Rannsóknarmiðstöð um samfélags- og efnahagsmál (RSE) hefur gefið út skýrslu um utanríkisverslun Íslands, hver séu helstu viðskiptalönd Íslands og hvaða gjaldmiðill sé notaður í þeim viðskiptum. Skýrslan verður, að því er segir í fréttatilkynningu, kynnt á Hilton Reykjavik Nordica, Suðurlandsbraut 2, fimmtudaginn 6. ágúst, kl. 14:00. Í fréttatilkynningu er bent á að í hagtölum um utanríkisverslun Íslands sem Hagstofa Íslands haldi sé útflutningur iðulega flokkaður eftir fyrsta löndunarstað erlendis en ekki endanlegum áfangastað. Þessi yfirlit Hagstofunnar endurspegla því að verulegu leyti flutningsleiðir útflutningsins frá Íslandi en ekki hvaða lönd kaupi vöruna. Þetta hafi stundum leitt til misskilnings um það hverjar raunverulegar viðskiptaþjóðir Íslands séu og hvar landfræðilegir viðskiptahagsmunir Íslands liggi. Arnar Arinbjarnarson og Róbert Bragason hjá Samtökum skattgreiðenda hafi nú yfirfarið gögn frá innlendum og erlendum hagstofum og gagnabönkum sem lúta að utanríkisviðskiptum Íslands í því skyni að fá gleggri mynd af því hverjar helstu viðskiptaþjóðir Íslands séu og hvaða gjaldmiðlar séu notaðir í þeim viðskiptum. Meðal niðurstaða þeirra er meðal annars: Landaskipting vöruútflutningsins er stórlega bjöguð vegna umskipunar. Holland er skráð fyrir um þriðjungi alls vöruútflutnings 2025 (34%), en stór hluti þessa útflutnings er er endurfluttur til annarra landa. Raunverulegir stærstu markaðir íslenskra vara eru Bandaríkin, Þýskaland, Bretland og Pólland. Útflutningur þjónustu er stærri en vöruútflutningur. Ferðaþjónusta (461 ma.kr.) er stærsta útflutningsgrein landsins og Bandaríkin langstærsti þjónustumarkaðurinn (32%) – nærri á pari við öll 27 ríki Evrópusambandsins samanlagt (37,5%). Séu þjónustuviðskipti talin með eru Bandaríkin stærsta einstaka viðskiptaland Íslands . Hlutur ESB-ríkja í heildarútflutningi Íslands er um helmingur – ekki 70%. Hlutur ESB í vöruútflutningi hefur verið nálægt 60%. Í þjónustuútflutningi er hlutur ESB hins vegar aðeins um 37,5%. Utanríkisviðskipti Íslands eru að mestu gerð upp í Bandaríkjadollar, ekki Evrum. Bandaríkjadalur ber um 60% af vöruútflutningi öll árin 2015–2024 og evran innan við 30%; í innflutningi vegur evran þyngra (41% á móti 38% í dollar). Íslenska krónan er nánast ekki notuð í utanríkisviðskiptum.