Heiðar Guðjóns­son, fyrr­verandi for­stjóri Sýnar, vísar harð­lega á bug ásökunum Gavia Invest vegna sölu hans á 12,7% hlut í Sýn sumarið 2022 og segir þær „gjör­sam­lega frá­leitar“. „Ég get hrósað þeim fyrir að rógs­her­ferðin er vönduð,“ segir Heiðar í sam­tali við Við­skipta­blaðið. „En þessar ásakanir þeirra eru gjör­sam­lega frá­leitar.“ Gavia, sem nú er stærsti hlut­hafi Sýnar, hefur höfðað mál gegn Heiðari og félagi hans Úrsus ehf. vegna við­skiptanna. Félagið heldur því fram að Heiðar hafi búið yfir inn­herja­upp­lýsingum og haldið eftir upp­lýsingum um stöðu Sýnar þegar Gavia keypti hlut hans fyrir 2,2 milljarða króna á genginu 64 krónur á hlut. Heiðar segir sér­stakt að kaup­endur hafi tekið strax við stjórn félagsins eftir við­skiptin en leiti nú, fjórum árum síðar, eftir því að fá við­skiptin að hluta til baka. „Það sem er sér­stakt er að ég sel reksturinn, nýir aðilar taka strax við honum og ætla síðan fjórum árum seinna að fá endur­greitt eftir að hafa mis­farið með reksturinn á þeim tíma,“ segir hann. Árs­reikningur Controlant samþykktur fyrir sölu Málið snýr meðal annars að þróun svo­kallaðra IoT-tekna Sýnar. Sýn upp­lýsti Fjár­mála­eftir­lit Seðla­banka Ís­lands í febrúar um at­vik sem varða með­ferð upp­lýsinga innan félagsins á vor­mánuðum og sumarið 2022. Við yfir­ferð á eldri rekstrargögnum vaknaði spurning um hvort upp­færð innri rekstrar­spá vegna IoT-tekna hefði verið meðhöndluð í samræmi við reglur félagsins. Um svipað leyti seldi félag í eigu Heiðars hluta­bréf sín í Sýn. Heiðar bendir hins vegar á að langstærstur hluti IoT-teknanna hafi á þessum tíma tengst Controlant, sem gegndi lykil­hlut­verki í dreifingu Co­vid-bólu­efna Pfizer. „95% af IoT-tekjunum er Controlant,“ segir Heiðar. Hann bendir á að árs­reikningur Controlant hafi verið samþykktur 21. júní 2022, aðeins nokkrum vikum áður en hann seldi hlut sinn í Sýn í júlí. Að sögn Heiðars voru horfurnar sem stjórn Controlant lýsti á þeim tíma afar jákvæðar. „Í skýrslu stjórnar segir að tekjuáætlanir félagsins séu rosa­lega bjartar, þetta líti rosa­lega vel út og verði met­ár. Hvernig átti ég að vita eitt­hvað annað en stjórn Controlant?“ segir hann. Heiðar segir ásakanirnar jafn­framt fela í sér að hann hafi vís­vitandi komið röngum áætlunum á fram­færi. „Núna eru Reynir Grétars­son og Jón Skafta­son og þetta lið að segja að ég hafi vís­vitandi verið að leggja fram ein­hverjar falskar áætlanir,“ segir hann. Hann bendir einnig á að núverandi eig­endur hafi haft stjórn félagsins í fjögur ár frá við­skiptunum og að opin­berar yfir­lýsingar stjórn­enda eftir að hann lét af störfum hafi áfram gert ráð fyrir miklum vexti í IoT-tekjum. „Þeir eru búnir að hafa fjögur ár til að gera eitt­hvað í þessu. Þeir náttúru­lega stýra fyrir­tækinu allan þennan tíma. Ef þú lest yfir­lýsingar þáverandi for­stjóra og stjórnar þá er rosa­legur vöxtur fram undan í IoT-tekjum,“ segir Heiðar. Sýn hefur tekið fram að félagið sé ekki aðili að dóms­máli Gavia gegn Heiðari og hafi ekki tekið af­stöðu til þess hvort brot á lögum eða reglum hafi átt sér stað. Félagið hefur af­hent Fjár­mála­eftir­litinu gögn vegna málsins en ekki fengið niður­stöðu eftir­litsins. Ágreiningurinn kemur í kjölfar opin­berrar um­ræðu um rekstrar­vanda Sýnar þar sem núverandi stjórn­endur félagsins hafa áður vísað til ákvarðana sem teknar voru í tíð Heiðars. Eins og Viðskiptablaðið fjallaði um sagði Herdís Dröfn Fjeldsted, forstjóri Sýnar, í hlaðvarpsviðtali í vor að vandræði Sýnar hafi hafst í tíð Heiðars hjá félaginu, nánar tiltekið þegar hann var stjórnarformaður, í kjölfar kaupa félagsins á 365 miðlum árið 2017. Í viðtalinu fór hún fór hún einnig yfir hversu mikill samdráttur hefur orðið í IoT-tekjum félagsins. Hún sagði IoT-tekjur Sýnar hafa verið tæplega 1,6 milljarðar króna árið 2022 - að stórum hluta vegna samstarfs við Controlant sem spilaði lykilhlutverk við dreifingu á Covid-bóluefnum fyrir Pfizer - en í fyrra voru þær undir 300 milljónum króna. Heiðar svaraði þeirri gagn­rýni í júní og sagði þá sögu­skýringu vera „allt bara vit­leysu“. Sjá einnig Heiðar: „Þetta er allt bara vit­leysa“