Um 142 milljarðar króna hafa þurrkast af markaðsvirði Ocu­lis á tveimur við­skipta­dögum eftir að félagið birti niður­stöður úr lykil­rannsóknum á augn­dropa­lyfinu OCS-01. Gengi bréfa Ocu­lis lokaði í 1.560 krónum í Kaup­höllinni í dag og lækkaði um 14,3% í við­skiptum dagsins. Við lokun markaða á föstu­dag stóð gengið í 3.650 krónum. Lækkunin frá föstu­degi nemur 57,3%. Miðað við 67.792.176 útistandandi hluti hefur markaðsvirði Ocu­lis lækkað úr um 247,4 milljörðum króna í um 105,8 milljarða króna. Verðmæta­tapið nemur því 141,7 milljörðum króna frá lokun markaða á föstu­dag. Fallið kemur í kjölfar þess að Ocu­lis til­kynnti niður­stöður úr tveimur þriðja stigs rannsóknum á OCS-01, augn­dropa­lyfi sem félagið hefur þróað við sjón­himnu­bjúg af völdum sykursýki. Rannsóknirnar, DIAMOND-1 og DIAMOND-2, náðu ekki megin­mark­miði sínu um bætta sjónskerpu sjúklinga eftir 52 vikur. Niður­staðan var mikið áfall fyrir fjár­festa, enda hafði OCS-01 verið eitt mikilvægasta þróunar­verk­efni félagsins. Lyfið var hugsað sem mögu­leg fyrsta augn­dropa­með­ferð við sjón­himnu­bjúg af völdum sykursýki, en núverandi með­ferðir byggja að stórum hluta á sprautum í auga. Ocu­lis hefur í kjölfarið ákveðið að sækja ekki um markaðs­leyfi hjá bandaríska lyfja­eftir­litinu FDA fyrir OCS-01 við þessari ábendingu að svo stöddu. Félagið hefur þó bent á að lyfið hafi sýnt marktæka minnkun á þykkt sjón­himnu, sem var auka­mark­mið rannsóknanna. Það dugði hins vegar ekki til að vega upp á móti því að megin­mark­miðið náðist ekki. Við­skipta­blaðið greindi í gær frá því að gengis­hrun Ocu­lis hefði valdið sjóðum Ís­lands­sjóða milljarða­tapi. Sjá einnig Gengis­hrun Ocu­lis veldur sjóðum Ís­lands­sjóða milljarðs tapi Þá var einnig fjallað um að verðmæti hlutar Páls Ragnars­sonar, sem hefur verið stór hlut­hafi í félaginu, hefði lækkað um 15 milljarða króna vegna verð­fallsins. Sjá einnig Eign Páls lækkar um 1,5 milljarða vegna verðhruns Oculis Bréf Ocu­lis hafa nú lækkað um 55,7% síðastliðinn mánuð, 39,3% frá áramótum og 36,3% síðastliðið ár, sam­kvæmt upp­lýsingum úr Kaup­höllinni. Horfa til OCS-05 Fyrir niður­stöðurnar hafði markaðurinn verðlagt Ocu­lis með veru­legum væntingum til OCS-01. Árangur í DIAMOND-rannsóknunum hefði getað opnað leið að um­sókn um markaðs­leyfi í Bandaríkjunum og mögu­legri markaðs­setningu á lyfinu. Eftir niður­stöðurnar hefur sá hluti sögunnar breyst veru­lega. At­hygli fjár­festa beinist nú að öðrum þróunar­verk­efnum Ocu­lis og sjóðs­stöðu félagsins. Sjá einnig Fá stöðu byltingar­kennds lyfs og gengið hækkar um 10% Félagið hefur áður sagt að hand­bært fé, ígildi hand­bærs fjár og skammtíma­fjár­festingar dugi til að fjár­magna reksturinn fram á síðari hluta árs 2029. Gengis­fallið undir­strikar áhættuna sem fylgir fjár­festingum í líftækni­fyrir­tækjum. Virði slíkra félaga getur ráðist af fáum lykil­rannsóknum og þegar niður­stöður standast ekki væntingar getur markaðsvirði fallið hratt, jafn­vel þótt félagið eigi áfram önnur þróunar­verk­efni og sterka sjóðs­stöðu. Lækkun Ocu­lis setti svip á markaðinn í dag. Úr­vals­vísi­talan lækkaði um 1,3%, en auk Ocu­lis lækkuðu bréf Al­vot­ech um 4,7%, Sjóvár um 2,0% og Icelandair um 2,0%. Heildar­velta á markaði nam 9,2 milljörðum króna. Sú tala litast þó tölu­vert af við­skiptum með bréf Brims, þar sem veltan nam 6,1 milljarði króna í tengslum við endur­kaup félagsins á eigin bréfum vegna Lýsis­við­skiptanna. Sjá einnig Guð­mundur seldi Brim bréf fyrir 3,1 milljarð