Veðmál um hvort verð á raf­myntum hækki eða lækki á næstu fimm eða fimmtán mínútum hafa notið ört vaxandi vinsælda og eru orðin eitt helsta æðið á spámörkuðum sem tengjast raf­myntum. Sam­kvæmt um­fjöllun Financial Times nema dag­leg við­skipti með slíka samninga nú um 70 milljónum dala á markaðs­torgunum Polymar­ket og Kalshi. Samningarnir fela í sér að fjár­festar veðja á hvort verð á bitcoin, et­hereum, solana eða XRP verði hærra eða lægra að ör­skammri stundu liðinni. Bæði Polymar­ket og Kalshi hófu að bjóða upp á fimmtán mínútna „upp eða niður“-samninga undir lok síðasta árs, en Polymar­ket hefur síðan bætt við fimm mínútna samningum á sömu myntir. Þessi við­skipti eru nú orðin meira en helmingur allrar raf­mynta­veltu á báðum mörkuðum. Vöxturinn hefur jafn­framt skapað ný tækifæri fyrir tækni­vædd við­skipta­fyrir­tæki sem nýta sér tíma­mun, verð­skekkjur og annað mis­vægi milli markaða. Amanda Fischer, stefnumótunar­stjóri hjá hags­muna­samtökunum Bet­ter Markets og fyrr­verandi starfs­manna­stjóri hjá bandaríska verðbréfa­eftir­litinu SEC, segir að spá­markaðirnir hafi tekið eigna­flokk sem fyrir var mjög spá­kaup­mennsku­legur og aukið enn á óróann. Að hennar mati hafi þessir vett­vangar ýtt undir enn meiri æsing í við­skiptum með stafrænar eignir. Polymar­ket og Kalshi hafa vaxið hratt frá því þeir slógu í gegn í að­draganda for­seta­kosninganna í Bandaríkjunum árið 2024. Þar hafa not­endur veðjað tugum milljarða dala á tví­kosta niður­stöður um marg­vís­lega at­burði, allt frá íþrótta­leikjum og efna­hags­þróun til mögu­legra hernaðarað­gerða Bandaríkjanna. Nú virðist sí­fellt stærri hópur al­mennra fjár­festa sækja í þessi skammtíma­veðmál í leit að skjótum hagnaði, þrátt fyrir að bitcoin hafi fallið um meira en 40% frá há­marki sínu í október á síðasta ári. Financial Times nefnir dæmi um 29 ára verk­fræðing, Max Wojcik, sem segist aðeins taka stöðu í fimm mínútna bitcoin-samningum eftir að hafa látið þrjú gervi­greindar­kerfi: Clau­de, Gemini og Chat­GPT, greina verðgögn síðustu vikna og meta líkurnar á árangri. Hann segist þó ekki líta á sig sem fjár­hættu­spilara. Fyrir­komu­lagið líkist að mörgu leyti blöndu af hefðbundnum af­leiðu­við­skiptum og net­veðmálum. Mike Selig, sem Donald Trump skipaði sem for­mann bandaríska af­leiðu­eftir­litsins CFTC, hefur lýst yfir stuðningi við spá­markaði. Hann hefur sagt að slíkir samningar geti nýst fjár­festum til að verja sig gegn áhættu og stýra eignasöfnum sínum. FT hefur jafn­framt áður greint frá því að Kalshi óski eftir heimild frá bandarískum eftir­lit­saðilum til að bjóða fram­legðar­við­skipti á vett­vangi sínum, þó að fyrir­tækið hafi sam­kvæmt heimildum ekki í hyggju að leyfa skuld­sett veðmál í þessum skammtíma­samningum að svo stöddu. Sér­fræðingar innan raf­mynta­geirans segja vöxtinn hafa verið mjög hraðan. Amir Hajian, sér­fræðingur hjá við­skipta­vakanum Keyrock, segir að fimm og fimmtán mínútna veðmál á bitcoin hafi vaxið með sprengi­krafti og að í reynd sé hér um hreina spá­kaup­mennsku að ræða. Að hans sögn eru þessir samningar sér­stak­lega vinsælir meðal al­mennra fjár­festa en jafn­framt hafa hátækni­vædd við­skipta­fyrir­tæki verið mjög virk á þessum mörkuðum.