Eimskipafélag Íslands hf., fyrir hönd P/f Faroe Ship, og Sjómannafélag Íslands hafa undirritað samkomulag um að aflýsa verkfalli háseta og bátsmanna á skipum félagsins. Verkfallið náði til þriggja skipa Eimskips, Brúarfoss, Dettifoss og Selfoss. Undirbúningur fyrir brottfarir skipanna hefst þegar í stað og gert er ráð fyrir að öll skip félagsins verði komin á áætlun í næstu viku. Í tilkynningu kemur fram að Eimskip hafi mikla trú á sjómannastéttinni og langvarandi reynslu af starfi sjómanna, hæfni þeirra, dugnaði og áræðni. Félaginu sé mikilvægt að halda því rótgróna sambandi áfram, vinna að framgangi stéttarinnar og lyfta henni upp.