Verðmætasköpun hér á landi er í dag knúin af fjölbreyttum útflutningi, sem byggist að mestu á fjórum meginstoðum. Í könnun Gallup fyrir Viðskiptablaðið var spurt hvaða atvinnugrein landsmenn töldu mikilvægasta fyrir íslenskt hagkerfi en langflestir nefndu þar sjávarútveg, eða fjórir af hverjum tíu. Næst kom tækni og nýsköpun með 24%, ferðaþjónustan með 18% og orkuiðnaður með 14%. Ef horft er til aldurs sést að eldri einstaklingar töldu frekar en þeir yngri að sjávarútvegurinn væri mikilvægastur. Hlutfallið var hæst meðal þeirra sem eru 60-69 ára, eða um 49%, en lægst meðal 40-49 ára, um 31%. Síðarnefndi hópurinn var sá eini sem taldi ekki að sjávarútvegurinn væri mikilvægasta greinin og svöruðu frekar tækni og nýsköpun, þar sem 34% töldu hana mikilvægasta. Einstaklingar 30-39 ára töldu tækni og nýsköpun síður mikilvægasta, eða um 16%. Hvað ferðaþjónustu varðar eru fæstir sem telja að hún sé mikilvægust einstaklingar 70 ára eða eldri, einungis um 9%, en um 27% þeirra 30-39 ára töldu hana mikilvægasta. Misjafnt var eftir hópum hverjir töldu orkuiðnað mikilvægastan en hlutfallið var á bilinu 8-18%, mest hjá 18-29 ára og minnst hjá 60-69 ára. Hvað búsetu varðar voru langflestir þeirra sem búsettir eru í sveitarfélögum utan höfuðborgarsvæðisins sem töldu að sjávarútvegurinn væri mikilvægastur eða 50% en hlutfallið var í kringum 36% í Reykjavík og 34% í nágrannasveitarfélögum Reykjavíkur. Einstaklingar utan höfuðborgarsvæðisins voru síður spenntari fyrir ferðaþjónustu, þar sem 13% töldu hana mikilvægasta, á meðan hlutfallið var 22% í Reykjavík og 20% í nágrannasveitarfélögum. Ef horft er til tækni og nýsköpunar töldu einstaklingar á höfuðborgarsvæðinu frekar en íbúar utan höfuðborgarsvæðisins að sú grein væri mikilvægust, eða 25-27% á móti 21%. Á bilinu 12-16% töldu orkuiðnað mikilvægastan. Munur var sömuleiðis á afstöðu svarenda eftir menntun. Þeir sem eru með grunnskólapróf töldu flestir að sjávarútvegurinn sé mikilvægastur, um 48%, samanborið við 35% þeirra sem eru með háskólapróf. Á móti kemur að margir einstaklingar með háskólapróf töldu tækni og nýsköpun mikilvægasta, eða um 30%, á meðan hlutfallið var um 21% hjá þeim sem eru með grunnskóla- eða framhaldsskólapróf. Staðan var sú sama þegar kemur að ferðaþjónustu, 21% einstaklinga með háskólapróf töldu þá grein mikilvægasta en einungis um 13% einstaklinga með grunnskólapróf voru á þeirri skoðun. Þegar kemur að orkuiðnaði töldu 19% þeirra sem eru með framhaldsskólapróf að sú grein væri mikilvægust, á meðan hlutfallið var 14% hjá grunnskólamenntuðum og 9% hjá háskólamenntuðum. Sjávarútvegurinn var þá langmikilvægastur meðal einstaklinga með lægstu fjölskyldutekjurnar, þ.e. lægri en 550 þúsund, eða hjá um 56%. Þeir sem eru með næst hæstu tekjurnar, þ.e. 1.250 til 1.749 þúsund, töldu síður að sjávarútvegurinn væri mikilvægastur, einungis um 26%. Hjá þeim tekjuhópi voru aftur á móti 27% sem töldu tækni og nýsköpun mikilvægasta, samanborið við um 16% hjá þeim tekjulægstu, og 23% svöruðu að orkuiðnaður væri mikilvægastur. Flestir voru álíka sammála um mikilvægi ferðaþjónustunnar. Nánar er fjallað um málið í veglegu tímriti Frjálsrar verslunar , áskrifendur geta lesið greina hér . Hægt er að kaupa ritið hér .