Stjórnir Gildis-líf­eyris­sjóðs og Festu-líf­eyris­sjóðs hafa samþykkt samning um sam­einingu sjóðanna og var hann undir­ritaður í dag. Samningurinn verður lagður fyrir auka­árs­fundi beggja sjóða til stað­festingar í byrjun nóvember. Fundur Festu er fyrir­hugaður 4. nóvember og fundur Gildis daginn eftir, 5. nóvember. Gangi sam­einingin eftir verður til næst­stærsti líf­eyris­sjóður landsins með um 1.600 milljarða króna í eignum, miðað við stöðu sjóðanna í árs­lok 2025. Sam­einaður sjóður yrði jafn­framt sá fjöl­mennasti á landinu. Um 285 þúsund sjóðfélagar eiga réttindi hjá Gildi og um 116 þúsund hjá Festu, eða sam­tals rúm­lega 400 þúsund réttinda­hafar. Form­legar viðræður um mögu­lega sam­einingu sjóðanna hófust í byrjun júní. Stjórnir þeirra telja að sam­eining geti skapað marg­vís­legan ávinning fyrir sjóðfélaga, meðal annars með aukinni stærðar­hag­kvæmni, sterkari rekstrar­grund­velli og auknum burðum til tækni­legrar og stafrænnar þróunar. Þá telja stjórnirnar að stærri sjóður geti haft betri for­sendur til langtímaávöxtunar og styrkt getu hans til að veita sjóðfélögum þjónustu til framtíðar. Í til­kynningu kemur jafn­framt fram að sjóðirnir séu um margt sam­bæri­legir, meðal annars hvað varðar sam­setningu sjóðfélaga­hópa, réttinda­kerfi og trygginga­fræði­legar for­sendur. Það eigi að auðvelda samþættingu starf­seminnar verði sam­einingin samþykkt. Fyrir hönd Gildis undir­rituðu samninginn Perla Ösp Ás­geirs­dóttir for­maður stjórnar og Bjarn­heiður Halls­dóttir stjórnar­maður. Fyrir hönd Festu undir­rituðu Silja Eyrún Stein­gríms­dóttir for­maður stjórnar og Halldór Kristins­son vara­for­maður. Við undir­ritunina voru einnig Davíð Rúdólfs­son, fram­kvæmda­stjóri Gildis, og Gylfi Jónas­son, fram­kvæmda­stjóri Festu.