Fjármálaráðuneytið áætlar að skuldir ríkissjóðs aukist um 196 milljarða króna á árinu 2026 sem jafngildir hækkun skuldahlutfalls um 0,6 prósentustig af vergri landsframleiðslu. Í fjárlögum 2026 var gert ráð fyrir lækkun um 1%. Skuldahlutfall ríkissjóðs samkvæmt skuldareglu laga um opinber fjármál var um 36,9% í fyrra og hækkaði töluvert frá fyrra ári vegna uppgjörs á skuldbindingum ÍL-sjóðs (sem lækkaði skuldir ríkissjóðs í heild um nærri 6% af VLF). Í fjárlagafrumvarpi fyrir árið 2027 er áætlað að skuldahlutfallið muni hækka upp í 37,7% á þessu ári og fara upp í 37,8% á næsta ári. Áætlað er að skuldir ríkissjóðs, á mælikvarða skuldareglu, verði í lok næsta árs um 2.100 milljarðar króna. Í frumvarpinu segir að gangi forsendur frumvarpsins eftir muni eftir sem áður þurfa að bæta afkomu ríkissjóðs á komandi árum svo að lækka megi skuldahlutfall ríkissjóðs. Fjármálaáætlun gerir ráð fyrir að skuldahlutfallið taki fyrst að lækka árið 2029. „Það skýrist af því að lánsfjárjöfnuður ríkissjóðs, sem fram kemur í sjóðstreymi, er umtalsvert neikvæðari en heildarafkoman.“ Mynd tekin upp úr fjárlagafrumvarpinu. Halli á lánsfjárjöfnuður upp á 67 milljarða Lánsfjárjöfnuður endurspeglar fjármögnunarþörf ríkissjóðs, þ.e. að hve miklu leyti taka þarf lán á árinu og/eða ganga á handbært fé til að fjármagna starfsemina. Hann skýrir því, ásamt verðbótum sem bætast á höfuðstól verðtryggðra skulda, að verulegu leyti skuldaþróun á milli ára. Á næsta ári er gert ráð fyrir um 67 milljarða króna halla á lánsfjárjöfnuði, sem samsvarar 1,2% af VLF. Fjármálaráðuneytið segir að horfur um lánsfjárjöfnuð batni um rúmlega 12 milljarða króna frá forsendum fjármálaáætlunar, einkum þar sem afkoma næsta árs er áætluð betri en þar var gert ráð fyrir, auk þess sem dregið er úr áætluðu umfangi endurlána til ríkisaðila utan A1-hluta. Ráðuneytið segir að lánsfjárjöfnuður sé að jafnaði neikvæðari en heildarafkoman við framsetningu fjárlaga. Munurinn skýrist einkum af því að fjárlög eru sett fram á rekstrargrunni en sjóðstreymið á greiðslugrunni. Fjárþörf ríkissjóðs, sem samanstendur annars vegar af lánsfjárjöfnuði og hins vegar af afborgunum innlendra lána, nemur um 280 milljörðum króna í ár. Tveir flokkar innlendra ríkisbréfa eru á gjalddaga á árinu sem stóðu samtals í 166 milljörðum króna í upphafi ársins. „Útgáfa ríkisbréfa hefur gengið vel á árinu og nemur samtals 156 milljörðum króna í ágúst af 200 milljarða króna áætlaðri útgáfu ársins. Sveiflum í fjárþörf ríkissjóðs innan ársins hefur að mestu leyti verið mætt með útgáfu ríkisvíxla sem stóðu í 159 milljörðum króna í lok ágúst. Áætlað er að innlendar skuldir hækki um 196 milljarða króna árinu 2026 vegna nýrrar lántöku og verðbólgu.“