Verðbólga á evru­svæðinu jókst í 3,3% í ágúst úr 2,9% í júlí, sam­kvæmt bráða­birgðatölum Eurostat. Hækkunin var í takt við væntingar hag­fræðinga og eykur líkur á því að Seðla­banki Evrópu hækki vexti á ný í næstu viku. Gert er ráð fyrir að bankinn hækki stýri­vexti um 0,25 pró­sentu­stig í 2,5%. Yrði það önnur vaxta­hækkun bankans á árinu og jafn­framt önnur hækkunin frá árinu 2023. Verðbólga hefur nú verið yfir 2% verðbólgu­mark­miði Seðla­banka Evrópu í sex mánuði sam­fleytt. Olli Rehn, seðla­banka­stjóri Finn­lands og meðlimur í bankaráði Seðla­banka Evrópu, sagði í sam­tali við Financial Times fyrir birtingu talnanna að bankinn mætti ekki sýna neina værukærð gagn­vart verðbólguþrýstingnum. Orku­verð hefur aukið þrýsting á verðlag á síðustu vikum. Olíu­verð hefur hækkað um meira en 15% frá byrjun ágúst þar sem siglingar um Hor­mússund hafa áfram verið tak­markaðar vegna stríðsins við Íran. Þróunin hefur aukið áhyggjur fjár­festa af því að verðbólga geti haldist há lengur en áður var talið og hefur jafn­framt þrýst upp ávöxtunar­kröfu ríkis­skulda­bréfa. Lántöku­kostnaður breska ríkisins fór á þriðju­dag í hæstu hæðir frá árinu 2008 og ávöxtunar­krafa japanskra ríkis­skulda­bréfa hefur ekki verið jafn há frá því á tíunda ára­tugnum. Seðla­banki Evrópu hækkaði vexti síðast í júní og varð þá fyrsti seðla­banki G7-ríkis til að hækka vexti vegna verðbólguáhrifa stríðsins. Evran tók litlum breytingum eftir birtingu verðbólgu­talnanna og stóð í um 1,159 dölum.