Bryndís Haraldsdóttir þingmaður Sjálfstæðisflokksins hefur lagt fram fyrirspurn á þingi um Bókasafnssjóð höfunda. Henni er beint til Loga Einarssonar menningar-, nýsköpunar- og háskólaráðherra. Í fjárlagafrumvarpi ríkisstjórnarinnar eru framlög til Bókasafnssjóðs skorin niður um rúmlega áttatíu milljónir. Þau voru 224,5 milljónir á síðasta ári en eru áætluð 142,3 milljónir í fjárlagafrumvarpi fyrir næsta ár. Þetta hafa meðal annarra barnabókahöfundar gagnrýnt, fjölmiðlar fjölluðu til dæmis um harðorða Facebook-færslu Gunnars Helgasonar. PISA-niðurstöur sýni að styðja þurfi útgáfu barnabóka Spurð hvort hún hafi áhyggjur af stöðu barnabókaútgáfu og lesskilningi barna svarar Bryndís því til að allir stjórnmálamenn og þjóðin í heild ættu að hafa áhyggjur. „Við höfum bestu sönnunina fyrir því í nýútkomnum PISA-niðurstöðum, við sjáum skýrt að börnin okkar eru ekki að lesa nóg. Og ef börnin okkar eru ekki að lesa nóg þá hlýtur ein af þeim aðgerðum sem við getum brugðist við með að vera að hvetja til, stuðla að og styrkja barnabókaútgáfu.“ Fyrirspurn Bryndísar er í þremur liðum. Hún vill vita hvort ráðherra telji núverandi fyrirkomulag Bókasafnssjóðs sanngjarnt og eðlilegt, hvernig ráðherra vilji stuðla að aukinni útgáfu bóka á íslensku og hver framtíðarsýn ráðherra er fyrir sjóðinn. Fyrirspurnin í heild: Fyrirspurn til menningar-, nýsköpunar- og háskólaráðherra um Bókasafnssjóð höfunda. Telur ráðherra eðlilegt og sanngjarnt að ríkið geti einhliða ákveðið árlegt endurgjald til höfunda og annarra rétthafa fyrir afnot verka þeirra á bókasöfnum, án samninga eða tengingar við hlutlæga mælikvarða á borð við fjölda útlána, verðlag eða launaþróun? Hvernig hyggst ráðherra stuðla að aukinni útgáfu bóka á íslensku, sérstaklega íslenskra barna- og ungmennabóka, og tryggja um leið að höfundar, þýðendur og myndhöfundar fái sanngjarnt endurgjald fyrir afnot verka sinna á bókasöfnum? Hver er framtíðarsýn ráðherra fyrir Bókasafnssjóð höfunda? Kemur til greina að breyta lögum eða fyrirkomulagi sjóðsins þannig að fjármögnun hans verði fyrirsjáanlegri, byggð á skýrum viðmiðum og taki eðlilegum breytingum með hliðsjón af útlánum, verðlagi eða launaþróun? Skriflegt svar óskast. Hætt við niðurskurð í fyrra Það var líka lagður til niðurskurður til sjóðsins í síðasta fjárlagafrumvarpi en svo bætt við auknu framlagi í meðförum þingsins. Bryndís lagði líka fram fyrirspurn á síðasta ári og í svari ráðherra þá kom fram að hann hefði beitt sér fyrir því að framlag vegna greiðslna fyrir afnot á bókasöfnum yrði hækkað verulega og að meiri hluti fjárlaganefndar hefði lagt til að framlagið yrði aukið um 80 milljónir. „Þess vegna fannst mér það skjóta sérstaklega skökku við að núna aftur birtist fjárlögin eftir þessa umræðu sem við áttum í kringum fjárlögin í fyrra,“ segir Bryndís. Tilefni til að ræða framtíðarsýn Bryndís telur ástæðu til að taka upp umræðu um gildi Bókasafnssjóðs og stuðning við íslenska bókaútgáfu. „Ég vona að við fáum þá svona afstöðu ráðuneytisins til þess hvernig umgjörð við viljum hafa um þennan málaflokk.“ Ráðherra hefur sagt að í fjárlagafrumvarpinu sé einnig gert ráð fyrir 150 milljónum sem verja eigi til eflingar íslenskri tungu, með sérstakri áherslu á börn og ungmenni. Til standi að hluti þeirra fjármuna fari í að styrkja Bókasafnssjóðinn og fleiri leiðir séu til skoðunar til að efla lestraráhuga barna og ungmenna. „Það er bara hið besta mál og ég hlakka til að fylgjast með því,“ segir Bryndís. „Ef ráðherra hefur einhverjar hugmyndir um að breyta þessu fyrirkomulagi þá hefur hann tækifæri til þess að útskýra það fyrir okkur en ég held að þetta sé þannig mál að við eigum að vinna þetta með stéttinni.“