Fyrirtækið Grænafl á Siglufirði og S-kóreska fyrirtækið Pomia undirrita í dag samstarfssamning um rafvæðingu strandveiðibátsins Oddverja S I76. Um fjölþjóðlegt samstarfsverkefni er að ræða þar sem íslensk og s-kóresk fyrirtæki taka höndum saman um að hefja rafvæðingu íslenska strandveiðiflotans með það fyrir augum að nota sömu lausn í S-Kóreu. Meðal íslenskra fyrirtækja verkefninu auk Grænafls eru HS Orka, Rafal og Slippurinn. Olíuvélin rifin úr Oddverja Kolbeinn Óttarsson Proppé, framkvæmdarstjóri Grænafls. Mynd/Gulli Stebbi Breyta á Oddverja svo hann gangi fyrir rafmagni. Verður olíuvélin rifin úr og batteríum komið fyrir. Kolbeinn Óttarsson Proppé, framkvæmdarstjóri Grænafls, segir stórum áfanga náð. Verkefnið hafi verið lengi í undirbúningi en að nú færist það yfir á framkvæmdastig. Grænafl hafi verið í góðu samstarfi við fyrirtæki í S-Kóreu um hönnun og þróun á búnaði sem þurfi til að breyta minni skipum þannig að þau gangi fyrir rafmagni í stað olíu. Leið að hraðari orkuskiptum „Með því að breyta skipum sem þegar eru í notkun gefst færi á mun hraðari orkuskiptum en ef smíða þarf ný skip frá grunni. Þá er það bæði hagkvæmara og í anda hringrásarhagkerfisins að nýta það sem þegar er í notkun. Nú hefst framleiðsluferlið og við munum setja nýjan búnað í Oddverja á næsta ári. Rafvæðing íslenska strandveiðiflotans hefst með þessu,“ segir Kolbeinn. Dr. Go segir verkefnið mikilvægt Dong-Hun Go, sérfræðingur hjá Korea Maritime Institute. Mynd/Gulli Stebbi S-kóresk stjórnvöld taka þátt í verkefninu og Korea Maritime Institute, stofnun á vegum ríkisins sem meðal annars vinnur að stefnumótun fyrir s-kóresk stjórnvöld í málefnum sjávarútvegs, hefur utanumhald um verkefnið. Í svari frá Dr. Dong- Hun Go, sérfræðingi hjá KMI, segir hann verkefnið mjög mikilvægt, enda sé heildarlosun kolefnis á heimsvísu af fiskiskipum allt að 159 milljón tonn af koltvísýringi á ári. Bruni jarðefnaeldsneytis sé langstærsti einstaki þátturinn í losun gróðurhúsalofttegunda frá sjávarútvegi. Hann valdi jafnframt öðrum neikvæðum umhverfisáhrifum. Sjávarútvegur viðkvæmur fyrir loftslagsbreytingum „Áhrifa loftslagsbreytinga gætir nú þegar á hafsvæði með hækkandi sjávarhita, súrnun sjávar, breytingum á útbreiðslu fiskistofna og tíðari öfgaveðuratburðum. Sjávarútvegur er jafnframt meðal þeirra atvinnugreina sem eru hvað viðkvæmastar fyrir áhrifum loftslagsbreytinga,“ segir dr. Go. Orkuskipti fiskiskipaflotans séu því mikilvægur þáttur í að bregðast við þessari stöðu. „Sjávarútvegur er mjög háður jarðefnaeldsneyti, viðkvæmur fyrir sveiflum og skyndilegum hækkunum á eldsneytisverði og stendur jafnframt frammi fyrir verulegri áhættu vegna loftslagsbreytinga,“ segir dr. Go. „Þótt hlutur greinarinnar í heildarlosun gróðurhúsalofttegunda á heimsvísu sé tiltölulega lítill er hann engu að síður marktækur. Þess vegna er þetta verkefni með Grænafli mjög mikilvægt.“ Íslenskt fjármagn opnaði á fé að utan Kolbeinn segir að Grænafl hafi unnið að fjármögnun verkefnisins undanfarið og stórum áfanga verið náð er félagið hafi fengið fjárfestingu frá Nýsköpunarsjóðnum Kríu, með mótframlagi frá HS Orku og Rafal. Það hafi gert að verkum að fjármagn barst inn í verkefnið frá S-Kóreu. Þar sem ætlunin sé að nýta lausnina bæði á Íslandi og í S-Kóreu hafi náðst saman um að taka þátt í kostnaði við fyrsta bátinn. Hleðslustöðvar settar upp „Það er í sjálfu sér stórmerkilegt að við fáum fjármagn, bæði opinbert og einka, frá S-Kóreu til að rafvæða íslenskan strandveiðibát. Ekki veitir af því fyrstu skrefin í svona rannsóknar- og þróunarverkefnum eru dýr og ljóst er að opinberan stuðning þarf í kerfisbreytingu sem þessa því við erum ekki bara að fara að rafvæða báta heldur stöndum líka að innviðauppbyggingu með uppsetningu hleðslustöðva,“ segir Kolbeinn. Íslenskur sjávarútvegur geti orðið fyrirmynd Dr. Go segir Grænafl eitt þeirra fyrirtækja á Íslandi sem hafi áttað sig á mikilvægi þessara orkuskipta. Fyrirtækið hafi mótað raunhæfa leið í átt að kolefnislausum íslenskum sjávarútvegi með samstarfsverkefninu. „Á næstunni mun verkefni Grænafls leiða til þess að fyrsta rafknúna fiskiskipið verður tekið í notkun á Íslandi og með því sýna hvernig íslenskur sjávarútvegur getur orðið fyrirmynd annarra þjóða í umbreytingu yfir í kolefnislausan sjávarútveg,“ segir dr. Go.