Hundrað dagar eru síðan Hildur Björnsdóttir varð borgarstjóri þegar meirihluti Sjálfstæðisflokks, Viðreisnar og Framsóknarflokksins tók til starfa. Meirihlutinn birti lista yfir þrjátíu og eitt verkefni sem til stóð að klára innan hundrað daga. Verkefnin eru fjölbreytt og ná til ýmissa sviða. Þar á meðal er lengdur opnunartími frístundaheimila, 60 þúsund króna frístundakort fyrir eldri borgara, hætt við þéttingu í Grafarvogi og samtal hafið við ríkisstjórnina um endurskoðun samgöngusáttmálans. Í lok júlí var aðeins sjö verkefnum lokið en nú hefur verið hakað við hvert og eitt á vefnum Verkefnalisti.is . En hvernig tókst til? Fréttastofa óskaði eftir upplýsingum frá borginni um hvernig staðið var að hverju verkefni. Afrakstur sumra þeirra sést víðs vegar um borgina, líkt og fjölgun bekkja í borgarlandinu og fækkun aðskotahluta úr bílastæðum í miðborginni. Sum hafa verið samþykkt og þegar innleidd og önnur eru skilgreind sem áframhaldandi verkefni en tilteknum áfanga telst lokið. Afgreiðslu sumra þeirra telst lokið á verkefnalistanum þó að breyta þyrfti reglugerð til að hrinda endanlegu markmiði í framkvæmd og einu telst lokið með auglýsingu og „óformlegum samtölum“. Skólamálin í brennidepli Hildur Björnsdóttir borgarstjóri hefur sagt brýnt að ráðast í grunnskólamálin, ekki síst eftir að niðurstöður nýjustu PISA-könnunar sýndu verstu frammistöðu íslenskra grunnskólabarna hingað til . Meðal aðgerða ríkisstjórnarinnar til að bregðast við þessum niðurstöðum er símafrí í grunnskólum og það er líka ofarlega í huga borgarstjórnar. Grunnskóla- og frístundamál Setja mælanleg markmið um aukinn árangur í skólastarfi og stefna að skólakerfi í fremstu röð. Samþykkt á fundi skóla- og frístundasviðs 22. júní að Matsferill Miðstöðvar menntunar og skólaþjónustu verði lagður fyrir í borgarreknum grunnskólum einu sinni á ári í sérhverjum árgangi. Jafnframt verði tryggt að unnið verði markvisst með niðurstöður prófanna og þeim fylgt eftir með aðgerðum, með það að markmiði að hámarka líkur á námslegum framförum allra nemenda. Hefja tveggja ára tilraunaverkefni með símafrí í grunnskólum og mæla árangurinn. Samþykkt í borgarstjórn 16. júní sl. að fela skóla- og frístundasviði að innleiða símafrí í grunnskólum Reykjavíkur haustið 2026 og mæla áhrif þess á námsárangur og líðan barna og fagumhverfi í samstarfi við háskólasamfélagið. Tryggja óskertan opnunartíma frístundaheimila til klukkan 17:00 á virkum dögum. Samþykkt á fundi borgarráðs 2. júlí 2026. Vinna með barna- og menntamálaráðherra og kennurum að því að færa einkunnagjöf aftur á talnakvarðann 1-10. Borgarstjóri hefur átt gagnleg samtöl og fundi með menntamálaráðherra um framtíð grunnskólakerfisins og nauðsynlegar breytingar. Er þetta eitt þeirra mála sem rætt hefur verið. Er mikill vilji til samstarfs um skólakerfi í fremstu röð. Listinn er byggður á gögnum frá Reykjavíkurborg. Leikskóla- og daggæslumál Hefja viðræður við vinnustaði um stofnun leikskóla eða daggæslu fyrir börn starfsmanna. Auglýst hefur verið eftir áhugasömum aðilum til að reka leikskóla eða daggæslu á vinnustað. Óformleg samtöl hafa átt sér stað í kjölfarið en nýtt fyrirkomulag kallar á breytt regluverk. Unnið er að því í samvinnu við menntamálaráðuneytið. Sníða umgjörð um dagheimili, nýtt daggæslustig fyrir 12 til 30 mánaða börn í Reykjavík. Unnið hefur verið að nýrri umgjörð um dagheimili í Reykjavík. Hafa tillögur verið sendar menntamálaráðuneytinu en ný umgjörð kallar á reglugerðarbreytingu. Semja við einkaaðila um uppbyggingu hagkvæms húsnæðis fyrir leikskóla og dagheimili í Reykjavík. Í sumar var undirritað samkomulag við Reiti um uppbyggingu skólahúsnæðis fyrir Hjallastefnuna í Reykjavík, við Nauthólsveg. Reykjavíkurborg skuldbindur sig til að hraða deiliskipulagsvinnu og taka þátt í húsnæðiskostnaði í formi rekstrarframlags með skólastarfseminni. Nú stendur yfir vinna við að kortleggja lóðir þar sem unnt verður að auglýsa eftir einkaaðilum til að standa að uppbyggingu leikskólahúsnæðis. Nýlegt dæmi um vel heppnaða einkaframkvæmd er leikskólinn sem rís nú í Elliðaárdal. Listinn er byggður á gögnum frá Reykjavíkurborg. Um miðjan júní samþykkti borgarstjórn að fela skóla- og frístundasviði að innleiða símafrí í grunnskólum haustið 2026 og mæla áhrif þess á námsárangur og líðan barna. Markmiðið er tilraunaverkefni til tveggja ára í grunnskólum borgarinnar. Annað markmið borgarinnar var að setja mælanleg markmið um aukinn árangur í skólastarfi og stefna að skólakerfi í fremstu röð. 22. júní var samþykkt að matsferill Miðstöðvar menntunar og skólaþjónustu yrði lagður fyrir í grunnskólum borgarinnar í öllum árgöngum á hverju ári. Tryggja á að unnið verði markvisst með niðurstöðurnar og þeim fylgt eftir með aðgerðum. Gagnlegir fundir um nýjan talnakvarða Inga Sæland barna- og menntamálaráðherra hefur sagt að niðurstöður fyrsta matsferilsins, sem var lagður fyrir í vor, verði ekki birtar fyrr en á næsta ári þegar niðurstöður annars matsferils liggja fyrir. Nýr talnakvarði í einkunnagjöf í grunnskólum er einnig á lista meirihlutans. Samkvæmt gögnum borgarstjórnar hefur borgarstjóri átt gagnleg samtöl og fundi með ráðherra um framtíð grunnskólakerfisins og nauðsynlegar breytingar, þar á meðal talnakvarðann. Óformleg samtöl og tillögur sendar Tvö af þremur atriðum á lista borgarstjórnar í leikskóla- og daggæslumálum krefjast breytinga á reglugerð til að hrinda í framkvæmd. Það er annars vegar stofnun leikskóla eða daggæslu fyrir börn starfsmanna og hins vegar að sníða umgjörð um dagheimili, nýtt daggæslustig fyrir 12 til 30 mánaða börn. Samkvæmt upplýsingum frá borginni eru bæði mál unnin í samvinnu við menntamálaráðuneytið. Engar eiginlegar viðræður virðast vera hafnar um leikskóla eða daggæslu á vinnustað en borgin segir „óformleg samtöl“ hafa átt sér stað og að auglýst hafi verið eftir áhugasömum rekstraraðilum. Tillögur að nýrri umgjörð um dagheimili hafi verið sendar til ráðuneytisins. Samgöngur Hefja samtal við ríkisstjórnina og nágrannasveitarfélög um endurskoðun samgöngusáttmála höfuðborgarsvæðisins, fjármögnun hans og framkvæmdahraða. Borgarstjóri hefur átt fundi með bæjarstjórum nágrannasveitarfélaga og ráðherrum vegna samgöngusáttmálans. Framundan eru frekari fundahöld vegna samgöngusáttmálans, mögulegrar endurskoðunar og umræðu um fjármögnun hans. Veita 90% afslátt af gatnagerðargjaldi við gerð bílakjallara. Samþykkt í borgarráði 20. ágúst 2026. Stytta gjaldskyldutíma á bílastæðum í miðborginni í samvinnu við íbúa og fyrirtæki. Hefja vinnu við að greiða úr gjaldskyldufrumskógi bílastæða í miðborginni. Útfærslur þessara tveggja verkefna virðast haldast í hendur. Í upplýsingum borgarinnar er vísað í tillögu sem samþykkt var á borgarstjórnarfundi 16. júní. um að fela umhverfis- og skipulagsráði að útfæra umtalsverðar breytingar á bílastæðamálum borgarinnar. 2. september samþykkti umhverfis- og skipulagsráð útfærðar tillögur og samþykkt var að breyting á gjaldskyldu tæki gildi 1. október og bílastæðahús borgarinnar yrðu opin allan sólarhringinn frá og með 1. janúar 2027. Þessar breytingar eru fyrsta skrefið í heildarendurskoðun gjaldskyldukerfis og mun endurskoðun í heild sinni og útfærsla mun liggja fyrir í janúar 2027. Fjarlægja aðskotahluti úr bílastæðum í miðborg. Búið er að fjarlægja hjólaboga af Ingólfsstræti og hjólahús við Tjarnargötuna sem var í stæði, einnig hafa gróðurker verið fjarlægð úr bílastæðum í Hafnarstræti. Í lok mánaðarins verður svo búið að fjarlægja aðskotahluti úr bílastæðum við Kalda á Klapparstíg, Café Babalú á Skólavörðustíg og Bingó í bílastæðahúsinu við Skólavörðustíg. Unnið er að frekari útfærslum á fleiri stöðum. Afnema reglur um hámarksfjölda bílastæða við nýtt íbúðarhúsnæði og tryggja meiri sveigjanleika. Reglur um fjölda bíla- og hjólastæða í Reykjavík var breytt 2. september í umhverfis- og skipulagsráði, þar var afnumið hámark bílastæða við nýbyggingar og/eða endurnýjun byggðar. Endurskoða fyrirhugað deiliskipulag við Suðurlandsbraut. Tillaga var samþykkt á borgarstjórnarfundi þann 2. júní að endurskoða deiliskipulagið. Í framhaldinu hafnaði umhverfis- og skipulagsráð deiliskipulaginu formlega. Yfirstandandi er vinna við gerð nýs deiliskipulags sem tekur meira tillit til atvinnurekstrar á svæðinu og þeirra sem ferðast á bifreið. Listinn er byggður á gögnum frá Reykjavíkurborg. Atvinnulíf og menning Standa vörð um Suðurlandsbraut sem atvinnusvæði og endurskoða fyrirhugað deiliskipulag fyrir svæðið. Tillaga var samþykkt á borgarstjórnarfundi 2. júní að endurskoða deiliskipulagið. Í framhaldinu hafnaði umhverfis- og skipulagsráð deiliskipulaginu formlega. Yfirstandandi er vinna við gerð nýs deiliskipulags sem tekur meira tillit til atvinnurekstrar á svæðinu og þeirra sem ferðast á bifreið. Lækka gjöld fyrir afnot af borgarlandinu undir viðburðahald um 50%. Afgreitt í borgarráði 2. júlí 2026. Listinn er byggður á gögnum frá Reykjavíkurborg. Borið hefur á ágreiningi milli ríkis og sveitarfélaga varðandi atriði í samgöngusáttmála höfuðborgarsvæðisins og þar hefur Borgarlínan reynst sérstaklega umdeild. Hildur hefur sagt samgöngumál borgarinnar vera snúin. Hún sagði einnig í viðtali við Vísi að óvissa ríkti um fjármögnun hluta ríkisins í sáttmálanum og kallaði eftir því að hann verði endurskoðaður. Á verkefnalista borgarstjórnar var að hefja samtal um þetta og samkvæmt upplýsingum frá borginni hefur Hildur fundað með bæjarstjórum nágrannasveitarfélaga og ráðherrum. „Framundan eru frekari fundahöld vegna samgöngusáttmálans, mögulegrar endurskoðunar og umræðu um fjármögnun hans.“ Önnur samgönguverkefni á 100 daga lista meirihlutans snúa að miklu leyti að bílastæðum, fyrir utan eitt sem snýr að breytingu á deiliskipulagi Suðurlandsbrautar. Borgarstjórn samþykkti í sumar að endurskoða deiliskipulagið og unnið er að endurskoðun þess. Á borgarráðsfundi 13. ágúst var samþykkt að bæta nýjum lið við samþykkt um gatnagerðargjald í Reykjavík sem kveður á um að „vegna sameiginlegra bifreiðageymslna fyrir þrjár eða fleiri bifreiðar skal greiða 10% af fermetragjaldi þeirra húsa sem þær eiga að þjóna“. Þann 2. september samþykkti umhverfis- og skipulagsráð Reykjavíkur að afnema hámark á fjölda bílastæða við nýbyggingar og hækka viðmið um hversu mörg stæði ættu að fylgja íbúðum. Með breytingunni á einnig að skilja á milli kaupa og leigu á húsnæði og bílastæði, eftir því sem kostur er, svo kostnaður við stæðin falli á notendur. Húsnæði Treysta markaðnum til að byggja húsnæði sem eftirspurn er eftir. Þann 1. júlí sl. var samþykkt tillaga þess efnis að fela sviðinu að útfæra tillögur að breyttum stefnum og viðmiðum sem miða að því að uppbygging húsnæðis sé í takt við eftirspurn á markaði. Á fundi 2. september voru lagðar fram niðurstöður þess efnis að framvegis verði ekki sett stíf bindandi hlutfallsviðmið um stærðir og herbergjafjölda í deiliskipulag fyrir einstaka byggingareiti. Uppbyggingaraðilar hafi þannig aukið svigrúm við hönnun bygginga til að ákvarða íbúðasamsetningu með hliðsjón og eftirspurn og þörfum markaðarins. Einnig verður við helstu borgargötur og innan helstu miðsvæðis stuðla að, eftir því sem kostur er, virkum og aðlandi jarðhæðum. Ákveðin krafa um tiltekna atvinnu, verslunar og eða þjónustustarfsemi, í deiliskipualgi, skal aðeins sett þar sem staðsetning, eftirspurn og skipulagsleg markmið gefa sérstakt tilefni til. Afnema reglur um hámarksfjölda bílastæða við nýbyggingar og auka sveigjanleika . Veita 90% afslátt af gatnagerðargjaldi við gerð bílakjallara. Þessi tvö verkefni eru líka undir flokknum um samgöngumál. Falla frá fyrirhugaðri þéttingu í Grafarvogi og skoða ný tækifæri í samráði við íbúa. Á fundi borgarráðs þann 2. júlí sl. var tillögum um þéttingu sem stóð til að framkvæma í Grafarvogi hafnað og vísað aftur til umhverfis- og skipulagsráðs. Listinn er byggður á gögnum frá Reykjavíkurborg. Rýmri skilyrði um uppbyggingu Umhverfis- og skipulagsráð ákvað í ágúst að falla frá frekari vinnu við fyrirhugaða íbúðabyggð á túni við Sóleyjarima í Grafarvogi – svokölluðu Sóleyjartúni. Meirihlutinn sagðist leggja áherslu á að næstu skref í húsnæðisuppbyggingu í Grafarvogi yrðu mótuð í raunverulegu samráði við íbúa. Í byrjun september samþykkti umhverfis- og skipulagsráð að auka sveigjanleika við deiliskipulag með því að setja ekki stíf bindandi hlutfallsviðmið fyrir einstaka byggingarreiti nema sérstakar forsendur réttlæti það. Markmiðið er að auka svigrúm uppbyggingaraðila til að taka ákvarðanir í samræmi við markaðseftirspurn. Hreyfing og útivist Leyfa þeim sem reka íþrótta- og tómstundastarf að kynna starfsemi sína í grunnskólum borgarinnar. Samþykkt á fundi skóla- og frístundaráðs 31. ágúst, að breyta reglum um kynningar, auglýsingar og gjafir í skóla og frístundastarfi. Breytingarnar fela í sér skýrari heimild til að kynna uppbyggilegt starf í þágu barna og ungmenna, á forsendum skólastjórnenda og með hagsmuni barnanna að leiðarljósi. Kortleggja aðstöðumál íþróttafélaga og fjárframlög til þeirra svo forgangsraða megi verkefnum og tryggja jafnræði milli félaga. Skýrslan hefur verið unnin og verður kynnt í íþrótta- og útilífsráði í vikunni. Hún er trúnaðargagn sem stendur. Listinn er byggður á gögnum frá Reykjavíkurborg. Efri árin Endurvekja öldungaráð borgarinnar og efla samstarf við hagsmunasamtök eldra fólks. Samþykkt í borgarstjórn 2. júní 2026. Tryggja að bílastæði fylgi nýjum íbúðum sem byggðar eru fyrir eldra fólk. Reglur um fjölda bíla- og hjólastæða í Reykjavík sem var breytt 2. september í umhverfis- og skipulagsráði, þar var afnumið hámark bílastæða við nýbyggingar og/eða endurnýjun byggðar. Innleiða 60.000 kr. árlegt frístundakort með tekjutengingu fyrir 67 ára og eldri. Niðurstöður starfshóps um frístundakort var lögð fram í íþrótta og útilífsráði 28. ágúst og var þeim vísað til Öldungaráðs til umsagnar. Tillagan var svo afgreidd á fundi íþrótta- og útilífsráðs 9. september. Innleiða tilkynningavef vegna ofbeldis gagnvart eldra fólki í samstarfi við félagsþjónustuna. Tillaga var samþykkt á fundi velferðarráðs þann 13. ágúst. Fjölga bekkjum í borgarlandinu á sólríkum og skjólgóðum stöðum. Búið er að setja niður bekki á Kjalarnesi, að Fornhaga, við Suðurhlíð, í Elliðarárdal og að Barðarstöðum. Fleiri bekkir eru væntanlegir með haustinu. Áfram verður unnið að því að setja niður bekki á fjölförnum göngustígum í samráði í við Öldungaráð. Listinn er byggður á gögnum frá Reykjavíkurborg. Íþrótta- og útilífsráð afgreiddi í gær tillögu um 60.000 króna árlegt frístundakort fyrir 67 ára og eldri og í ágúst var samþykkt að innleiða tilkynningavef vegna ofbeldis gagnvart eldra fólki í samstarfi við félagsþjónustuna. Fjölgun bekkja í borgarlandinu féll einnig undir flokkinn „efri árin“ og hafa nýir bekkir þegar litið dagsins ljós á nokkrum stöðum og fleiri eru á dagskrá, samkvæmt upplýsingum frá borginni. Rekstur og umhirða Fækka millistjórnendum og draga úr yfirbyggingu í borginni. Ráðist hefur verið í skipulagsbreytingar á skrifstofu borgarstjóra og borgarritara, velferðarsviði og skóla- og frístundasviði. Höfðu breytingarnar í för með sér fækkun millistjórnenda og minni yfirbyggingu. Bæta umhirðu borgarlandsins. Hrein torg, fögur borg. Dæmi um aðgerðir sem hafa verið framkvæmdar undir þessu verkefni er sérstakt átak á ýmsum leiksvæðum, skólalóðum og hringtorgum og beðum. Einnig hefur borgin lagt áherslu á að bæta gæði almenningsrýma með fjölgun bekkja og vatnsfonta og öðrum aðgerðum sem gera borgarlandið snyrtilegra og aðgengilegra. Draga íslenska fánann að húni daglega við Ráðhús Reykjavíkur. Samþykkt í borgarstjórn 2. júní 2026 Færa nauðsynleg verkefni mannréttindaskrifstofu yfir á velferðarsvið og ráðast í skipulagsbreytingar á skrifstofu borgarstjóra. Samþykkt í borgarráði þann 25. júní 2026. Listinn er byggður á gögnum frá Reykjavíkurborg. Mikið hefur verið fjallað um hópuppsagnir hjá borginni sem eru liður í hagræðingu og því að draga úr yfirbyggingu. Tæplega 90 var sagt upp í lok ágúst, af þeim voru 32 boðin ný störf og 22 stöðugildi voru lögð niður. Í lok júní voru átján stöðugildi lögð niður og níu starfsmenn voru fluttir milli sviða. Öllum upplýsingafulltrúum Reykjavíkurborgar var sagt upp störfum. Fleiri uppsagnir í sjónmáli Uppsagnir í félagsmiðstöðvum og frístundaheimilum borgarinnar hafa verið harðlega gagnrýndar, meðal annars af stéttarfélögum og starfsfólki frístundamiðstöðva. Meirihlutinn hefur ítrekað haldið því fram að uppsagnir eigi ekki að bitna á þjónustu. Borgarráð samþykkti 25. júní að leggja niður Mannréttindaskrifstofu Reykjavíkurborgar . Á sama fundi var skrifstofa samskipta og viðburða einnig lögð niður og öllum upplýsingafulltrúum borgarinnar sagt upp. Hildur hefur sagt að frekari hagræðing sé framundan og að henni fylgi að öllum líkindum uppsagnir.