar­dagskvöld voru þær komnar niður í kringum 30%. Fyrstu tölur úr lands­byggðar­kjör­dæmunum bentu til for­skots nei-hliðarinnar og líkurnar á sigri já-hliðarinnar héldu áfram að síga. Myndin breyttist hins vegar skyndi­lega þegar fyrstu tölur bárust úr kjör­dæmum Reykja­víkur skömmu fyrir miðnætti. Þar var stuðningur við já-hliðina mun meiri og þegar Reykja­víkur­kjör­dæmin höfðu bæst við var staðan á landsvísu orðin mun jafnari. Polymar­ket brást hratt við. Verð á samningum um sigur já-hliðarinnar rauk á skömmum tíma upp í nærri 51%. Um stund verðlagði markaðurinn kosninguna því í raun sem hníf­jafna. Það reyndist skamm­vinnt. Þegar seinni tölur úr Reykja­víkur­kjör­dæmunum fóru að berast, ásamt seinni tölum úr Suðvestur­kjör­dæmi, breyttist myndin hratt á ný. Þá varð ljóst að for­skot já-hliðarinnar í Reykja­vík væri ekki nægi­lega mikið til að vinna upp for­skot nei-hliðarinnar annars staðar. Líkurnar á sigri já-hliðarinnar tóku þá mikla dýfu á Polymar­ket. Verð samninganna féll hratt og hélt áfram niður eftir því sem fleiri tölur styrktu stöðu nei-hliðarinnar. Þegar niður­staðan varð nánast ljós voru líkurnar komnar niður undir núll. Endan­leg niður­staða varð sú að 118.040 greiddu at­kvæði gegn því að aðildar­viðræður yrðu hafnar að nýju, eða 52,8%, en 105.339 sögðu já, eða 47,2%. Kjörsókn var 82,6%. Sveiflurnar á Polymar­ket sýndu þó vel um nóttina hversu hratt spá­markaðir geta tekið inn nýjar upp­lýsingar og hvernig spá­kaup­menn eru fljótir að bregðast við.