Fimmtán langreyðar hafa veiðst það sem af er þessari hvalveiðivertíð, ef marka má síðustu tölur yfir landanir sem er að finna á gagnasíðum Fiskistofu. Síðustu skráðu landanir voru 17. júlí síðastliðinn þegar Hvalur 8 kom með eitt dýr að landi og Hvalur 9 annað. Hægagangurinn í veiðum er að stærstum hluta vegna veðurskilyrða. Erfitt mun að koma auga á blástur hvala í dumbungnum sem ríkt hefur nánast allan júlímánuð og í raun þarf verulega góð veðurskilyrði til að veiðarnar gangi vel. Það virðist því óravegu frá því að veiðarnar nálgist útgefnar veiðiheimildir á þessu ári eins og staðan er nú og nema veruleg umskipti verði í veðri. Vísindaleg ráðgjöf Hafrannsóknastofnunar og NAMMCO fyrir árið 2026 hljóðaði upp á að veiðar á langreyði yrðu ekki meiri en 150 dýr, þar af 116 dýr á veiðisvæðinu Austur-Grænland/Vestur-Ísland og 34 dýr á svæðinu Austur-Ísland/Færeyjar, sem er um 28% lækkun frá fyrri ráðgjöf. Veiðar hófust á ný í sumar eftir hlé. Hvalveiðiskipið Hvalur 9 fékk fyrstu langreyðarnar við Ísland í tvö ár 23. júní. Síðan þá hefur veiðin haldið áfram. 11. júlí var ellefti hvalurinn á vertíðinni kominn að landi. Hanna Katrín Friðriksson atvinnuvegaráðherra hefur lýst því yfir að hún vilji draga úr og að lokum hætta hvalveiðum og boðar lagabreytingar. Hún segir hendur sínar bundnar fyrir þetta sumar vegna gildandi reglugerðar Bjarna Benediktssonar, þáverandi forsætis- og matvælaráðherra, um leyfi til Hvals hf. til veiða á langreyðum til fimm ára, sem sett var árið 2024.