Af 57 tillögum hagræðingarhóps ríkisstjórnarinnar sem kynntar voru í mars 2025 hafa 5 komið til framkvæmda, 20 eru í vinnslu, 6 áformaðar, en ekki er hafin vinna við 26. Þetta kemur fram í nýrri úttekt Viðskiptaráðs. Í upphafi ársins 2025 efndi ríkisstjórnin til samráðs um hagræðingu í ríkisrekstri þar sem almenningi, ráðuneytum og forstöðumönnum hjá ríkinu var gefinn kostur á að skila inn tillögum að hagræðingu og umbótum í ríkisrekstri. Um 4.000 umsagnir bárust með yfir 10.000 tillögum. Starfshópur forsætisráðherra greindi umsagnirnar og lagði til 57 aðgerðir sem áætlað var að myndu leiða til 71 milljarðs króna sparnaðar yfir tímabilið 2026-2030. Sjá einnig Vilja ná fram 71 milljarðs sparnaði með hag­ræðingu Í úttektinni kemur fram að af þeim 20 hagræðingaraðgerðum sem tímasettar voru árið 2025 hafa 2 verið samþykktar, 11 eru í vinnslu, áform um eina hafa verið kynnt og 6 eru ekki hafnar. Flestar aðgerðir áttu að koma til framkvæmda árið 2026, en stjórnvöld hafa lokið 2 aðgerðum af þeim 27 aðgerðum sem tímasettar voru í ár. Mynd tekin úr úttekt Viðskiptaráðs. Viðskiptaráð tekur sérstaklega fyrir þær aðgerðir sem eru í „vanskilum“, þ.e. þær aðgerðir sem hópurinn lagði til að kæmu til framkvæmda í fyrra, og aðgerðir sem tímasettar eru á þessu ári en hefur ekki enn verið lokið. Sjá einnig Helmingur til­lagna verði að veru­leika Ráðið nefnir í þeim efnum endurskoðun á styrkjum til stjórnmálaflokka, fækkun nefnda og aukinn samrekstur innan stjórnarráðsins, styrkingu embættis ríkissáttasemjara og sameiningu Samkeppniseftirlitsins, Fjölmiðlanefndar, Fjarskiptastofu og Neytendastofu. „Ef markmið um aukið aðhald og skilvirkari ríkisrekstur eiga að ná fram að ganga þarf skýrari forgangsröðun, meiri framkvæmdahraða og aukna eftirfylgni með þeim umbótum sem þegar hafa verið boðaðar.“ Bent er á að dæmi um aðgerðir sem ríkisstjórnin hefur lokið við séu lögleiðing stöðugleikareglu í ríkisfjármálum og aflétting á jafnlaunavottun, með því að hækka stærðarmörk fyrirtækja sem falla undir þá skyldu og innleiða skýrslugjöf í stað vottunar. Þá sé sameining sjóða innan ráðuneyta, aðlögun starfsmannalaga, sameining fámennra stofnana og stofnsetning Þjónustumiðstöðvar ríkisins í vinnslu. Aðlögun starfsmannalaga að almennum markaði bíður afgreiðslu Alþingis með frumvarpi um afnám áminningarskyldu og óvíst hvort það verði afgreitt.