Aðeins helmingur íslenskra drengja býr yfir grunnhæfni í lesskilningi við lok grunnskólagöngu á móti 62% stúlkna. Þetta sýna nýjustu niðurstöður PISA. Munurinn á milli drengja og stúlkna í PISA er hvað mestur þegar kemur að lesskilningi, en minnkar þó frá könnuninni sem var lögð fyrir árið 2022. Þá mældust 53% drengja með grunnhæfni og 68% stúlkna. Munurinn er hvað minnstur þegar kemur að vísindum, og minnkar hann jafnframt á milli kannana. Þar mælast 63% stúlkna með grunnhæfni og 61% drengja. Í stærðfræðihlutanum eru niðurstöðurnar svipaðar nema að þar búa 64% drengja yfir grunnhæfni í samanburði við 61% stúlkna. Undir meðaltali OECD og Norðurlanda Niðurstöður PISA-könnunarinnar sem var lögð fyrir vorið 2025 voru birtar í morgun. Frammistaða Íslands er undir meðaltali OECD-ríkja og hinna Norðurlandaþjóðanna á öllum þremur sviðum rannsóknarinnar. Árangri íslenskra grunnskólabarna hrakaði í lesskilningi og stærðfræði um fjögur prósentustig en lækkunin í vísindum var ekki tölfræðilega marktæk. Ólíkt niðurstöðunum frá PISA-könnuninni 2022, þegar Ísland féll mest allra OECD-ríkja, var þróunin hér á landi nú sambærileg við þróunina í OECD-ríkjunum að jafnaði. Þá vekur athygli að hinar Norðurlandaþjóðirnar falla heilt yfir meira í könnuninni en Ísland og meðaltal OECD-ríkja. Þrautseigja mikil Námsárangur íslenskra grunnskólabarna hefur aldrei mælst jafn slæmur og í þessari nýjustu könnun. Þrátt fyrir það mælist Ísland meðal efstu þjóða í þrautseigju nemenda, félagslegum tengslum í skóla, sjálfstjórn í námi og stuðningi kennara að mati nemenda. Þá mælist einelti ekki mikið hér á landi í samanburði við önnur þátttökuríki.