Donald Trump Bandaríkja­for­seti hefur mætt ýmsum hindrunum á ferlinum, en á golfs­væði hans í Doon­beg á Ír­landi er það agnar­smár snigill sem hefur reynst erfiður viður­eignar. Trump vill reisa þar stóran dans- og veislu­sal sem sonur hans, Eric Trump, hefur sagt að verði „sá glæsi­legasti í landinu“. En sam­kvæmt Financial Times hafa skipu­lags­yfir­völd og um­hverfis­sinnar áhyggjur af áhrifum fram­kvæmdanna á búsvæði snigilsins Verti­go angusti­or, sem er aðeins um tveir milli­metrar að lengd og nýtur verndar sam­kvæmt búsvæða­til­skipun ESB. Þetta er ekki í fyrsta sinn sem snigillinn stendur í vegi fyrir fram­kvæmdum Trumps á svæðinu. Eftir að hann keypti golf­völlinn árið 2014 vildi hann reisa grjót­vegg til að verja völlinn gegn land­broti, en áformin voru stöðvuð vegna hættu á skaða á búsvæði tegundarinnar. Trump hafði þá sjálfur sagst ætla að vera „vinur“ snigilsins. Nú hefur sama smádýr aftur blandað sér í fram­kvæmdag­leði for­setans. Um­hverfis­sinnar halda því fram að stofn snigilsins á svæðinu hafi minnkað veru­lega undan­farin ár. Einn and­stæðingur fram­kvæmdanna hefur jafn­framt vakið at­hygli á leður­blökum og varað við því að þyrlu­um­ferð að golfs­væðinu geti skapað þeim hættu. Ekki eru þó allir íbúar Doon­beg jafn áhyggju­fullir. Golf­mótið Irish Open fer fram á vellinum og heima­menn gera ráð fyrir að það skili um 10 milljónum evra inn í nær­sam­félagið. Stuðnings­menn fram­kvæmdanna segja varan­legan veislu­sal geta aukið um­svif og skapað störf allt árið. Írsk skipu­lags­yfir­völd hafa gefið Trump frest fram í lok október til að skila frekari upp­lýsingum um fram­kvæmdina, þar á meðal um áhrif á grunn­vatn. Ákvörðunar um hvort dans­salurinn fái að rísa er að vænta 25. nóvember. Þangað til heldur einn minnsti and­stæðingur Trumps áfram að tefja einn stærsta golf­draum hans.