Íslenskir stjórnmálaflokkar fengu samtals úthlutað tæplega 11,8 milljörðum króna úr ríkissjóði, á verðlagi dagsins í dag, á tímabilinu 2010-2026. Sjálfstæðisflokkurinn hefur þar til í síðustu alþingiskosningum verið stærsti flokkur landsins á tímabilinu. Flokkurinn hefur þar af leiðandi fengið hæsta úthlutun úr ríkissjóði á tímabilinu, eða alls tæplega 2,9 milljarða króna á verðlagi dagsins í dag. Samfylkingin, sem er í dag stærsti flokkurinn á þingi, hefur fengið næst mest í sinn hlut, eða rétt tæplega í 1,9 milljarða króna. Framlög til stjórnmálaflokka voru mikið í umræðunni fyrir um ári síðan eftir að Morgunblaðið greindi frá því að Flokkur fólksins hafi þegið 240 milljónir króna úr ríkissjóði án þess að uppfylla skilyrði laga um starfsemi stjórnmálasamtaka sem snýr að skráningu í stjórnmálasamtakaskrá Skattsins. Síðar kom í ljós að fleiri flokkar hefðu veitt framlaginu viðtöku án þess að uppfylla umrætt skilyrði. Málið olli miklu fjaðrafoki og var meðal annars rætt um hvort flokkunum bæri að endurgreiða styrkina sem þó varð ekki raunin að lokum. Í tilkynningu fjármála- og efnahagsráðuneytisins, þar sem greint er frá úthlutun ársins 2026 til stjórnmálaflokkanna, segir að ráðuneytið hafi farið yfir ferla við greiðslu til stjórnmálasamtaka og gert viðeigandi úrbætur í kjölfar þess að ábendingar bárust í ársbyrjun 2025 um að framlög hefðu verið greidd árið 2022 án þess að skilyrði um skráningu í stjórnmálasamtakaskrá hefði verið könnuð. Óskað hafi verið eftir mati Ríkisendurskoðunar á þeim breytingum sem gerðar voru og í febrúar hafi Ríkisendurskoðun birt niðurstöðu um að uppfært verklag ráðuneytisins styrki framkvæmd laga um fjármál stjórnmálasamtaka og frambjóðenda og tryggi að skilyrðum fyrir greiðslum úr ríkissjóði sé fylgt. „Í mati Ríkisendurskoðunar kemur fram að verklagið hafi verið skýrt nánar og bætt þannig að betur sé tryggt að laga skilyrðum sé fullnægt áður en greiðslur fari fram. Þá er bent á að kanna megi hvort einfaldara og skilvirkara sé að færa umsjón og framkvæmd greiðslna til eins aðila, til dæmis Fjársýslunnar. Einnig er hvatt til þess að umsóknarferill verði formfestur frekar, meðal annars með rafrænu umsóknarkerfi,“ segir í tilkynningu ráðuneytisins. Nánar er fjallað um málið í Viðskiptablaðinu sem kom út í morgun. Áskrifendur geta lesið fréttina í heild hér .