Hafró kunngjörði í síðustu viku ráðgjöf um að veiðar á langreyð færu ekki yfir 150 dýr á þessu ári. Sama dag hófst háþrýstiþvottur á Hval 9 í slippnum í Reykjavik. Hvalur hf. hyggst stunda hvalveiðar í sumar og atvinnuvegaráðherra hefur sagt að ekkert sé því til fyrirstöðu þar sem þáverandi matvælaráðherra, gaf út leyfi til hvalveiða til fimm ára árið 2024. Atvinnuvegaráðherra hefur sagt að til standi að leggja fram frumvarp um bann við hvalveiðum. Ekki hefur verið veiddur hvalur við Íslandsstrendur síðastliðin tvö ár.