Runólfur Ólafs­son, fram­kvæmda­stjóri Félags ís­lenskra bif­reiða­eig­enda, segir það von­brigði að stjórn­völd hafi ekki fram­lengt tíma­bundna lækkun virðis­auka­skatts á elds­neyti. Tíma­bundinni lækkun virðis­auka­skatts lauk á miðnætti og hækkaði skatturinn úr 11% í 24% á ný. Að­gerðin hafði verið kynnt í apríl sem liður í að­gerðum ríkis­stjórnarinnar gegn verðbólgu. „Það veldur okkur von­brigðum að stjórn­völd hafi ekki fram­lengt þessa ráðstöfun því markaðurinn er um þessar mundir á engan hátt öðru­vísi en þegar þessi ráðstöfun hófst,“ segir Runólfur í sam­tali við mbl.is. Hann bendir á að meðal­verð á bensíni og dísilolíu á heims­markaði sé svipað nú og í vor og telur því hafa verið fullt til­efni til að fram­lengja skattalækkunina. „Við stjórnum ekki heims­markaðsverði og at­burðum úti í heimi en við stýrum verðinu hér með skatt­lagningu,“ segir hann. Sam­kvæmt mbl.is hefur elds­neytis­verð hækkað frá miðnætti í samræmi við hækkun virðis­auka­skatts. Bensín­lítrinn kostar nú víða um 224 til 262 krónur og dísillítrinn um 260 til 290 krónur. Runólfur telur ólík­legt að olíufélögin hækki verð um­fram skatta­breytinguna og vísar meðal annars til þess að félögin séu nú til skoðunar hjá Sam­keppnis­eftir­litinu.