Daði Már Kristófersson fjármálaráðherra brást harkalega við gagnrýni Hildar Sverrisdóttur, þingmanns Sjálfstæðisflokksins, á fjárlagafrumvarp ríkisstjórnarinnar í morgun og sakaði flokkinn hennar um að gangast ekki við þeirri ábyrgð sem fylgdi hallarekstri ríkissjóðs á liðnum árum. „Að gangast ekki við þeirri ábyrgð sem fylgir því að eyða peningum sem voru ekki til árum saman frá 2019-2025 - endalaus halli á rekstri ríkissjóðs, alveg sama hvernig áraði og láta síðan eins og sá reikningur endi einhvers staðar annars staðar en hjá íslensku þjóðinni,“ sagði Daði Már á fundi SFF í morgun. „Hvað er að þessu liði? Það er bara ein leið til að fjármagna ríkissjóð. Ætlaði hún að kaupa happdrættismiða? Ég bara botna ekkert í þessu.“ Hildur gagnrýndi fjárlagafrumvarpið harðlega á fundinum og sagði að það væri „ekkert erfitt að pússa elegant núll á blað og senda svo reikninginn fyrir því til heimilanna í landinu“. Hún nefndi hækkun bankaskattsins sem dæmi og sagði að sú skattheimta endi alltaf á heimilinum og fyrirtækjunum í landinu. Hildur sagði jafnframt að skuldabréfamarkaðurinn, sem væri alveg sama hvort Daði Már eða Bjarni Benediktsson væri fjármálaráðherra, hafi talið líklegt að fjárlagafrumvarpið myndi stuðla að hærri verðbólgu. „Það eitt og sér er áfellisdómur yfir þessu frumvarpi, því miður.“ Skömmu síðar sagði að Daði Már að það sem hafi pirrað sig mest af því sem kom fram á fundinum væru ummæli Hildar „eða það sem er á bak við hennar orð“. Hann furðaði sig á að gagnrýnin kæmi frá flokki sem bæri ábyrgð á hallarekstri liðinna ára. Hildur: Núverandi ríkisstjórn hefur bætt í hallann Hildur sagði að sér þætti ekkert sérstaklega maklegt að fjármálaráðherra líti fram hjá áhrifum Covid-faraldrinum og falli Wow Air í þessari söguskýringu. „Ríkissjóður var faktískt hallalaus – ekki [bara í frumvarpi] heldur niðurstaðan – árin 2016, 2017 og 2018. Man einhver hvað gerðist 2019? Heilt flugfélag hvarf. Man einhver hvað gerðist 2020? Jú, eitt stykki heimsfaraldur, svo stríð, svo jarðeldar. Beinn kostnaður hljóp á mörg hundruð milljörðum,“ sagði Hildur. „Undir lok síðasta kjörtímabils var þáverandi ríkisstjórn komin á rétta leið. Vextir voru á niðurleið og verðbólga var að fara niður þangað til að ný ríkisstjórn tók við og skipti um kúrs. Við vitum hvar við stöndum núna í þeirri á […] Síðustu tvö ár í tíð þessarar ríkisstjórnar, þá var bætt í hallann. Út af hverju? Út af einhverju innanhússpólitísku biksi sem er bara alltaf, alltaf verkefni stjórnmálamannanna.“ Hildur sagði að hún væri að sjálfsögðu hlynnt því að ríkið sé rekið með afgangi. Milljarður til og frá skipti hins vegar ekki höfuðmáli ef bregðast á sífellt við með aukinni skattheimtu. Hildur Sverrisdóttir, þingmaður Sjálfstæðisflokksins, gagnrýndi fyrirhugaða hækkun bankaskattins. © Eyþór Árnason (Eyþór Árnason) Eitthvað að í hagfræðiþekkingu flokkanna Daði Már sagðist ekki vera að deila um að hér hafi orðið áföll. Hann bætti þó við að milljarður hér og þar safnist fljótlega upp í 900 milljarða. „Það sem ég skil ekki er að þeir sem að tóku ákvarðanir um að fjármagna viðbrögðin með lánum halda að það þurfi ekki að borga þau til baka. Í hvaða heimi er það þannig? Og síðan núna með böggum hildar yfir því að reikningurinn falli á þjóðina - hvar í helvítinu átti hann að falla annars staðar þegar að ríkissjóður rekur sig á lánum?“ sagði fjármálaráðherra. „Það er eitthvað „fundamental“ að í hagfræðiþekkingu þessara flokka sem að halda að það sé hægt að skuldsetja ríkissjóð án neikvæðra afleiðinga fyrir almenning.“ Hildur greip þá aftur til máls og sagði að auðvitað væri hægt að skera meira niður í rekstri ríkisins. Jafnframt væri hægt að stuðla að aukinni verðmætasköpun og reyna þannig að stækka kökuna. „Það er ekki langt síðan að þáverandi stjórnvöld lækkuðu skatta yfir 300 milljarða á tíu ára tímabili. Og minnkuðu tekjurnar herra fjármálaráðherra, minnkuðu tekjurnar fyrir ríkissjóð? Nei.“ Daði Már skaut þá inn í: „Hér var enginn hagvöxtur.“ Daði: Mesta aðhald frá því eftir hrun Fyrr í umræðunum hafði fjármálaráðherra svarað gagnrýni á útgjaldavöxt ríkisins og rakti hann aukin útgjöld að mestu til heilbrigðiskerfisins og öldrunar þjóðarinnar. Eins hafi verið ákveðnir samningar sem hafi verið gerðir í aðdraganda síðustu kosninga sem hafi reynst mjög dýrir. „Ég ætla ekkert að draga dul á það að ég hefði viljað ná ennþá meiri árangri í niðurskurði. En 44 milljarðar, þetta er mesta aðhald sem sýnt hefur verið frá því eftir hrun. Þannig að kvarta yfir því að við göngum ekki nógu langt þar, ja það þarf þá hérna töluverðar sársaukafullar ákvarðanir til viðbótar.“ Nálgast má pallborðsumræður með fjármálaráðherra og þingmönnum Sjálfstæðisflokksins, Miðflokksins og Samfylkingarinnar frá 1:50:20. Finna má orðaskipti Daða Más og Hildar frá 2:04:18.