Það er rík tilhneiging manneskjunnar að leita skýringa í ytri þáttum þegar sá árangur sem stefnt er að næst ekki, í stað þess að líta í eigin barm. Það er hægt að benda á ástandið í heiminum, stýrivexti, verðbólgu, styttingu vinnuvikunnar o.s.frv., en stór hluti af því að auka árangur vinnustaða, eða heilu samfélaganna, hvernig sem það á að mælast, liggur innra með hverjum og einum, ekki síst hjá þeim sem leiða og eru fyrirmyndir annarra. Að hafa áhrif og ná árangri Fólk í stjórnenda- og áhrifastöðum hefur mikil áhrif. Ekki bara í gegnum stefnur og ákvarðanir, heldur í gegnum það sem þau sjálf eru og gera. Þar kemur sjálfsforysta inn, sem lykil hæfniþáttur til að auka árangur. Til að ná árangri í vinnuumhverfi dagsins í dag, hvort sem það er aukin framleiðni, meiri hagnaður eða annað, þarf nefnilega aðra hæfni en áður dugði til. Þau sem ástunda sterka sjálfsforystu gengur betur að leiða aðra til árangurs. „Power-ið“ í persónulegri hæfni Lengi hefur verið tala um sjálfsforystu og persónulega hæfni sem mjúka hæfni. Hæfni sem ekki hefur verið tengd mikið við árangur. Árangur hefur oftar verið tengdur við hraðar ákvarðanir, áhættu og djörfung. Rannsóknir sýna að það sem greinir á milli framúrskarandi leiðtoga og miðlungs stjórnenda er ekki áhættusæknin, tæknilega þekkingin eða prófgráðurnar. Það er hvernig þau eru samkvæm sjálfum sér, hlusta, mynda tengsl og skapa traust taka ákvarðanir undir álagi aðlagast sjálf breytingum búa sig, vinnustaði sína og fólkið sitt undir breytta framtíð Þess vegna er persónuleg hæfni sannarlega lykilhæfni (e. power skills) en ekki eitthvað sem er bara þægilegt að hafa (e. soft skills) . Persónuleg hæfni getur t.d. skapað tengsl, traust og tækifæri laðað að og haldið í fólk, aukið virkni þess og helgun látið tæknilegu þekkinguna nýtast með fólkinu og í gegnum fólkið Hvað felst í sjálfsforystu? Sjálfsforysta er ekki sjálfsrækt eða dagbókarskrif, og ekki viðbót við faglega hæfni. Sjálfsforysta er grunnur faglegrar getu og styrks. Hún er meðvituð ákvörðun um að þekkja sig, eigin gildi, styrkleika, hvata, hugarfar og venjur, setja sér stefnu og vinna stöðugt í eigin þróun. Lifa svo þá ákvörðun til að leiða ekki bara sig, heldur aðra og árangur. Sjálfsforysta byrjar hjá hverjum og einum og hefur svo margföldunaráhrif í gegnum aðra. Stjórnendur sem stunda sjálfsforystu taka ábyrgð á sér og áhrifum sínum á aðra og árangur Sjálfsforysta, símenntun og stöðug þróun Sjálfsforysta er ekki eingöngu innra ferli, hún birtist líka í aðgerðum, gagnvart sér og öðrum. Eitt það öflugasta fyrir sterka sjálfsforystu er að velja að halda áfram að læra, og líka stundum að aflæra fyrri hugmyndir. Símenntun á að vera hluti af daglegum verkefnum og störfum allra sem vilja efla sig og búa sig undir framtíðina. Hún er ekki val, heldur ábyrgð. Símenntun er ekki merki um að vera ekki nógu góður, hún er merki um að taka faglega ábyrgð. Þetta snýst um meira en þinn vinnustað Það eru margir stjórnendur á Íslandi, þau hafa mikil áhrif en gætu haft enn meiri og betri áhrif. Besta leiðin er að efla eigin sjálfsforystu, m.a. með því að halda áfram að þróa sig og auka meðvitund um áhrif sín á aðra. Með þessu myndi framleiðni og velsæld í samfélaginu aukast. Taktu ákvörðun Fólkið sem nær árangri í dag ástundar sjálfsforystu, þekkir og ræktar sig sem fagfólk og manneskjur, nær vel til annarra, eflir aðra, og er stöðugt að læra og aðlagast. Veldu sjálfsforystu sem grunn að því að leiða aðra og árangur. Veldu að hafa góð áhrif. Það er lykilhæfni í verki. Hefur þú þá lykilhæfni sem þarf til að ná árangri í vinnuumhverfi dagsins í dag? Höfundur er eigandi og framkvæmdastjóri Dokkunnar. Pistillinn birtist fyrst í Viðskiptablaðinu .