Milljarðs skort­staða Acasta Partners UK LLP í Al­vot­ech, sem Við­skipta­blaðið greindi frá fyrir helgi , er að öllum líkindum ekki hefðbundið veðmál gegn félaginu heldur vörn á móti breytan­legum skulda­bréfum Al­vot­ech. Leiða má líkur að því að breski sjóðurinn hafi tekið þátt í lokuðu út­boði Al­vot­ech á breytan­legum skulda­bréfum á dögunum og ákveðið að skort­selja hluta­bréf á móti þeirri stöðu. Slík vörn er al­geng í út­boðum á breytan­legum skulda­bréfum en Al­vot­ech gerði bein­línis ráð fyrir slíkri stöðutöku í upp­setningu út­boðsins og bauðst dóttur­félag Al­vot­ech til að lána fjár­festum hluta­bréf. Sam­kvæmt heimasíðu Acasta fjár­festir sjóðurinn aðal­lega í breytan­legum skulda­bréfum. Félagið lýsir sér jafn­framt sem sér­hæfðum alþjóð­legum fjár­festi sem nýtir meðal annars af­leiður tengdar breytan­legum skulda­bréfum og stundar við­skipti sem byggja á að nýta sér sveiflur og mis­verðlagningu á mörkuðum. Breski sjóðurinn er því lík­legast ekki að taka stöðu til lengri tíma og veðja á lækkun hluta­bréfanna. Fjárfestum boðið vörn gegn gengissveiflum Skort­staðan er líklegast hluti af svo­kallaðri delta-vörn sem Al­vot­ech bauð upp á í síðasta skulda­bréfaút­boði þar sem skulda­bréfa­fjár­festir selur hluta­bréf á móti breytan­legu skulda­bréfi til að draga úr næmni heildar­stöðunnar fyrir skammtíma­sveiflum í hluta­bréfa­verði. Al­vot­ech lauk í desember lokuðu út­boði á breytan­legum skulda­bréfum að fjár­hæð 108 milljónir bandaríkja­dala til hóps um 20 alþjóð­legra fjár­festa. Bréfin bera 6,875% vexti, sem greiðast hálfs­árs­lega, og eru á loka­gjald­daga í lok árs 2030. Hvert skulda­bréf er að nafn­verði 200.000 bandaríkja­dala. Sjá einnig Skulda­bréfa­fjár­festar vörðu sig gegn gengis­sveiflum Breytan­legt skulda­bréf er í grunninn skulda­bréf sem ber vexti en veitir fjár­festinum jafn­framt rétt til að breyta því síðar í hluta­bréf á fyrir fram ákveðnum kjörum. Fjár­festirinn fær þannig bæði hefðbundið vaxta­berandi skulda­bréf og en getur einnig hagnast ef gengi félagsins hækkar. Alvotech lánar bréfin í gegnum dótturfélag Út­boð Al­vot­ech var sett upp þannig að skulda­bréfa­fjár­festum var boðið upp á vörn gegn gengis­sveiflum strax við út­gáfu. Dóttur­félag Al­vot­ech, Al­vot­ech Manco, lánaði kaup­endum breytan­legu skulda­bréfanna hluta­bréf í Al­vot­ech sem þeir gátu selt á markaði til að verja sig gegn gengislækkun félagsins. Sjá einnig Gefa út breytanleg skuldabréf fyrir 12,6 milljarða Ef Acasta tók þátt í skulda­bréfaút­boðinu, eins og leiða má líkur að, er lík­legt að skort­staðan byggist á hluta­bréfum sem sjóðurinn fékk að láni frá Al­vot­ech Manco, dóttur­félagi Al­vot­ech. Með öðrum orðum kann Al­vot­ech sjálft, í gegnum dóttur­félag sitt, að hafa lagt til þau hluta­bréf sem gera Acasta kleift að halda úti skort­stöðunni Staða Acasta í Alvotech tvíþætt Í reynd er breski sjóðurinn því með tvíþætta stöðu í Al­vot­ech. Annars vegar eiga þeir breytan­legt skulda­bréf sem ber vexti og veitir þeim rétt til að breyta skuldinni í hluta­bréf síðar. Sá réttur verður verðmætari ef gengi Al­vot­ech hækkar. Hins vegar eru þeir með skort­stöðu á móti þar sem þeir hafa fengið bréf að láni, að öllum líkindum frá Al­vot­ech Manco. Ef gengi Al­vot­ech lækkar verður ódýrara fyrir Acasta að kaupa bréfin til baka og loka skort­stöðunni, sem vinnur þá á móti lægra virði breytiréttarins. Þetta kallast delta-vörn. Mark­mið sjóðsins er því ekki endi­lega að veðja á lækkun hluta­bréfanna, heldur að stýra þeirri hluta­bréfaáhættu sem fylgir breytan­lega skulda­bréfinu. Wessman skuldbundinn til að kaupa bréfin til baka Eins og Við­skipta­blaðið greindi frá á sínum tíma skuld­bundu tveir af stærri hlut­höfum Al­vot­ech, ATP Holdings ehf. (í eigu Aztiq, fjárfestingafélags Róbert Wessman) og Al­vogen Lux Holdings s.á.r.l., sig til að kaupa hluta­bréfin sem dóttur­félag Al­vot­ech lánaði skulda­bréfa­fjár­festum í tengslum við út­boðið. Þannig var skulda­bréfa­fjár­festum gert kleift að fá hluta­bréf að láni og selja þau á markaði til að verja sig gegn gengis­sveiflum. Róbert Wessman, stofnandi og forstjóri Alvotech © Eyþór Árnason (Eyþór Árnason) Ekki hefur verið stað­fest að Acasta hafi tekið þátt í skulda­bréfaút­boði Al­vot­ech eða að skort­staðan sé beint komin til vegna þeirrar út­gáfu. Miðað við fjár­festingar­stefnu sjóðsins, heimildir Við­skipta­blaðsins og upp­setningu skulda­bréfaút­boðsins er það þó nærtækasta skýringin. Sjá einnig Breskur sjóður með milljarðs skort­stöðu í Al­vot­ech