„Við teljum að ríkið sé á rangri vegferð með þennan sértæka byggðakvóta,“ segir Sigurður Ragnar Kristinsson, formaður byggðaráðs Langanesbyggðar. Ráðið getur ekki að óbreyttu svarað erindi innviðaráðuneytisins um áhrif byggðakvóta í sveitarfélaginu. Engar tölulegar upplýsingar hjá sveitarfélaginu Vegna endurskoðunar byggðakvótakerfisins sendi innviðaráðuneytið Langanesbyggð bréf í maí þar sem óskað er eftir mat á áhrifum almenna og sértæka byggðakvótans. Í bókun byggðarráðs frá í síðustu viku segir að engar tölulegar upplýsingar séu til hjá sveitarfélaginu varðandi reynslu af núverandi fyrirkomulagi sértæks byggðakvóta á Bakkafirði, sem er annar tveggja byggðakjarna Langanesbyggðar. Hversu margir eigi lögheimili búi á Bakkafirði Á heimasíðu Byggðastofnunar segir byggðaráðið vera samninga milli stofnunarinnar og einstakra samningsaðila en hvorki upplýsingar um eftirlit sem kveðið sé á um né nokkuð mat á árangri samninga um aflamark. Byggðarráðið óskar því eftir að fá afrit af árlegu árangursmati sem gera á samkvæmt samningi. Einnig er meðal annars óskað eftir upplýsingum um fjölda einstaklinga með lögheimili á Bakkafirði í heilsársstarfi við fiskvinnslu hjá samningsaðila. Árangursmat hvergi aðgengilegt Sigurður Ragnar Kristinsson, formaður byggðarráðs, segir að Langanesbyggð hafi reynt eftir bestu getu að svara erindi innviðaráðuneytins en rekið sig strax á að ekki séu til neinar tölulegar upplýsingar hjá sveitarfélögunum um hverju samningar um sértækan byggðakvóta skili. Árangursmat og eftirlit sem eigi að vera hjá Byggðastofnun sé hvergi aðgengilegt. Ríkið hafi trú á sértækum byggðakvóta „Það virðist vera ríkur vilji núna inni í ráðuneyti og stjórnkerfi til að færa aflaheimildir yfir í sérstaka kvótann á kostnað almenns byggðakvóta og línuívilnunar,“ segir Sigurður. Byggðarráðið hafi efasemdir um að sértæki byggðakvótinn skili því sem hann eigi að gera. Margir sitji eftir með sárt ennið „Við höfum talsverðar áhyggur af því að almenni byggðakvótinn verði aflagður því hann er eina svona byggðatengda aðgerðin sem smábátaeigendur almennt geta sótt í. Ef þetta fer allt í sérstakan byggðakvóta sitja margir, bæði smábátaeigendur og útgerðarmenn stærri báta, eftir með sárt ennið hér,“ segir Sigurður. Tímaskekkja sé að nota sértækan byggðakvóta til að byggja upp fiskvinnslu á afskekktum stöðum þar sem fiskvinnsla hafi löngu lagst af. Dauðadæmdur rekstur „Rekstur lítillar fiskvinnslu sem er að vinna nokkur hundruð tonn á afskekktum stað þar sem er fáránlega hár flutningskostnaður og menn kannski ekki með góð viðskiptasambbönd er einfaldlega dauðadæmdur,“ segir Sigurður. Annað gildi um smábátaútgerð sem sé algjörlega samkeppnishæf þar sem aðgangur sé að fiskmarkaði. Einnig þurfi að skoða hverjir séu að vinna í fiskvinnslum. Það sé oft fólk sem sé flutt inn til nokkurra mánaða. Nær sé að deila almennum byggðakvóta á smábáta „Það er ekki að auka byggðafestu á þessum stöðum. Við höfum ekki séð að það sé nein viðbót við íbúafjölda á Bakkafirði á heilsársgrundvelli út frá þessari vinnslu,“ segir Sigurður. Það séu 300 tonn sem fari á Bakkafjörð.„Það er ekkert verið að ráðast á þetta fyrirtæki en ef þessu væri deilt niður á tíu smábátaútgerðir þar sem væri skilyrði um að menn hefðu lögheimili og byggju á staðnum væri það með strandveiði og grásleppuveiðum alveg orðið afkoma fyrir eina fjölskyldu“ Hafnarnefndin sagði byggðakvóta eiga að stuðla að byggðafestu Fjallað var um málið í hafnarnefnd Langanesbyggðar í júní eins og Fiskifréttir sögðu frá þann 19. júní. Sagði þar að Langanesbyggð teldi að meginmarkmið byggðakvótakerfisins eigi að vera að stuðla að byggðafestu með því að skapa forsendur fyrir heilsársatvinnu, veiðum og vinnslu í viðkomandi byggðarlagi. Sé ekki bara til að tryggja hráefni til vinnslu „Markmið byggðakvótakerfisins eiga ekki aðeins að vera að tryggja hráefni til vinnslu heldur einnig að tryggja að verðmæti sem skapast við veiðar og vinnslu skili sér sem víðast inn í viðkomandi samfélag,“ sagði í umsögn hafnarnefndarinnar. Sértækur byggðakvóti hafi stuðlað að heilsársvinnslu á Raufarhöfn Þá sagði hafnarnefndin reynsluna af sértækum byggðakvóta vera misjafna. Á Raufarhöfn, sem er í sveitarfélaginu Norðurþingi, hafi úrræðið stuðlað að heilsársvinnslu í fiskvinnslu og þar með sterkari byggðafestu. „Á Bakkafirði hefur starfsemin að stærstum hluta verið bundin við hluta ársins og því haft takmarkaðri áhrif á byggðafestu,“ sagði hafnarnefndin hins vegar um stöðun á Bakkafirði.