Bandaríski fjár­festingar­bankinn Gug­gen­heim hefur hafið greiningu á augn­lyfja­fyrir­tækinu Ocu­lis með kaupráðgjöf og metur bréf félagsins á 75 dali á hlut. Það er langt yfir markaðs­gengi félagsins þegar greiningin var unnin, en Ocu­lis var þá skráð á 27,96 dali á hlut á Nas­daq. Það er um 170% yfir genginu þegar greiningin var unnin. Í greiningunni segir að fjár­festingar­sagan í Ocu­lis byggist fyrst og fremst á þremur lyfjaþróunar­verk­efnum félagsins: OCS-01 við sjón­himnu­bjúg af völdum sykursýki, Privosegtor við sjóntauga­bólgu og Li­camin­limab við augnþurrki. Gug­gen­heim leggur þó nær allt virðið í fyrstu tvö verk­efnin og metur Li­camin­limab ekki inn í grunn­mat sitt. Byltingakenndir augn­dropar Mest skammtíma­vægi í mati Gug­gen­heim hefur OCS-01, augn­dropa­lyf Ocu­lis við sjón­himnu­bjúg af völdum sykursýki. Sjúk­dómurinn getur valdið versnandi miðju­sjón og er í dag fyrst og fremst meðhönd­laður með sprautum eða ígræddum sterameð­ferðum inn í augað. Slíkar með­ferðir geta verið íþyngjandi fyrir sjúklinga og tak­marka einnig hvaða augn­læknar geta veitt með­ferðina. OCS-01 er hins vegar augn­dropi sem inni­heldur dexa­metasón, sama virka efni og er í Ozur­dex-ígræðslu­lyfinu. Tækni Ocu­lis á að gera lyfinu kleift að berast aftur í augað, að sjón­himnunni, án sprautu eða ígræðslu. Gug­gen­heim segir að ef OCS-01 nær sam­bæri­legum árangri og Ozur­dex, en með augn­dropum, geti það orðið mikil breyting fyrir sjúklinga og augn­lækna Sjá einnig Ocu­lis nær sam­komu­lagi við FDA um lykil­rannsókn Í fyrri hluta DIAMOND-rannsóknarinnar sýndi lyfið marktækan bata á sjónskerpu og minnkun vökva­söfnunar í sjón­himnu. Í greiningunni kemur fram að 27,4% sjúklinga sem fengu OCS-01 náðu að minnsta kosti 15 stafa bata á sjón­prófi eftir 12 vikur, saman­borið við 7,5% í saman­burðar­hópi. Þá sást minnkun á vökva­söfnun strax eftir tvær vikur, sem Gug­gen­heim telur mikilvæga vís­bendingu um að augn­dropinn nái þangað sem hann á að virka. Næsti stóri áfangi er væntan­legur í júní, þegar Ocu­lis birtir helstu niður­stöður úr tveimur fasa III DIAMOND-rannsóknum. Gug­gen­heim metur 75% líkur á jákvæðri niður­stöðu. Milljón sjúklingar í mark­hópnum Gug­gen­heim telur bandaríska markaðinn fyrir sjón­himnu­bjúg af völdum sykursýki vera mjög stóran. Í greiningunni kemur fram að um 1,8 milljónir sjúklinga séu greindar með sjúk­dóminn í Bandaríkjunum. Af þeim telur Gug­gen­heim að um ein milljón sjúklinga geti verið strax mark­hópur fyrir OCS-01, verði lyfið samþykkt. Þar er annars vegar vísað til um 600 þúsund sjúklinga sem eru með væga sjónskerðingu og eru oft aðeins undir eftir­liti, meðal annars vegna þess að núverandi með­ferðir eru ífarandi. Hins vegar eru um 400 þúsund sjúklingar sem fá nú með­ferð en ná ekki nægi­lega góðum árangri. Gug­gen­heim áætlar að ár­leg há­marks­sala OCS-01 í Bandaríkjunum geti orðið um 1,2 milljarðar dala, eða sem nemur um 165 milljörðum króna á núverandi gengi. Bankinn metur þetta verk­efni eitt og sér á 31 dal á hlut í Ocu­lis. Annað stórt tækifæri í sjóntauga­bólgu Hitt stóra verk­efnið að mati Gug­gen­heim er Privosegtor, lyf sem Ocu­lis þróar við bráðri sjóntauga­bólgu. Sjóntauga­bólga er bólga í sjóntauginni sem getur valdið skyndi­legri sjónskerðingu, verk og varan­legum skaða á tauga­frumum. Í dag eru sterar megin­með­ferðin. Þeir geta flýtt bata en breyta ekki langtíma­horfum sjúklinga með af­gerandi hætti. Privosegtor er ætlað að vernda tauga­frumur og taugaþræði. Gug­gen­heim bendir á að engin samþykkt með­ferð sé til við sjúk­dómnum og að lyfið hafi fengið flýti­með­ferð hjá bandaríska lyfja­eftir­litinu, auk þess sem sam­komu­lag hefur náðst við FDA um hönnun lykil­rannsóknar. Sjá einnig Jákvæðar niður­stöður og FDA-um­sókn fyrir lok árs Í fasa II ACUITY-rannsókninni sýndi Privosegtor merki um ávinning á þremur sviðum: sjón­starf­semi, byggingu sjón­himnu og líf­fræði­legum mæli­kvörðum á tauga­skaða. Gug­gen­heim telur það styðja þá til­gátu að lyfið geti haft raun­veru­leg tauga­verndandi áhrif. Bankinn áætlar að Privosegtor geti náð um tveggja milljarða dala há­marks­sölu á heims­vísu, verði lyfið samþykkt, og metur verk­efnið á 42 dali á hlut í Ocu­lis. Virðið liggur í tveimur lyfjum Mat Gug­gen­heim á Ocu­lis byggist á því að leggja saman áætlað virði ein­stakra verk­efna félagsins, að teknu til­liti til líkum á árangri. Í grunnsviðs­mynd bankans er OCS-01 metið á 31 dal á hlut, Privosegtor á 42 dali og áætluð hand­bær staða félagsins í árs­lok 2026 á þrjá dali á hlut. Sam­tals gefur það 75 dali á hlut. Í bjartsýnni sviðs­mynd metur Gug­gen­heim bréfin á 108 dali, en í neikvæðari sviðs­mynd á 18 dali. Munurinn ræðst að mestu af því hvort lykil­rannsóknir félagsins skili jákvæðum niður­stöðum. Þetta undir­strikar áhættuna. Ocu­lis er enn fyrst og fremst lyfjaþróunarfélag. Tekjur eru litlar, félagið ver miklum fjár­munum í rannsóknir og verðmæti þess ræðst að miklu leyti af niður­stöðum klínískra rannsókna, samþykki eftir­lit­saðila og síðar markaðs­setningu lyfjanna. Gug­gen­heim nefnir meðal helstu áhættuþátta að rannsóknir geti mis­tekist, óvænt öryggis­vanda­mál komið upp, sam­keppni aukist eða félagið þurfi að sækja meira fjár­magn áður en það verður sjálf­bært. Júní getur orðið vendi­punktur Næstu vikur geta orðið af­gerandi fyrir Ocu­lis. Í júní er gert ráð fyrir niður­stöðum úr tveimur fasa III-rannsóknum á OCS-01 við sjón­himnu­bjúg af völdum sykursýki. Verði niður­stöðurnar jákvæðar gæti félagið lagt inn um­sókn til bandarískra yfir­valda á fjórða árs­fjórðungi og um­sókn í Evrópu á fyrri hluta næsta árs. Fyrir fjár­festa er þetta því skýr vendi­punktur. Jákvæðar niður­stöður gætu styrkt fjár­festingar­söguna veru­lega, en neikvæðar niður­stöður myndu grafa undan stærsta skammtíma­vægi í mati bankans. Niður­staða Gug­gen­heim er þó skýr. Bankinn telur Ocu­lis vera sér­hæft augn­lyfja­fyrir­tæki með stórt markaðstækifæri í al­gengum augn­sjúk­dómi, mögu­legt byltingar­lyf við sjald­gæfum sjúk­dómi og þriðja verk­efni í augnþurrki sem gæti bætt við virði ef niður­stöður síðar á árinu verða jákvæðar