Það er skemmst frá því að segja að krabbi í veiðanlegum mæli kom ekki í gildrurnar en hins vegar var safnað ýmsum upplýsingum sem komið gætu að gagni síðar,“ segir Reynir Georgsson, skipstjóri hjá Brimi hf., sem fór í þennan túr með írska bátnum ásamt Kristjáni Péturssyni skipstjóra. Írski báturinn heitir An Capall Ban og var hann með sams konar gildrur og notaðar eru til þessara veiða við Írland og Færeyjar. Prófuðu niður á 1.500 metra „Við byrjuðum úti í Jökultungu og héldum svo suður Melsekk og út á Reykjaneshrygg, alveg út fyrir 200 mílurnar. Síðan fórum við austur með öllum landgrunnskantinum úti af Suðurlandi og suður í Rósagarð. Við lögðum gildrurnar aðallega á dýpinu frá 300 metrum og niður á 1.000 metra. Reyndar prófuðum við líka miklu dýpra, kannski niður á 1.500 metra, en dýptarmælirinn í skipinu var það lélegur að hann náði ekki að mæla svo djúpt,“ segir Reynir. Suðaustursvæðið vænlegast Írski báturinn An Capall. „Af aflabrögðum er það að segja að ekki virtist vera mikill krabbi fyrr en við komum austur fyrir Vestmannaeyjar. Þar er að finna krabba af ýmsum tegundum. Hins vegar vorum við ekki endilega að reyna að veiða mikið magn heldur fyrst og fremst að kortleggja svæðið. Þar sem vart varð við krabba fengum við upp í 30 stykki í streng sem í voru 80 gildrur. Þótt við fengjum krabba einhvers staðar lögðum ekki aftur á nákvæmlega sama stað heldur frekar í kring til þessað staðfesta fyrri vitneskju og héldum svo áfram för okkar,“ segir Reynir. Eina svæðið hér með krabbalegt landslag á botninum Svæðið við Suðausturland er einna vænlegast til krabbaveiða hér við land og þar er sóst eftir tröllakrabbanum. „Þetta er eina svæðið hér með krabbalegt landslag á botninum miðað við aðstæður annars staðar i heiminum þar sem tröllakrabbi er veiddur, það er að segja brattur kantur og harður botn. Í leiðangrinum varð tröllakrabba aðallega vart á svæðinu austur úr Breiðamerkurdýpinu og austur í Lónsdýpi. Tröllakrabbi er veiddur sunnan við íslensku lögsöguna, á Hattonbanka og suður úr. Írar veiða þennan krabba bæði inni í eigin lögsögu og utan hennar, mest á 800-1.000 metra dýpi. Við Íslandsstrendur heldur hann sig grynnra, mikið á 400-600 metrum, og er þrisvar til fjórum sinnum stærri en tíðkast að meðaltali í afla írsku bátanna,“ segir Reynir en því má bæta við að Færeyingar eru einnig byrjaðir að prófa sig áfram á þessum veiðum. Ný krabbategund Fiskifréttir 26. ágúst 2005. Eins og greint var frá í Fiskifréttum á sínum tíma stundaði grænlenski togarinn Arctic Wolf tilraunaveiðar á krabba víða hér við land fyrir nokkrum misserum á vegum íslenskra aðila. Áður hafði Skinney-Þinganes staðið fyrir veiðitilraunum af þessu tagi. Í bæði skiptin þótti árangurinn ekki nógu góður. Reynir var spurður hvort sú vitneskja sem fékkst i þessari tilraun rímaði við það sem menn hefðu áður komist að. „Já, það má kannski segja það, en þó kom það nýtt fram í þessum leiðangri að við urðum varir við aðra tegund krabba sem við fengum mjög djúpt, fyrir neðan 1.000 metra. Hann er svipaður í útliti og tröllakrabbinn nema hvað hann er eldrauður á lit. Hann virtist vera að finna austur með öllu Suðurlandi en þó fengum við hann ekki nema í stykkjatali. Hafrannsóknastofnun er nú að skoða hann og tegundagreina. Við vorum helst að geta okkur þess til að þetta væri sams konar krabbi og veiddur er í ríkum mæli við austurströnd Bandaríkjanna en við vitum það ekki,“ segir Reynir. Marflóin át beituna Reynir sagði að mun minna virtist vera um krabba hér við land en írsku sjómennirnir áttu að venjast frá sínum veiðislóðum. Að sögn Íranna fá þeir alltaf einhvers konar krabba þegar þeir leggja gildrur sínar í lögsögu Írlands. „Við vitum að mikið er aftrjónukrabba hér upp við ströndina en úti á Reykjaneshrygg lögðum við aftur og aftur án þess að fá nokkum krabba. Beitan í gildrunum var makríll, keila, tindabykkja og kýrhúðir og entist tindabikkjan einna best en það olli vanda hversu mikið var um marfló sem át beituna.“ -Hvaða ályktun dregur þú af þessari tilraun? „Þetta var bara könnunarleiðangur og gagnlegur sem slíkur. Mér fyndist einkennilegt ef ekki væri hægt að veiða og vinna krabba hér á Íslandi eins og alls staðar í kringum okkur. Það er vitað um nokkrar krabbategundir sem hér eru í töluverðum mæli svo sem trjónukrabba, gaddakrabba og skessukrabba, en óvíst er hversu mikið er af verðmætari krabbategundum. Tíminn mun leiða í ljós hvernig þessar niðurstöður munu gagnast,“ sagði Reynir Georgsson.