Ísfisktogarinn Vestmannaey VE landaði 50 tonnum í Eyjum í síðustu viku og 55 tonnum í Grindavík í gær eftir tæplega þriggja vikna stopp. „Við byrjuðum í ýsu á Broadway og lönduðum rúmlega fimmtíu tonnum í Eyjum á miðvikudag. Síðan var farið í Skerjadýpið í þeim tilgangi að reyna við karfa. Í Skerjadýpinu vorum við í tæpa þrjá sólarhringa og lönduðum síðan um 55 tonnum af karfa í Grindavík í gær. Nú erum við á leiðinni á Ingólfshöfðann og er ráðgert að landa í Eyjum á miðvikudag. Síðan tekur við þjóðhátíðarstopp og mikið stuð,” sagði Egill Guðni Guðnason skipstjóri í samtali við tíðindamann heimasíðu Síldarvinnslunnar.