Nýir tollar Bandaríkjanna á 60 helstu viðskiptalönd sín tóku gildi í nótt, þar á meðal á Evrópusambandið. Tollarnir eru á bilinu 10 til 12,5% samkvæmt tilkynningu bandarískra stjórnvalda. Sjá einnig Ísland ekki á nýjum tollalista Trump Öll 27 aðildarríki Evrópusambandsins munu nú bera10 til 12,5% toll á útflutning sinn til Bandaríkjanna eftir vöruflokkum, enda telst sambandið eitt viðskiptasvæði í aðgerðinni. Ísland og íslenskar vörur eru undanþegnar hinum nýja tolli. Útfærslan er þó önnur en gagnvart flestum öðrum ríkjum. Tollurinn er lagður á að frádregnum bestukjaratolli, þannig að samanlagður bestukjaratollur og nýi tollurinn fer ekki yfir 10% eða 12,5% eftir vöruflokkum, nema bestukjaratollurinn sé þegar hærri. Nýi tollurinn virkar þannig sem uppfylling upp að þaki fremur en hrein viðbót ofan á gildandi tolla. Sama gildir um Japan, Suður-Kóreu, Taívan og Sviss. Evrópusambandið lenti þar með í vægari flokki aðgerðarinnar. Sambandið hefur þegar sett reglugerð um bann við vörum framleiddum með nauðungarvinnu en að mati bandarískra stjórnvalda er banninu ekki framfylgt með fullnægjandi hætti. Þrír flokkar og víðtækar undanþágur Tollarnir leysa af hólmi tímabundna 10% almenna tolla sem runnu út á sama tíma og eru lagðir á með vísan til 301. greinar bandarísku viðskiptalaganna frá 1974, á þeirri forsendu að ríkin hafi ekki bannað eða framfylgt banni við innflutningi á vörum sem framleiddar eru með nauðungarvinnu. Aðgerðin nær til 99,4% af innflutningi Bandaríkjanna og kemur í kjölfar þess að Hæstiréttur Bandaríkjanna felldi svokallaða „frelsisdags“-tolla Trumps úr gildi í febrúar á þeirri forsendu að forsetinn gæti ekki byggt tolllagningu á neyðarlögum án aðkomu þingsins. Jamieson Greer, viðskiptafulltrúi Bandaríkjanna, sagði við tilkynningu aðgerðarinnar: „Bandaríkin hafa haft bann við innflutningi á vörum framleiddum með nauðungarvinnu í nærri heila öld og framfylgja því af festu. Það er löngu tímabært að viðskiptalönd okkar geri slíkt hið sama.“ Tollarnir skiptast í þrjá flokka. 10% tollur leggst á 17 lönd sem hafa að einhverju leyti tekið upp bann við innflutningi nauðungarvinnuvarnings, þar á meðal Bretland, Kanada, Mexíkó, Indland, Argentínu, Indónesíu og Pakistan. Evrópusambandið, Japan, Suður-Kórea, Taívan og Sviss bera 10 til 12,5% eftir vöruflokkum. Þau 38 lönd sem eftir standa bera 12,5% toll, þar á meðal Kína og Víetnam, auk ríkja á borð við Noreg, Ástralíu, Brasilíu og Tyrkland. Listinn miðast við stærstu viðskiptalönd Bandaríkjanna og skýrir það hvers vegna Ísland er þar hvergi að finna. Undanþágurnar eru víðtækar. Meðal vöruflokka sem falla utan tollanna eru lyf, vörur fyrir fluggeirann, hálfleiðaratengdar vörur, olía, gas og áburður, ýmsir málmar og hrávörur, auk vara sem þegar bera tolla samkvæmt 232. grein, svo sem stál og ál. Vörur frá Kanada og Mexíkó sem uppfylla skilyrði USMCA-fríverslunarsamningsins eru einnig undanþegnar. Þá gildir aðlögunartími, vörur sem lestaðar voru fyrir föstudag og tollafgreiddar fyrir 28. júlí sleppa við nýju tollana. Ólíkt fyrri tollum Trumps, sem byggðu á neyðarheimildum forsetans, er 301. greinin varanlegri grundvöllur enda felur hún viðskiptafulltrúanum sjálfum tollheimildir að undangenginni formlegri rannsókn. Rannsóknin á nauðungarvinnu hófst 12. mars, náði til 60 hagkerfa og fól í sér tvær opinberar vitnaleiðslur og yfir 2.100 umsagnir. Gagnrýnendur telja þó að rannsóknin sé yfirvarp til að endurreisa tollana sem Hæstiréttur felldi úr gildi og gæti lagaleg staða aðgerðarinnar því komið til kasta dómstóla líkt og fyrri tollar. Bandarísk stjórnvöld hafa ekki gefið upp mat á því hvaða tekjur nýju tollarnir muni skila.