Hluta­bréf Ocu­lis lækkuðu í Kaup­höllinni í dag er gengi bréfanna féll um tæp 4% og endaði í 1.395 krónum. Hluta­bréf Ocu­lis hafa nú lækkað um rúm 6% á einum mánuði, tæp 46% frá áramótum og 36% á einu ári. Mikil lækkun varð á bréfum félagsins í byrjun júní eftir að tvær þriðja stigs rannsóknir á augn­dropunum OCS-01 náðu ekki aðal­mark­miði sínu við með­ferð á sjón­himnu­bjúg af völdum sykursýki. Ocu­lis ákvað í kjölfarið að sækja ekki um markaðs­leyfi í Bandaríkjunum fyrir lyfið við þeirri ábendingu. Velta með bréf Ocu­lis var þó aðeins 13 milljónir króna í dag og fóru 15 við­skipti fram með bréfin. Eim­skip lækkaði næst­mest, eða um rúm­lega 1,5%, og Iceland Sea­food International lækkaði um tæp­lega 1,4%. Heimar Festi og Amaroq Minerals lækkuðu einnig í við­skiptum dagsins um tæpt eða rúmt 1%. Úr­vals­vísi­talan OMXI15 stóð nánast í stað. Icelandair hækkaði mest Icelandair hækkaði mest allra félaga á aðal­markaði, eða um tæp 2%, og endaði gengið í 0,72 krónum. Bréf JBTM hækkuðu um tæp­lega 1,2% og Sýn um tæpt 1%. Icelandair birti upp­gjör sitt fyrir annan árs­fjórðung fyrr í vikunni. Tekjur félagsins voru þær mestu sem það hefur skilað á öðrum árs­fjórðungi, 496 milljónir dala, en rekstrar­tap nam tæpum 30 milljónum dala. Hækkun elds­neytis­kostnaðar vó þungt í upp­gjörinu og jókst elds­neytis­kostnaður að frá­dregnum vörnum um 41 milljón dala milli ára. Hækkun bréfanna í dag kom sam­hliða nokkurri lækkun á hráolíu­markaði. Fram­virkt verð á Brent-olíu féll aftur undir 100 dali á tunnu eftir að hafa farið yfir þau mörk í gær. Verðið stóð í kringum 96 dali þegar leið á daginn. Lægra olíu­verð er al­mennt jákvætt fyrir flug­félög, enda er elds­neyti einn stærsti kostnaðar­liður þeirra. Mest velta var með bréf Ís­lands­banka, eða 457 milljónir króna. Velta með bréf Arion banka nam 264 milljónum og 167 milljónum með bréf Haga. Heildar­velta á hluta­bréfa­markaði nam 1,2 milljörðum króna í 207 við­skiptum.