Tekjur af vöru- og þjónustusölu Al­vot­ech féllu skarpt á fjórða árs­fjórðungi á meðan leyfis- og aðrar tekjur báru uppi af­komuna. Stærsti jákvæði liðurinn í bók­færðri af­komu ársins er áfram gang­virðis­breyting á af­leiðu­skuld­bindingum sem hefur engin bein áhrif á sjóð­streymi félagsins. Sá tekjuliður hækkaði veru­lega vegna endur­mats á af­leiðu­skuld­bindingum félagsins við eig­endur þess. Sam­kvæmt ný­birtu upp­gjöri Al­vot­ech nam hagnaður eftir skatta tæp­lega 28 milljónum dala á árinu 2025. Bók­halds­legar hreyfingar skýra þó stóran hluta þeirrar niður­stöðu. Hagnaður fyrir skatta var 136 milljónir dala sam­kvæmt upp­gefnum IFRS-tölum en þegar þeir liðir eru teknir út sem félagið telur ekki endur­spegla undir­liggjandi rekstur snýst myndin við. Í upp­gjörinu kemur fram að leiðrétt af­koma ársins var áfram neikvæð og nam tapi upp á 28,6 milljónir dala. Leiðrétt EBITDA nam 137 milljónum dala á árinu og var því innan þeirrar af­komu­spár sem félagið gaf út í nóvember. Það dugði þó ekki til að bera allan fjár­magns­kostnaðinn þegar bók­halds­liðirnir eru teknir út. Undir­liggjandi af­koma fyrir skatta var því áfram neikvæð þrátt fyrir jákvæða EBITDA. Heildar­tekjur Al­vot­ech námu tæp­lega 589 milljónum dala á árinu, eða um 20% meira en árið áður. Þar af námu tekjur af vöru- og þjónustusölu 276 milljónum dala en leyfis- og aðrar tekjur 310 milljónum dala. Það þýðir að vöru­salan stóð aðeins undir um 47% tekna félagsins á árinu, á meðan leyfis- og aðrar tekjur báru rúm­lega helminginn. Á fjórða árs­fjórðungi snerist þetta enn skýrar í þá átt. Heildar­tekjur félagsins voru um 169 milljónir dala en af því voru aðeins um 39 milljónir dala vöru- og þjónustu­sala, eða um 23%, á meðan leyfis- og aðrar tekjur námu tæp­lega 128 milljónum dala, eða um 75%, af tekjum fjórðungsins. Tekjur af vöru- og þjónustusölu féllu um rúm 73% miðað við sama árs­fjórðung árið áður. Í upp­gjörinu kemur fram að leyfis- og aðrar tekjur ársins hafi meðal annars verið drifnar af um 121 milljón dala rannsóknar- og þróunaráföngum, 126 milljónum dala vegna þróunará­fanga í einstökum lyfja­verk­efnum og 50 milljónum dala vegna við­skipta­tengdra áfanga og af­hendinga. Þetta eru tekjur sem geta verið háar á einstökum tíma­bilum, en þær eru ekki sama eðlis og stöðug og endur­tekin lyfja­sala. Sú stað­reynd að vöru­salan dróst svona mikið saman á fjórðungnum undir­strikar að Al­vot­ech reiðir sig enn veru­lega á ein­stakar samnings- og áfanga­greiðslur. Í kynningargögnum félagsins kemur fram að vöru­fram­legð hafi aðeins numið 17% á árinu og að veik­leiki í vöru­tekjum á seinni hluta ársins hafi meðal annars tengst tíma­setningu sendinga og fjár­festingum í endur­bótum á fram­leiðslu­aðstöðu. Á fjórða árs­fjórðungi var vöru­fram­legðin neikvæð um 37%. Félagið segir sjálft að sjóð­streymið hafi orðið fyrir áhrifum af veikari inn­heimtu, birgða­upp­byggingu fyrir væntan­lega markaðs­setningu og tíma­setningu sendinga. Rekstrar­sjóð­streymi fyrir vexti og skatta varð jákvætt um 7 milljónir dala á árinu í fyrsta sinn, en á fjórða árs­fjórðungi einum og sér var það samt neikvætt um 28 milljónir dala. Þegar greiddir vextir og skattar eru teknir með í reikninginn verður myndin þyngri. Sam­kvæmt sjóð­streymis­yfir­liti var hand­bært fé frá rekstri neikvætt um rúmar 50 milljónir dala á árinu. Greiddir vextir námu tæp­lega 59 milljónum dala og greiddir skattar tæp­lega 1 milljón dala. Að frá­dregnum vaxta­tekjum námu nettó greiddir vextir og skattar því 57 milljónum dala. Reksturinn stóð því ekki enn undir vaxta­byrðinni í reiðufé. Vaxta­greiðslurnar þrýsta einnig meira á lausa­fjár­stöðuna en áður. Félagið hafði áður heimild til að greiða hluta vaxta með svo­kölluðum PIK-greiðslum (pay­ment in kind), þar sem vextir leggjast við höfuðstól lánsins í stað þess að vera greiddir út í reiðufé. Þannig léttir tíma­bundið á greiðslu­byrðinni en skuldin hækkar á móti. Við­skipta­blaðið greindi frá því í haust að Al­vot­ech hefði í júní náð sam­komu­lagi við GoldenTree, stærsta lán­veitanda félagsins, um að breyta skilmálum á stærsta lána­pakka sínum. Tvö eldri lán voru þá sam­einuð í eitt lán, vaxtaálagið lækkað niður í SOFR plús 6% og gjald­daga haldið til ársins 2029. Í upp­gjörinu kemur jafn­framt fram að félagið bók­færði 17,7 milljóna dala hagnað vegna þeirrar endur­fjár­mögnunar. Sú breyting bendir til þess að bæði félagið og lán­veit­endur hafi þá séð fyrir sér batnandi tekju­streymi á næstu misserum, lík­lega vegna væntan­legra samþykkta frá Mat­væla- og lyfja­eftir­liti Bandaríkjanna, FDA, og aukinnar sölu í kjölfarið. Á móti kemur að eftir að félagið færði sig úr PIK yfir í stað­greidda vexti frá júní 2025 hefur vaxta­byrðin birst mun skýrar í reiðufé félagsins. Nettó greiddir vextir og skattar námu 57 milljónum dala á árinu og 35 milljónum dala á fjórða árs­fjórðungi einum og sér. Sú breyting var að sumu leyti jákvæð þar sem félagið fékk hagstæðari kjör á stærsta láni sínu. Á móti kemur að vaxta­byrðin birtist nú mun skýrar í sjóð­streymi félagsins þar sem vextir fara út í reiðufé í stað þess að safnast upp inni í skuldinni. Hand­bært fé félagsins nam um 172 milljónum dala í lok desember, saman­borið við 43 milljónir dala í lok septem­ber og 51 milljón dala í lok árs 2024. Sú bæting skýrist þó fyrst og fremst af nýrri fjár­mögnun. Á árinu fékk félagið um 233 milljónir dala í nýjum lánum og um 82 milljónir dala með hluta­fjárút­boði. Á fjórða árs­fjórðungi einum nam fjár­mögnunar­inn­streymi tæp­lega 207 milljónum dala. Á meðal þess sem félagið réðst í undir árs­lok var út­gáfa á 108 milljóna dala óveð­tryggðu breytan­legu skulda­bréfi með 6,875% vöxtum og 100 milljóna dala nýju láni með 12,5% vöxtum með gjald­daga í desember 2027. Heildar­skuld, að meðtöldum leigu­skuld­bindingum, nam um 1,45 milljörðum dala í árs­lok og nettó­skuldir um 1,28 milljörðum dala. Skuld­setningin nam 9,3-faldri leiðréttri EBITDA. Við­skipta­blaðið greindi einnig frá því að fjár­festum í breytan­legu skulda­bréfunum stæði til boða vörn gegn gengis­sveiflum með því að fá hluta­bréf að láni og selja þau á móti stöðu sinni. Í ein­földu máli fólst þetta í því að þeir héldu vaxta­berandi skulda­bréfi með mögu­leika á að breyta því síðar í hluta­fé, en gátu á sama tíma dregið úr áhættu af skammtíma­sveiflum í hluta­bréfa­verði með því að selja lánuð bréf á markaði. Sjá einnig Skulda­bréfa­fjár­festar vörðu sig gegn gengis­sveiflum Ef gengi félagsins lækkaði batnaði sú varnar­staða, þar sem hægt var að kaupa bréfin aftur á lægra verði og skila þeim. Slík upp­setning auðveldaðo félaginu að sækja sér fjár­magn, en sala á hluta­bréfum sam­hliða jók jafnframt söluþrýsting á bréfið til skemmri tíma. Eigið fé félagsins er enn neikvætt þrátt fyrir bata. Í lok árs var það mínus 284 milljónir dala, saman­borið við mínus 413 milljónir dala í lok árs 2024. Á sama tíma lækkuðu af­leiðu­skuld­bindingar mjög mikið, úr um 210 milljónum dala í um 54 milljónir dala. Í kynningargögnum félagsins segir að lækkunin hafi numið 156 milljónum dala og að hún skýrist að mestu af gang­virðis­breytingum á svo­kölluðum earn-out bréfum. Stærsta skýringin á bók­færðum hagnaði ársins er ekki rekstrar­af­koma heldur liðurinn fjár­muna­tekjur. Fjár­muna­tekjur námu tæp­lega 198 milljónum dala á árinu og í upp­gjöri félagsins kemur fram að þær hafi hækkað veru­lega vegna ógreidds hagnaðar af endur­mati á af­leiðu­skuld­bindingum. Þessar skuld­bindingar eru færðar á gang­virði sam­kvæmt reiknings­skila­reglum. Þegar bók­fært virði þeirra lækkar er sú lækkun færð til tekna í fjár­muna­tekjum án þess að nokkurt hand­bært fé skapist. Það er því áfram ástæða til að lesa bók­færðan hagnað Al­vot­ech með varúð. Þegar þessar gang­virðis­breytingar og aðrir óreglu­legir liðir eru hreinsaðir frá snýst hagnaður ársins aftur í tap. Þessar af­leiðu­skuld­bindingar tengjast svo­kölluðum earn-out bréfum sem urðu til við skráningu félagsins á markað árið 2022. Eins og Við­skipta­blaðið hefur áður greint frá tengist virði þeirra meðal annars því hvort gengi hluta Al­vot­ech fari yfir 20 dali á hlut á til­teknu tíma­bili. Þegar líkur á því minnka lækkar bók­fært virði skuld­bindingarinnar og sú lækkun er færð sem hagnaður í fjár­muna­tekjum. Birgðir félagsins hafa jafn­framt aldrei verið hærri. Þær námu um 220 milljónum dala í árs­lok, upp úr um 128 milljónum dala ári áður. Félagið rekur það til birgða­upp­byggingar fyrir nýja markaðs­setningu og stærra vöru­fram­boðs. Hér er um að ræða vöru­birgðir sem félagið situr á og getur vonandi sett í sölu sem fyrst til að bæta tekju­streymi. Á sama tíma lækkuðu við­skipta­kröfur niður í um 70 milljónir dala úr um 160 milljónum dala árið áður. Það bendir til þess að tíma­setning af­hendinga, tekju­færslu og inn­heimtu hafi áfram veru­leg áhrif á upp­gjörið milli tíma­bila. Al­vot­ech lagði jafn­framt áfram mikla fjár­muni í rannsóknir og þróun. Kostnaður við rannsóknir og þróun nam 184 milljónum dala á árinu. Félagið rekur hækkunina meðal annars til meiri kostnaðar vegna ein­stakra lyfja­verk­efna, undir­búnings gagn­vart FDA á seinni hluta ársins og tveggja kaupa, annars vegar á rannsóknar­starf­semi Xbra­ne í Svíþjóð og hins vegar á Ivers-Lee í Sviss og Þýska­landi. Niður­staðan er þó afar svipuð og á þriðja árs­fjórðungi. Al­vot­ech endaði þó árið með meira hand­bært fé en á síðasta fjórðungi og með betri EBITDA en fyrir ári síðan. Á móti kemur að vöru­sala féll skarpt á fjórða árs­fjórðungi, leyfis- og aðrar tekjur báru uppi af­komuna annan fjórðunginn í röð á meðan greiddir vextir þrýsta á sjóð­streymi og bók­færður hagnaður skýrist enn að veru­legu leyti af bók­halds­legu endur­mati á af­leiðu­skuld­bindingum fremur en eigin lyfjasölu.