Dóms­málaráðu­neytið áformar 718,6 milljóna króna hag­ræðingu í fjár­lögum ársins 2026, sam­kvæmt svari dóms­málaráðherra við fyrir­spurn Árna Helga­sonar þing­manns um hag­ræðingu í ríkis­rekstri. Þrátt fyrir það kemur fram í svarinu að ekki liggi fyrir hvaða hag­ræðing hafi náðst á árinu 2025 vegna til­lagna hag­ræðingar­hóps ríkis­stjórnarinnar. Þá hafa stofnanir ráðu­neytisins ekki verið beðnar um að halda sér­stak­lega utan um þá hag­ræðingu sem kemur beint í kjölfar til­lagna hópsins. „Stofnanir hafa ekki verið beðnar um að halda utan um hag­ræðingu sem kemur beint í kjölfar til­lagna hag­ræðingar­hópsins og er því ekki unnt að svara til um áhrif til­lagnanna á ein­staka rekstrar­liði,“ segir í svari ráðherra. Fyrir­spurnin laut að því hversu mikil hag­ræðing hefði átt sér stað í ráðu­neytinu á grund­velli til­lagna starfs­hóps for­sætis­ráðherra, sem skilaði niður­stöðum sínum í mars í fyrra, og í hverju hag­ræðingin fælist eftir mála­flokkum og undir­stofnunum. Í svarinu segir að til­lögur hag­ræðingar­hóps ríkis­stjórnarinnar hafi verið nýttar við for­gangs­röðun í fjár­málaáætlun 2026 til 2030 og við undir­búning fjár­laga 2026. Í því sam­hengi hafi ráðu­neytið út­fært hag­ræðingarað­gerðir innan þeirra mála­flokka sem það fer með. Þegar kemur að árinu 2025 er svarið hins vegar öllu loðnara. Þar segir að starf­semi ríkisaðila hafi þá verið í samræmi við ársáætlanir á grund­velli fjár­laga þess árs. Fjár­lög 2025 hafi gert ráð fyrir al­mennri hag­ræðingu upp á 2,2 milljarða króna innan ársins og 8,2 milljarða króna sértækri hag­ræðingu. Þar sem til­lögur hag­ræðingar­hópsins hafi ekki verið samþættar inn í fjár­lög 2025 liggi ekki fyrir hvaða hag­ræðing hafi náðst vegna til­lagnanna á því ári. Ráðu­neytið nefnir þó að til­lögurnar hafi nýst til að koma ýmsum verk­efnum af stað. Þar eru nefnd dæmi á borð við sam­einingu sýslu­manna, sem varð að lögum í febrúar og kemur til fram­kvæmda árið 2027. Í svarinu segir að um sé að ræða fækkun ríkis­stofnana um 5%. Þá er einnig nefnt frum­varp dóms­málaráðherra um af­nám jafn­launa­vottunar, sem liggur fyrir Alþingi. Stærsti hluti hag­ræðingarinnar á næsta ári fellur undir mála­flokkinn al­manna- og réttaröryggi. Þar er gert ráð fyrir 542,2 milljóna króna hag­ræðingu í fjár­lögum 2026. Þar af nemur hag­ræðing vegna löggæslu 339,7 milljónum króna og vegna Land­helgis­gæslunnar 166,6 milljónum króna. Hjá lög­reglu­stjóranum á höfuð­borgar­svæðinu er hag­ræðingin 56,5 milljónir króna, hjá ríkislög­reglu­stjóra 32,1 milljón, hjá lög­reglu­stjóranum á Suður­nesjum 23,2 milljónir og hjá lög­reglu­stjóranum á Suður­landi 11 milljónir. Þá er gert ráð fyrir 100 milljóna króna hag­ræðingu undir liðnum ýmis löggæslu- og öryggis­mál. Hjá dómstólum nemur hag­ræðingin 63,9 milljónum króna í fjár­lögum 2026. Þar af eru 18,2 milljónir hjá héraðs­dóms­tólum, 3,1 milljón hjá Lands­rétti, 1,8 milljónir hjá Hæstarétti og 40,8 milljónir hjá Dómstólasýslunni. Undir mála­flokknum réttindi ein­stak­linga, trúmál og stjórnsýsla dóms­mála er gert ráð fyrir 109,7 milljóna króna hag­ræðingu. Þar af eru 70,9 milljónir hjá stjórnsýslu dóms­málaráðu­neytisins, 21,9 milljónir hjá sýslumönnum og 16 milljónir í út­lendinga­málum. Þar undir falla meðal annars 4,4 milljónir hjá Út­lendinga­stofnun, 1,8 milljónir hjá kæru­nefnd út­lendinga­mála og 9,8 milljónir vegna um­sækj­enda um alþjóð­lega vernd. Hag­ræðing hjá Fangelsis­mála­stofnun nemur 32,5 milljónum króna, hjá héraðssaksóknara 2,6 milljónum og hjá ríkis­saksóknara 800 þúsund krónum. Þá nemur hag­ræðing hjá Þjóðskrá Ís­lands 2,8 milljónum króna og hjá Persónu­vernd 900 þúsund krónum. Í svarinu segir að hag­ræðingarað­gerðir ríkis­stjórnarinnar séu frá og með 2026 samþættar ferli fjár­laga­gerðar og fram­kvæmdar fjár­laga. Hvert ráðu­neyti beri ábyrgð á að inn­leiða hag­ræðingarað­gerðir innan sinna mál­efna­sviða. Engu að síður er ljóst af svarinu að erfitt er að rekja hag­ræðinguna með nákvæmum hætti til til­lagna hag­ræðingar­hópsins sjálfs. Ráðu­neytið birtir töflu yfir niður­skurð eða hag­ræðingu í fjár­lögum 2026 en segir jafn­framt að stofnanir hafi ekki haldið sér­stak­lega utan um það hvaða breytingar megi rekja beint til til­lagna hópsins. Svarið gefur því skýra mynd af því hvar fjár­veitingar eru lækkaðar á næsta ári, en mun síður af því hvaða rekstrar­breytingar, þjónustu­breytingar eða raun­veru­leg hag­ræðing liggur að baki einstökum liðum.